ନୂଆଦିଲ୍ଲୀ: ରୁଷ ରାଷ୍ଟ୍ରପତି ଭ୍ଲାଦମିର ପୁଟିନ ୟୁକ୍ରେନ ଯୁଦ୍ଧକୁ ଇଷ୍ଟର ପାଇଁ ଯୁଦ୍ଧବିରତି ଘୋଷଣା କରିଛନ୍ତି । କ୍ରେମଲିନ୍ କହିଛି ଯେ ଯୁଦ୍ଧବିରତି ଶନିବାର ସନ୍ଧ୍ୟା ୬ଟାରୁ ଆରମ୍ଭ ହୋଇ ଇଷ୍ଟର ରବିବାର ମଧ୍ୟରାତ୍ରି ଯାଏ ଲାଗୁ ହେବ । ରାଷ୍ଟ୍ରପତି ପୁଟିନ ଏହି ଘୋଷଣା ଜେନେରାଲ ଷ୍ଟାଫ୍ ମୁଖ୍ୟ ଗେରାସିମୋଭଙ୍କ ସହ ବୈଠକ ପରେ କରିଛନ୍ତି ।
ବୈଠକରେ ପୁଟିନ କହିଛନ୍ତି, 'ମାନବୀୟ ଭାବନାକୁ ଦୃଷ୍ଟିରେ ରଖି ଆଜି ସଂଧ୍ୟାରୁ ଇଷ୍ଟର ମଧ୍ୟରାତ୍ରି ଯାଏ ରୁଷ ପ୍ରତିପକ୍ଷ ଯୁଦ୍ଧବିରତି ଘୋଷଣା କରୁଛି । ଏହି ଅବଧିରେ ସମସ୍ତ ସୈନ୍ୟ କାର୍ଯ୍ୟାନୁଷ୍ଠାନ ବନ୍ଦ କରିବା କରିବା ପାଇଁ ଆଦେଶ ଦେଉଛି ।' ରାଷ୍ଟ୍ରପତି ପୁଟିନ ୟୁକ୍ରେନକୁ ଅପିଲ୍ କରି ଏହି ଯୁଦ୍ଧବିରତିର ସମ୍ମାନ କରି ଯୁଦ୍ଧବିରତି ଲାଗୁ କରିବା ପାଇଁ କହିଛନ୍ତି । ଏହାସହ ସେ ସ୍ପଷ୍ଟ କରିଛନ୍ତି ଯେ ରୁଷ ସେନା ଯୁଦ୍ଧବିରତି ଉଲ୍ଲଂଘନ, ଶତ୍ରୁର ଆକ୍ରମଣର ପାଲଟା ଜବାବ ଦେବା ପାଇଁ ପ୍ରସ୍ତୁତ ରହିବ ।
ଏହି ଅବସରରେ ୟୁକ୍ରେନ ଉପରେ ପୁଟିନ ଅନେକ ସଙ୍ଗୀନ ଅଭିଯୋଗ ଲଗାଇଛନ୍ତି । ରୁଷ ରାଷ୍ଟ୍ରପତି କହିଛନ୍ତି ଯେ ନିକଟରେ ୟୁକ୍ରେନ ରୁଷର ଏନର୍ଜି ଭିତ୍ତିଭୂମି ଉପରେ ଆକ୍ରମଣ ନକରିବାର ବୁଝାମଣାକୁ ୧୦୦ରୁ ଅଧିକ ଥର ଉଲ୍ଲଂଘନ କରିଛି । ଏହା ପୂର୍ବରୁ ଶୁକ୍ରବାର ୟୁକ୍ରେନ ଉର୍ଜା ଠିକଣାରେ ଆକ୍ରମଣ କରିବା କଟକଣାକୁ ଶେଷ କରିବା ଘୋଷଣା କରିଥିଲା । ଉଲ୍ଲେଖଯୋଗ୍ୟ ଯେ ୟୁକ୍ରେନ ଓ ରୁଷ ଦୁହେଁ ପରସ୍ପର ଉପରେ ବୁଝାମଣା ଉଲ୍ଲଂଘନ କରିବା ଅଭିଯୋଗ କରିଥିଲେ ।
ଦୁଇ ଦେଶ ଆଜି ଶତାଧିକ ଯୁଦ୍ଧବନ୍ଦୀଙ୍କୁ ବି ମୁକ୍ତ କରିଛନ୍ତି । ଗତ ତିନି ବର୍ଷ ଧରି ଚାଲିଥିବା ଯୁଦ୍ଧର ଆଜି ଯାଏ ସବୁଠୁ ବଡ଼ ସୈନ୍ୟ ଆଦାନ-ପ୍ରଦାନ ଅଟେ । ରୁଷ ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ ୟୁକ୍ରେନ ନିୟନ୍ତ୍ରଣ କ୍ଷେତ୍ରରୁ ୨୪୬ ରୁଷ ସୈନିକ ଦେଶକୁ ଫେରିଛନ୍ତି । ସେହିପରି ୨୭୭ ୟୁକ୍ରେନ ସୈନିକ ରୁଷ କଏଦରୁ ମୁକ୍ତ ହୋଇଛନ୍ତି ।
