ଗ୍ରୀନ ଷ୍ଟିକର ନଥିଲେ କଟିବ ଫାଇନ, ମିଳିବନି ପେଟ୍ରୋଲ! ଏହା ମାଗଣା ହେବ ନା ପଇସା ପଡିବ? କେଉଁଠି ଓ କେମିତି ମିଳିବ ଜାଣନ୍ତୁ ପୂରା ତଥ୍ୟ

ଭୁବନେଶ୍ୱର:ରାଜ୍ୟରେ ପ୍ରଦୂଷଣ ନିୟନ୍ତ୍ରଣ କରିବା ପାଇଁ ରାଜ୍ୟ ସରକାର ନିୟମ ଆଉ ଟିକେ କଠୋର କରିଛନ୍ତି। ପ୍ରଥମେ ଟ୍ରାଫିକ ଫାଇନ ଭରିବ, ତା’ପରେ ପିୟୁସିସି ମିଳିବ,ଏହାପରେ ଆପଣଙ୍କ ଗାଡ଼ିରେ ଏକ ଗ୍ରୀନ ଷ୍ଟିକର ଲଗାଯିବ। ତା’ପରେ ଯାଇ ଆପଣ ପ୍ରଦୂଷଣ ନିୟନ୍ତ୍ରଣ ସାର୍ଟିଫିକେଟ କରିଛନ୍ତି ବୋଲି ଜଣାପଡ଼ିବ।

ଆର୍ଥାତ୍ ଆପଣଙ୍କୁ ଏବେ ଆପଣଙ୍କ ଗାଡ଼ିରେ ଗ୍ରୀନ ଷ୍ଟିକର ଲଗାଇବାକୁ ପଡ଼ିବ। ଜାନୁଆରୀ ୧୦ ତାରିଖ ଠାରୁ ସମସ୍ତ ଆର୍ଟିଓ ଅଫିସ୍ରେ ଏହି ଗ୍ରୀନ ଷ୍ଟିକର ମିଳିବ ବୋଲି ରାଜ୍ୟ ସରକାର ଘୋଷଣା କରିଛନ୍ତି। ଯେଉଁମାନେ ପିୟୁସିସି ପାଇ ସାରିଥିବେ ସେମାନଙ୍କୁ ଏହି ଗ୍ରୀନ ଷ୍ଟିକର ଦିଆଯିବ। ଯଦି ଆପଣ ଏସବୁ ନ କରିବେ ତେବେ ମୋଟା ଅଙ୍କର ଫାଇନ ଗଣିବେ।

କ’ଣଏହି ଗ୍ରୀନ ଷ୍ଟିକର?

ଆପଣଙ୍କ ଗାଡ଼ିରେ ଏକ ବୃତ୍ତାକାର ସବୁଜ ରଙ୍ଗର ଷ୍ଟିକର ଲଗାଯିବ। ଯେଉଁଥିରେ ଓଡ଼ିଶା ପରିବହନ ବିଭାଗର ଲୋଗୋ, ପିୟୁସିସି, ଗାଡ଼ି ପଞ୍ଜୀକରଣ ନମ୍ବର, ବୈଧତା ତାରିଖ ଏବଂ ଅଧିକୃତ ପରୀକ୍ଷଣ କେନ୍ଦ୍ରର ନାଁ ଲେଖାଯିବ। ନୂଆ ଷ୍ଟିକର ଟି ବର୍ତ୍ତମାନ ଲାଗୁଥିବା ପିୟୁସିସି ଷ୍ଟିକର ବଦଳରେ ଲାଗିବ। ଏହାଦ୍ୱାରା ଆପଣଙ୍କ ଗାଡ଼ି ପ୍ରଦୂଷଣ ମାନଦଣ୍ଡ ପୂରଣ କରୁଛି କି ନାହିଁ ତାହା ଚିହ୍ନଟ କରିବା ସହଜ ହେବ।

କେମିତି ଓ କେଉଁଠି ପାଇବେ ଗ୍ରୀନ ଷ୍ଟିକର?

ଏଥିପାଇଁ ରାଜ୍ୟ ସରକାର ଦୁଇଟି ବ୍ୟବସ୍ଥା କରିଛନ୍ତି। ଟ୍ରାଫିକ ନିୟମ କଡ଼ାକଡ଼ି କରିବା ପରେ ବର୍ତ୍ତମାନ ଲୋକେ ଆର୍ଟିଓ ଅଫିସ୍ଗୁଡ଼ିକରେ ଲାଇନ ଲଗାଇ ଚାଲାଣ ଭରିବା ସହ ପିୟୁସିସି କରୁଛନ୍ତି। ତେଣୁ ଯେଉଁମାନଙ୍କର ପିୟୁସିସି ହୋଇ ସାରିଛି ସେମାନେ ନିକଟସ୍ଥ ଆର୍ଟିଓ ଅଫିସକୁ ଯାଇ ଏହି ଗ୍ରୀନ ଷ୍ଟିକର ଆଣିପାରିବେ। ସେହିପରି ଯେଉଁମାନେ ଜାନୁଆରୀ ୧୦ ତାରିଖ ପରେ ପିୟୁସିସି କରିବେ, ଉକ୍ତ ସ୍ଥାନରେ ହିଁ ତାଙ୍କୁ ଏହି ଷ୍ଟିକର ମିଳି ଯିବ।

