ରାଉରକେଲା ୨୦/୪: ଉଗ୍ର ହେଉଛି ପ୍ରତିବାଦ । ୨୦ ଘଣ୍ଟାରୁ ଅଧିକ ହେଲାଣି ପଡିଛି ମୃତଦେହ । ଜିଦ୍ରେ ଅଟଳ ଗ୍ରାମବାସୀ । ରାଉରକେଲା ବନ୍ଧମୁଣ୍ଡାରେ ଆରଏସ୍ପି ପକ୍ଷରୁ ଚାଲିଥିବା ରେଳଲାଇନକୁ ବିରୋଧ ବେଳେ ଯୁବକଙ୍କ ମୃତ୍ୟୁ ଘଟଣାରେ ବଢୁଛି ଉତ୍ତେଜନା । ବନ୍ଧମୁଣ୍ଡା ବନ୍ଦ ଡାକରା ଦେଇଛନ୍ତି ଆନ୍ଦୋଳନକାରୀ ।
ଶନିବାର ବନ୍ଧୁମୁଣ୍ଡା ଦୁମେତାରେ ପୋଲିସ ପ୍ରଶାସନ ଓ ସ୍ଥାନୀୟ ଲୋକଙ୍କ ଖଣ୍ଡ ଯୁଦ୍ଧ ହୋଇଥିଲା । ରେଳ ଲାଇନକୁ ବିରୋଧ କରି ବିକ୍ଷୋଭ ବେଳେ ଯୁବକ ଇତୁଆ ଏକ୍କା ଜେସିବି ଆଗକୁ ଚାଲି ଆସିବାରୁ ଚାପି ହୋଇ ଯାଇଥିଲେ । ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଯାଇଥିଲା । ଏହି ଘଟଣାକୁ ନେଇ ବଢିବାରେ ଲାଗିଛି ଉତ୍ତେଜନା ।
୨୦ ଘଣ୍ଟାରୁ ଅଧିକ ବିତିଲାଣି ମୃତଦେହ ନେଉନାହାନ୍ତି ପରିବାର ଲୋକ ଓ ଗାଁ ଲୋକ ।ଲୋକଙ୍କ ଦାବି ଷ୍ଟିଲ ପ୍ଲାଣ୍ଟ ଜମି ବଦଳରେ ବିସ୍ଥାପିତଙ୍କୁ ଚାକିରି ମିଳୁ, ଷ୍ଟିଲ ପ୍ଲାଣ୍ଟ ବ୍ୟବହାର କରୁନଥିବା ଜମି ଆଦିବାସୀଙ୍କୁ ଫେରାଇ ଦିଆଯାଉ । ଏଥିସହ କ୍ଷତିପୂରଣ ଦାବି କରି ରାତି ସାରା ଖୋଲା ଆକାଶ ତଳେ ମୃତଦେହ ନିକଟରେ ଜଗିଛନ୍ତି ସ୍ଥାନୀୟ ଲୋକେ । ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ଘଟଣାସ୍ଥଳରେ ପୋଲିସ ମୁତୟନ କରାଯାଇଛି ।
