DGCA ଆଣୁଛି ନୂଆ ନିୟମ, ବୁକିଂର ୪୮ ଘଣ୍ଟା ଭିତରେ ବିନା ଅତିରିକ୍ତ ଶୁଳ୍କରେ ରଦ୍ଦ କରିପାରିବେ ବିମାନ ଟିକେଟ୍

ନୂଆଦିଲ୍ଲୀ: ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ (ଡିଜିସିଏ) ଟିକେଟ୍ ରିଫଣ୍ଡ ନିୟମରେ ବଡ଼ ପରିବର୍ତ୍ତନ କରିବାକୁ ଯାଉଛି । ଏହା ଅଧିନରେ ଯାତ୍ରୀ ବୁକିଂର ୪୮ ଘଣ୍ଟା ଭିତରେ ବିନା କୌଣସି ଅତିରିକ୍ତ ଶୁଳ୍କରେ ନିଜ ଟିକେଟକୁ ରଦ୍ଦ କିମ୍ୱା ସେଥିରେ ପରିବର୍ତ୍ତନ କରିପାରିବେ । ଏହା ବ୍ୟତୀତ ଡିଜିସିଏ ପ୍ରସ୍ତାବ ରଖିଛି, ଯଦି କୌଣସି ଟିକେଟ ଟ୍ରାଭେଲ୍ ଏଜେଣ୍ଟ/ପୋର୍ଟାଲ୍ ମାଧ୍ୟମରେ ଟିକେଟ କିଣାଯାଏ ତେବେ ରିଫଣ୍ଡ ପାଇଁ ଏୟାରଲାଇନ୍ ଦାୟୀ ରହିବ, କାରଣ ଏଜେଣ୍ଟ ତାଙ୍କ ନିଯୁକ୍ତ ପ୍ରତିନିଧି ହୋଇଥାନ୍ତି ।

ରିଫଣ୍ଡ ପ୍ରକ୍ରିୟା ୨୧ କାର୍ଯ୍ୟ ଦିବସ ମଧ୍ୟରେ ଯେପରି ଶେଷ ହେବା, ତାହା ଏୟାରଲାଇନ୍ସ ସୁନିଶ୍ଚିତ କରିବେ । ଏହି ପ୍ରସ୍ତାବଗୁଡ଼ିକ ଏପରି ସମୟରେ ଆସିଛି ଯେତେବେଳେ ବିମାନ ଟିକେଟ ରିଫଣ୍ଡ ସମ୍ପର୍କିତ ଅଭିଯୋଗ ଏବଂ ସମସ୍ୟା ବୃଦ୍ଧି ପାଉଛି । ଡ୍ରାଫ୍ଟ ସିଭିଲ୍ ଏଭିଏସନ୍ ରିକ୍ୱାରମେଣ୍ଟ (CAR) ଅନୁଯାୟୀ, ଯଦି ଟିକଟ ସିଧାସଳଖ ଏୟାରଲାଇନ୍ସର ୱେବସାଇଟରୁ କିଣାଯାଏ ଏବଂ ଯାତ୍ରୀଙ୍କ ନାମରେ କୌଣସି ତ୍ରୁଟି ଥାଏ, ତେବେ ସେ କୌଣସି ଅତିରିକ୍ତ ଶୁଳ୍କ ବିନା ୨୪ ଘଣ୍ଟା ମଧ୍ୟରେ ନିଜ ନାମ ସଂଶୋଧନ କରିପାରିବେ । 

DGCA ଅନୁଯାୟୀ, ଟିକେଟ୍ ବୁକ୍ କରିବା ପରେ ୪୮ ଘଣ୍ଟା ପାଇଁ ବିମାନ କମ୍ପାନୀଗୁଡ଼ିକୁ 'ଲୁକ୍-ଇନ୍ ବିକଳ୍ପ' ପ୍ରଦାନ କରିବାକୁ ପଡିବ । ଏହି ସମୟ ମଧ୍ୟରେ, ଯାତ୍ରୀମାନେ କୌଣସି ଅତିରିକ୍ତ ଶୁଳ୍କ ବିନା ଟିକେଟ୍ ବାତିଲ କିମ୍ବା ସଂଶୋଧନ କରିପାରିବେ । ଏହି ସମୟ ମଧ୍ୟରେ କେବଳ ପରିବର୍ତ୍ତିତ ବିମାନର ସାଧାରଣ ଭଡ଼ା ଲାଗୁ ହେବ । ଅନ୍ୟ ଏକ ପ୍ରସ୍ତାବ ହେଉଛି ଯେ ଯଦି କୌଣସି ଯାତ୍ରୀ କୌଣସି ଜରୁରୀକାଳୀନ ପରିସ୍ଥିତିରେ ଟିକେଟ୍ ବାତିଲ କରନ୍ତି, ତେବେ ବିମାନ କମ୍ପାନୀଗୁଡ଼ିକ ଟିକେଟ୍ ଫେରସ୍ତ କରିପାରିବେ କିମ୍ବା କ୍ରେଡିଟ୍ ସେଲ୍ ପ୍ରଦାନ କରିପାରିବେ । ଡିଜିସିଏ ନଭେମ୍ବର ୩୦ ସୁଦ୍ଧା ଅଂଶୀଦାରମାନଙ୍କଠାରୁ ଡ୍ରାଫ୍ଟ ସିଏଆର୍ ଉପରେ ପରାମର୍ଶ ଲୋଡିଛି ।