ରାଉରକେଲା ୦୫/୦୫: ସୁନ୍ଦରଗଡ ହେମଗିରି ଥାନା ବରପାଲିରେ ପ୍ରସ୍ତାବିତ ରେଲୱେ କୋଇଲା ସାଇଡିଂ ପରିବହନକୁ ନେଇ ଥମୁନି ବିବାଦ । ଏବେବି ଲାଗିରହିଛି ଚାପା ଉତ୍ତେଜନା । କୋଇଲା ପରିବହନକୁ ବିରୋଧ କରିବା ସହ କୋଇଲା ସାଇଡିଂକୁ ବନ୍ଦ କରିବା ଦାବିରେ ଅଡି ବସିଛନ୍ତି ସ୍ଥାନୀୟ ଲୋକେ । ