ଲକ୍ଷ୍ନୌ: ଅଯୋଧ୍ୟାରେ ରାମଜନ୍ମ ଭୂମି ଟ୍ରଷ୍ଟକୁ ବୋମା ବିସ୍ଫୋରଣ ଧମକ । ଉତ୍ତର ପ୍ରଦେଶର କିଛି ଜିଲ୍ଲାପାଳଙ୍କୁ ମଧ୍ୟ ବ୍ଲାଷ୍ଟ ଧମକ ମିଳିଛି । ଇ-ମେଲ୍ ଦ୍ବାରା ଏହି ଧମକପୂର୍ଣ୍ଣ ମେସେଜ୍ ଆସିଛି । ଯେଉଁଥିରେ ରାମ ମନ୍ଦିରର ସୁରକ୍ଷା ବ୍ୟବସ୍ଥା ବଢ଼ାଇବାକୁ ଚେତାବନୀ ଦିଆଯାଇଛି । ଇ-ମେଲ୍ରେ ଲେଖାଯାଇଛି, ‘ବଢ଼ା ଲୋ ମନ୍ଦିର କି ସୁରକ୍ଷା’। ଏହା କୌଣସି ଏକ ସ୍ପଷ୍ଟ ଷଡ଼ଯନ୍ତ୍ର ଧମକ ବୋଲି ଜଣାପଡ଼ୁଛି । ତେବେ ରାମମନ୍ଦିର ଟ୍ରଷ୍ଟ ଏହାକୁ ଗମ୍ଭୀରତା ସହିତ ନେଇ ସାଇବର ଥାନାରେ ଏତଲା ଦେଇଛି ।
ଆଲର୍ଟରେ ସୁରକ୍ଷା ଏଜେନ୍ସି:
ଅଯୋଧ୍ୟାରେ ରାମଜନ୍ମ ଭୂମି ଟ୍ରଷ୍ଟକୁ ଧମକପୂର୍ଣ୍ଣ ମେଲ୍ ଆସିବା ପରେ ସୁରକ୍ଷା ଏଜେନ୍ସି ଆଲର୍ଟ ଜାରି କରିଛି । ପୋଲିସ ବିଭିନ୍ନ ସ୍ଥାନରେ ମାର୍ଚ୍ଚ-ଫାଷ୍ଟ କରିବା ସହିତ ସର୍ଚ୍ଚ ଅପରେସନ ଆରମ୍ଭ କରିଦେଇଛି । ଏହା ସହିତ ବାରବାଙ୍କୀ, ଚନ୍ଦୌଲୀ ଭଳି ଅନ୍ୟ ଜିଲ୍ଲା ଗୁଡ଼ିକୁ ମଧ୍ୟ ଆଲର୍ଟରେ ରଖାଯାଇଛି । କାରଣ ଏହି ସବୁ ଜିଲ୍ଲାର ଜିଲ୍ଲାପାଳଙ୍କୁ ବୋମା ବିସ୍ଫୋରଣ ଧମକ ଆସିଥିଲା । ସୁରକ୍ଷା ଏଜେନ୍ସି ପ୍ରାଥମିକ ତଦନ୍ତରୁ ଜାଣିବାକୁ ପାଇଛି ଯେ, ଇ-ମେଲ୍ ଯୋଗେ ଧମକପୂର୍ଣ୍ଣ ମେସେଜ ତାମିଲନାଡ଼ୁ ଆସିଛି । ସାଇବର ସେଲ୍ ଅଭିଯୁକ୍ତକୁ ଧରିବାକୁ ରାମଜନ୍ମ ଭୂମି ଟ୍ରଷ୍ଟ ଓ ଜିଲ୍ଲାପାଳ ମାନଙ୍କୁ ଆସିଥିବା ଇ-ମେଲକୁ ଯାଞ୍ଚ କରୁଛି । ବର୍ତ୍ତମାନ ଅଯୋଧ୍ୟା, ବାରବାଙ୍କୀ, ଚନ୍ଦୌଲୀ ଓ ଅନ୍ୟ ଜିଲ୍ଲାରେ ସୁରକ୍ଷା ବ୍ୟବସ୍ଥାକୁ ବଢ଼ାଇ ଦିଆଯାଇଛି ।
ଚନ୍ଦୌଲୀ ଜିଲ୍ଲାପାଳଙ୍କ କାର୍ଯ୍ୟାଳୟକୁ ବୋମା ବିସ୍ଫୋରଣ କରି ଉଡ଼ାଇ ଦେବାକୁ ଧମକ ମିଳିଛି । ଜିଲ୍ଲା ଅଧିକାରୀଙ୍କ ସରକାରୀ ଇ-ମେଲ୍ ଆଇଡିକୁ ଏହି ଧମକପୂର୍ଣ୍ଣ ମେସେଜ୍ ଆସିଛି । ତାମିଲନାଡ଼ୁର ଗୋପାଳ ସ୍ବାମୀ ନାମକ ଜଣେ ବ୍ୟକ୍ତିଙ୍କ ଦ୍ବାରା ଏହି ଇ-ମେଲ୍ ପଠାଯାଇଛି । ଜିଲ୍ଲାପାଳଙ୍କୁ ବୋମା ଧମକ ଆସିବା ପରେ ସମସ୍ତ ସୁରକ୍ଷା ଏଜେନ୍ସିକୁ ସକ୍ରିୟ କରାଯାଇଛି । ସ୍ଥାନୀୟ ପୋଲିସ ଫୋର୍ସ ଓ ବମ୍ ସ୍କ୍ବାଡ୍ ଜିଲ୍ଲା ମୁଖ୍ୟାଳୟରେ ପହଞ୍ଚି ବିଲ୍ଡିଂ ଗୁଡ଼ିକୁ ତନତନ କରି ଛାନଭୀନ କରିଛି । ହେଲେ ଯାଞ୍ଚ ସମୟରେ ସନ୍ଦିଗ୍ଧ ସାମଗ୍ରୀ ମିଳିନାହିଁ । ଫଳରେ ଆଶ୍ବସ୍ତି ଅନୁଭବ କରିଛନ୍ତି ଜିଲ୍ଲାପାଳ ସମେତ ଅନ୍ୟ ଅଧିକାରୀ।...
