Delhi blast: ‘କାର ଧୀରେ ଧୀରେ ଆସି ରେଡ୍ ଲାଇଟ୍ ପାଖରେ ଅଟକିଲା...’, ଦିଲ୍ଲୀ ବ୍ଲାଷ୍ଟ ଉପରେ କମିଶନରଙ୍କ ବୟାନ

ନୂଆଦିଲ୍ଲୀ: ରାଜଧାନୀ ଦିଲ୍ଲୀ ସମେତ ସାରା ଦେଶ ଲାଲକିଲ୍ଲା ନିକଟରେ ବିସ୍ଫୋରଣ ପରେ ଦୋହଲି ଯାଇଛି । ସଂଧ୍ୟା ୬.୫୨ ମିନିଟରେ ଏକ ଇକୋ ଭ୍ୟାନରେ ହୋଇଥିବା ବିସ୍ଫୋରଣରେ ୧ ଜଣଙ୍କ ମୃତ୍ୟୁ ହୋଇଛି । ୨୦ରୁ ଅଧିକ ଗୁରୁତରଙ୍କୁ ଏନଏନଜେପି ହସ୍ପିଟାଲରେ ଭର୍ତ୍ତି କରାଯାଇଛି । ଏହାରି ଭିତରେ ଦିଲ୍ଲୀ ପୋଲିସ କମିଶନର ବିସ୍ଫୋରଣ ଉପରେ ଏକ ବଡ଼ ସୂଚନା ଦେଇଛନ୍ତି । କେଉଁ ସ୍ଥାନରେ ଓ କେଉଁ ଗାଡ଼ି ବିସ୍ଫୋରଣ ତାର ମଧ୍ୟ ଖୁଲାସା କରିଛନ୍ତି ।

ଦିଲ୍ଲୀ ପୋଲିସ କମିଶନର ସତୀଶ ଗୋଲଚା କହିଛନ୍ତି, 'ଆଜି ସଂଧ୍ୟା ୬.୫୨ ମିନିଟରେ ଧିମା ଗତିରେ ଏକ କାର ଆସି ରେଡ୍ ଲାଇନ୍ ପାଖରେ ଆସି ଆଟକି ଥିଲା । ଏହି ବିସ୍ଫୋରଣ ସେହି ଗାଡ଼ିରେ ହୋଇଛି ଓ ଏହାପରେ ଅନ୍ୟ ଗାଡ଼ିକୁ ନିଆଁ ବ୍ୟାପିଥିଲା । ସବୁ ଏଜେନ୍ସି ଏଫଏସଏଲ୍, ଏନଆଇଏ ଏଠାରେ ଉପସ୍ଥିତ ଅଛନ୍ତି । ଏହି ଘଟଣାରେ କିଛି ଲୋକଙ୍କ ମୃତ୍ୟୁ ହୋଇଛି ଓ ଅନ୍ୟ ଜଣ ଆହାତ ହୋଇଛନ୍ତି । ସ୍ଥିତି ଉପରେ ଲଗାତାର ନୀରିକ୍ଷଣ ରଖାଯାଇଛି । ଗୃହ ମନ୍ତ୍ରୀ ଫୋନ କରିଥିଲେ ଓ ସବୁ ସୂଚନା ପ୍ରଦାନ କରାଯାଉଛି ।'

ବିସ୍ଫୋରଣରେ କେଉଁ ପ୍ରକାରର ବିସ୍ଫୋରକ ବ୍ୟବହାର କରାଯାଇଥିଲା ତାହା ବର୍ତ୍ତମାନ ସ୍ପଷ୍ଟ ନୁହେଁ । ବିସ୍ଫୋରକ ସାମଗ୍ରୀ ସାମିଲ ଅଛି କି ନାହିଁ ତାହା ଉପରେ ତଦନ୍ତକାରୀ ଏଜେନ୍ସିଗୁଡ଼ିକ କାମ କରୁଛନ୍ତି । ପୋଲିସ ଅନୁଯାୟୀ, ବିସ୍ଫୋରଣ ବଡ଼ ଥିଲା, କାରଣ ଏହାର ଶବ୍ଦ ଏବଂ ପ୍ରଭାବ ଅତ୍ୟନ୍ତ ଶକ୍ତିଶାଳୀ ଥିଲା ।

ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ, ବିସ୍ଫୋରଣ ପରେ କେଉଁଠି ମଣିଷର ହାତ ପଡ଼ିଛି ତ କେଉଁଠି ଫୁସଫୁସ । କାରରେ ବିସ୍ଫୋରଣ ଏତେ ଭୟଙ୍କର ଥିଲା ଯେ ଗାଡ଼ି ସହିତ ପାଖରେ ଠିଆ ହୋଇଥିବା ଲୋକଙ୍କ ଶରୀରର ଅଂଶ କିଛି ମିଟର ଦୂରରେ ଛିଟିକି ପଡ଼ିଥିଲା । ପୋଲିସ ଶରୀରର ଅଂଶଗୁଡ଼ିକୁ ପଲିଥିନରେ ପ୍ୟାକ୍ କରି ତଦନ୍ତ ପାଇଁ ପଠାଇଥିଲା ।