୧.ଜାନୁଆରୀ ୧୦ ପୂର୍ବରୁ: ଗାଡ଼ି ମାଲିକମାନେ ସେମାନଙ୍କ ନିକଟସ୍ଥ ଆରଟିଓକାର୍ଯ୍ୟାଳୟକୁ ଯାଇ ସବୁଜ ଷ୍ଟିକର ଆଣି ଗାଡ଼ିରେ ଲଗାଇପାରିବେ।୨.ଜାନୁଆରୀ ୧୦ ପରେ: ପିୟୁସିସିପରୀକ୍ଷା କେନ୍ଦ୍ରଗୁଡ଼ିକରେ ସିଧାସଳଖ ଷ୍ଟିକର ଜାରି କରାଯିବ। ବଣ୍ଟନକୁ ସହଜ କରିବା ପାଇଁ ସମସ୍ତ ଆରଟିଓରେ ସ୍ୱତନ୍ତ୍ର କାଉଣ୍ଟର ଖୋଲାଯିବ।

ଗ୍ରୀନ ଷ୍ଟିକର ପାଇଁ ଆବଶ୍ୟକ ଡକ୍ୟୁମେଣ୍ଟ

ଗ୍ରୀନ ଷ୍ଟିକର ପାଇବାକୁ ହେଲେ ଗାଡ଼ି ମାଲିକଙ୍କୁ ଏହିସବୁ ଡକ୍ୟୁମେଣ୍ଟ ଦରକାର ପଡ଼ିବ।

•  ଅରିଜନାଲ ବୈଧPUCCସାର୍ଟିଫିଟେ
• ପଞ୍ଜୀକରଣ ପ୍ରମାଣପତ୍ର (RC)ର କପି
• ମାଲିକଙ୍କ ପରିଚୟ ପତ୍ର (ଆଧାର,ଭୋଟର ପରିଚୟ ପତ୍ର,ଇତ୍ୟାଦି)
• ମାଲିକ ବ୍ୟତୀତ ଅନ୍ୟ କେହି ସଂଗ୍ରହ କଲେ ଏକ ଅନୁମୋଦନ ପତ୍ର
• ଅଧିକାରୀମାନେ ନିଶ୍ଚିତ କରିଛନ୍ତି ଯେ ଯାନବାହନ ଡାଟାବେସ୍ ସହିତ ବିବରଣୀ ମେଳ କରି କଡ଼ା ଯାଞ୍ଚ କରାଯିବ।

ଏହି ନିୟମ ଲାଗୁ କରିବା ପରେ ପରିବହନ ବିଭାଗ କହିଛି ଯେ ନୂଆ ନିୟମ ପ୍ରଦୂଷଣ ନିୟନ୍ତ୍ରଣକୁ ଅଧିକ ପ୍ରଭାବଶାଳୀ କରିବ। ପ୍ରସ୍ତାବିତ#NoPUCNoFuelପଦକ୍ଷେପ ଅଧୀନରେ ପେଟ୍ରୋଲ ପମ୍ପଗୁଡ଼ିକ ଇନ୍ଧନ ଦେବା ପୂର୍ବରୁ ସବୁଜ ଷ୍ଟିକର ଯାଞ୍ଚ କରିପାରିବେ।

ଏନେଇ ପରିବହନ ବିଭାଗର ଅତିରିକ୍ତ କମିଶନର ଦୀପ୍ତି ରଞ୍ଜନ ପାତ୍ରକହିଛନ୍ତି ଯେ ସବୁ ଗାଡ଼ି ପଞ୍ଜିକରଣ ପ୍ରତିବର୍ଷ ପ୍ରଦୂଷଣ ଚେକ୍ କରି ପ୍ରମାଣପତ୍ର ହାସଲ କରିବେ। ବିଏସ୍- ୪ ଓ ବିଏସ୍-୬ ପାଇଁ ପଞ୍ଜକରଣ ପ୍ରତ୍ୟେକ ବର୍ଷ ଚେକ୍ କରିବେ। ସେହିପରି ବିଏସ-୧,୨,୩ ଗାଡ଼ିମାନେ ୬ ମାସକୁ ଥରେ ଯାଞ୍ଚ କରିବେ। ଗ୍ରୀନ ଷ୍ଟିକରରୁ ହିଁ ପ୍ରଦୂଷଣ ପ୍ରମାଣ ତଥ୍ୟ ସବୁ ମିଳିବ। ଏହା ସମ୍ପୂର୍ଣ୍ଣ ମାଗଣାରେ ମିଳିବ। ଗ୍ରୀନ ଷ୍ଟିକର ପାଇଁ କୌଣସି ଟଙ୍କା ଦେବାକୁ ପଡ଼ିବ ନାହିଁ।

