କୋରାପୁଟ ୩୦।୪: ଉତ୍ସବ ମୁଖର ହୋଇଉଠିଛି ଶାବର ଶ୍ରୀକ୍ଷେତ୍ର । ପରମ୍ପରା ଅନୁସାରେ ମନ୍ଦିର ପରିସରରେ ଥିବା ଗାୟତ୍ରୀ ମନ୍ଦିର ପ୍ରାଙ୍ଗଣରେ ନୀତିକାନ୍ତି ଅନୁସାରେ ରଥକାଠ ଅନୁକୂଳ କରାଯାଇଛି । ଏନେଇ କୋରାପୁଟ ଶାବର ଶ୍ରୀକ୍ଷେତ୍ର ମନ୍ଦିର ପରିଚାଳନା କମିଟି ପକ୍ଷରୁ ସମସ୍ତ ବ୍ୟବସ୍ଥା ଗ୍ରହଣ କରାଯାଇଥିଲା । ଠାକୁରଙ୍କ ଆଜ୍ଞାମାଳ ନେଇ ତିନି ରଥ ପାଇଁ ରଥ କାଠ ଅନୁକୂଳ କରାଯାଇଛି ।
ଅକ୍ଷୟ ତୃତୀୟା ପବିତ୍ର ଦିନ ଅବସରରେ ଶାବର ଶ୍ରୀକ୍ଷେତ୍ର ଠାରେ ରଥ କାଠ ଅନୁକୂଳ କରାଯିବା ସହ ଶାଳଗ୍ରାମ ସ୍ଥାପନା କରାଯାଇଛି । ବୁଧବାର ସନ୍ଧ୍ୟାରୁ ବାହାର ଚନ୍ଦନଯାତ୍ରା ଲାଗି ମନ୍ଦିର ପରିଚାଳନା କମିଟି ପକ୍ଷରୁ ସମସ୍ତ ବ୍ୟବସ୍ଥା ଗ୍ରହଣ କରାଯାଇଛି । ଚଳିତବର୍ଷ ନିୟମ ଅନୁସାରେ ସମସ୍ତ ନୀତିକାନ୍ତି କରାଯିବା ନେଇ ସମ୍ପାଦକ ସୂଚନା ଦେଇଛନ୍ତି ।
ଶାବର ଶ୍ରୀକ୍ଷେତ୍ର ରଥଯାତ୍ରା ସମୟରେ ଅବିଭକ୍ତ କୋରାପୁଟ ଜିଲ୍ଲା ସହ ରାଜ୍ୟ ବାହାରୁ ପ୍ରବଳ ଭକ୍ତଙ୍କ ସମାଗମ ହେଉଥିବା ବେଳେ କିଭଳି ଭାବରେ ଶାନ୍ତିଶୃଙ୍ଖଳା ରକ୍ଷା କରି ମହାପ୍ରଭୁଙ୍କ ରଥଯାତ୍ରା ଅନୁଷ୍ଠିତ ହେବ ସେନେଇ ମନ୍ଦିର ପରିଚାଳନା କମିଟି ଓ ଜିଲ୍ଲା ପ୍ରଶାସନ ସହ ଖୁବ୍ଶୀଘ୍ର ବୈଠକ ଅନୁଷ୍ଠିତ ହେବା ନେଇ ଶାବର ଶ୍ରୀକ୍ଷେତ୍ର ସମ୍ପାଦକ ଭବାନୀ ଶଙ୍କର ଆଚାର୍ଯ୍ୟ କହିଛନ୍ତି ।
