ସେଲିବ୍ରେସନ ପାଇଁ ଅଡୁଆରେ ସଞ୍ଜୁ, ହେଲମେଟ୍ ଫିଙ୍ଗିଥିବାରୁ ଆଇସିସି ନେଇପାରେ ଆକ୍ସନ

କୋଲକାତା, ୦୨ /୦୩: ଭାରତର ଦମଦାର୍ ବିଜୟ । ଓ୍ୱେଷ୍ଟ୍ ଇଣ୍ଡିଜକୁ ପରାସ୍ତ କରି ସେମି ଫାଇନାଲରେ ଟିମ୍ ଇଣ୍ଡିଆ । ଭାରତ ବିଜୟର ହିରୋ ଥିଲେ ସଞ୍ଜୁ ସାମସନ । ଓପନିଂ କରିବାକୁ ଆସି ଶେଷ ଯାଏଁ ରହିଥିଲେ । ଦଳକୁ ମ୍ୟାଚ୍ ଜିତାଇଥିଲେ । ତେବେ ତାଙ୍କର ଏକ କାରନାମା ଏବେ ଚର୍ଚ୍ଚାରେ । ଯାହା ଉପରେ ଆଇସିସି ନେଇପାରେ ଆକ୍ସନ୍ ।

ମ୍ୟାଚରେ ଟସ୍ ଜିତିଥିଲେ ଅଧିନାୟକ ସୂର୍ଯ୍ୟ କୁମାର ଯାଦବ । ସେ ପ୍ରଥମେ ବୋଲିଂ ନିଷ୍ପତ୍ତି ନେଇଥିଲେ । ପ୍ରଥମେ ବ୍ୟାଟିଂ କରିବାକୁ ଆସି ଦମଦାର ପାଳି ଖେଳିଥିଲା କାରବିୟାନ ଟିମ୍ । ରନ୍ ଗତି ଧିମା ଥିଲେ ବି ଓ୍ୱିକେଟ୍ ପଡିନଥିଲା । ଫଳରେ ଟିମ୍ ୧୯୫ ରନ୍ ସ୍କୋର କରିଥିଲା । ଜବାବରେ ଭାରତ ୧୯.୨ ଓଭରରେ ବିଜୟ ଲକ୍ଷ୍ୟ ହାସଲ କରି ନେଇଛି । ଏଥିରେ ସଞ୍ଜୁଙ୍କ ଯୋଗଦାନ ଅଧିକ ଥିଲା । ସେ ୫୦ ବଲରୁ ୯୭ ରନ୍ କରି ଅପରାଜିତ ରହିଥିଲେ ।

ତେବେ ଭାରତ ମ୍ୟାଚ୍ ଜିତିବା ପରେ ସଞ୍ଜୁ ନିଆରା ଅନ୍ଦାଜରେ ସେଲିବ୍ରେସନ କରିଥିଲେ । ସେ ବିଜୟୀ ସଟ୍ ଖେଳି ହେଲମେଟକୁ ଗ୍ରାଉଣ୍ଡରେ ଫିଙ୍ଗି ଦେଇଥିଲେ । ଏହାସହ ଭଗବାନଙ୍କୁ ପ୍ରଣାମ କରିଥିଲେ । ହାତ ଉପରକୁ ଉଠାଇ ଭଗବାନଙ୍କୁ ଧନ୍ୟବାଦ ଜଣାଇଥିଲେ । ଏହି ସେଲିବ୍ରେସନ ପାଇଁ ସେ ବିବାଦରେ ଫସିଛନ୍ତି ।

ହେଲମେଟ୍ ଫିଙ୍ଗି ଖୁସି ମନାଇବା ସଞ୍ଜୁଙ୍କୁ ଭାରି ପଡିପାରେ । ଆଇସିସି ସାମସନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇପାରେ । ଆଇସିସିର କୋଡ୍ ଅଫ୍ କଣ୍ଡକ୍ଟରେ ଖେଳାଳିଙ୍କ ବ୍ୟବହାର ନେଇ ଅନେକ ନିୟମ ରହିଛି । ନିୟମ ଅନୁସାରେ କେହି ହେଲେ ପଡିଆରେ ହେଲମେଟ୍ ଫିଙ୍ଗିପାରିବେ ନାହିଁ । ଏହା ସଠିକ ଆଚରଣ ନୁହେଁ । ଏପରି କଲେ ମ୍ୟାଚ୍ ଫି କଟିପାରେ । କିମ୍ବା ଆଇସିସି ନିଲମ୍ବନ କରିପାରିବ । କାରଣ ଆଇସିସିର ନିୟମ କେବଳ ଅନୁଶାସନ ଲାଗୁ କରିବା ନୁହେଁ ବରଂ ପଡିଆରେ ଥିବା ସମସ୍ତଙ୍କ ସୁରକ୍ଷାକୁ ସୁନିଶ୍ଚିତ କରିବା ଅଟେ ।

ସୂଚନାଯୋଗ୍ୟ, ସଞ୍ଜୁଙ୍କ ଏହି ସେଲିବ୍ରେସନ ଏକ ପୁରୁଣା କଥାକୁ ମନେ ପକାଉଛି । ଆଇପିଏଲ ୨୦୨୩ରେ ଆଭେଶ ଖାନ ଲକ୍ଷ୍ନୌ ସୁପର ଜାଏଣ୍ଟସ ପକ୍ଷରୁ ଖେଳି ଆରସିବି ବିରୋଧରେ ବିଜୟ ହାସଲ କରିଥିଲେ । ମ୍ୟାଚ୍ ବିଜୟ ପରେ ସେ ପଡିଆରେ ହେଲମେଟ୍ ଫିଙ୍ଗିଥିଲେ । ଯାହାପରେ ଆଇପିଏଲ କର୍ତ୍ତୃପକ୍ଷ ତାଙ୍କ ବିରୋଧରେ ଆକ୍ସନ ନେଇଥିଲେ ।