ସେହିପରି ଯଦି ଆପଣଙ୍କର ଗାଡ଼ି କୋରାପୁଟର ହୋଇଥିବ କିନ୍ତୁ ଆପଣ ଭୁବନଶ୍ୱରରରେ ପିୟୁସିସି କରିଥିବେ ତେବେ ଭୁବନେଶ୍ୱରରେ ହିଁ ଗ୍ରୀନ ଷ୍ଟିକର ପାଇପାରିବେ। ଆପଣଙ୍କୁ କୋରାପୁଟ ଯିବାକୁ ପଡ଼ିବ ନାହିଁ।ଯେଉଁମାନେ ୯ ଜାନୁଆରୀ ପୂର୍ବରୁ ପିୟୁସିସି କରିଥିବେ ସେମାନେ ସେହି ଯାଞ୍ଚ କେନ୍ଦ୍ର ଯେଉଁ ଆର୍ଟିଓ ଅଧୀନରେ ରହିଥିବେ ସେହି ଆର୍ଟିଓରୁ ଗ୍ରୀନ ଷ୍ଟିକର ନେବେ।

ଏଠି ଗୁରୁତ୍ୱପୂର୍ଣ୍ଣ କଥା ହେଲା ଏଭଳି ହଡ଼ବଡ଼ି ଭିତରେ ପ୍ରଦୂଷଣ ଯାଞ୍ଚ କେନ୍ଦ୍ରରେ ମଧ୍ୟ ଠକେଇ ହୋଇପାରେ। ପିୟୁସିସି ନକଲେ ତାରିଖ ପକାଇ ଦେଇପାରନ୍ତି। ଯଦି ଏଭଳି ସମସ୍ୟା ହୁଏ ତେବେ ଜାଣିବେ କେମିତି?

ଏନେଇ ଶ୍ରୀ ପାତ୍ର କହିଛନ୍ତି ଯେ ପରୀକ୍ଷଣ କେନ୍ଦ୍ରରେ ଯଦି ଗ୍ରୀନ ଷ୍ଟିକରରେ ଜାଲିଆତି କରନ୍ତି ତେବେ ଏମ୍ ପରିବହନ ଆପ୍ ଜାଉନଲୋଡ୍ କରିବେ। ସେଠାରେ ଗାଡ଼ିର ତଥ୍ୟ ଦେଇ ଯାଞ୍ଚ କରିବେ। ଭ୍ୟାଲିଡିଟି ଦେଖାଉଛି କି ନାହିଁ ଚେକ୍ କରିବେ। ଯଦି ଦେଖାଉ ନାହିଁ ତେବେ ଆପଣ ଯାଞ୍ଚ କରାଇଥିବା କେନ୍ଦ୍ରକୁ ଯାଇ ଅଭିଯୋଗ କରନ୍ତୁ। ତେବେ ଆପଣ ଯଦି ବାହାର ରାଜ୍ୟରେ ବି ପିୟୁସିସି କରିଥିବେ ତାହାଲେ ଏମ୍ ବାହାନ ଆପ୍ରେ ଏହା ଅପଲୋଡ ହୋଇଥିଲେ ବି ରାଜ୍ୟରେ ଏହା ବୈଧ ହେବ ବୋଲି ଦୀପ୍ତି ରଞ୍ଜନ ପାତ୍ର କହିଛନ୍ତି।

ସରକାରୀ ଆକଳନ ଅନୁଯାୟୀ ବର୍ତ୍ତମାନ ଓଡ଼ିଶା ରାସ୍ତାରେ ପ୍ରାୟ ୧ କୋଟି ୨୦ ଲକ୍ଷ ଗାଡ଼ି ଚାଲୁଛି। ୨୦୨୦ ମସିହାରେ ପଞ୍ଜିକୃତ ଗାଡ଼ି ସଂଖ୍ୟା ପ୍ରାୟ ୯୦ ଲକ୍ଷ। ପ୍ରତିଦିନ ଏଥିରେ ୮- ୧୦ ଲକ୍ଷ ଗାଡ଼ି ଯୋଡ଼ି ହେଉଛି। ମୋଟ ଗାଡ଼ି ମଧ୍ୟରୁ ବୈଦୁତିକ ଗାଡ଼ିର ଭାଗ ୧.୩୫%। ଅର୍ଥାତ ଓଡ଼ିଶାରେ ଏବେ ୧ ଲକ୍ଷ ୬୧ ହଜାର ଇଭି ଗାଡ଼ି ଗଡ଼ୁଛି।ତେଣୁ ଏଥିପାଇଁ ଉପଯୁକ୍ତ ସମୟ ଦିଆଯାଇଛି। ସେହି ଅନୁସାରେ କାମ କଲେ ଅଯଥା ଭିଡ଼ ହେବ ନାହିଁ।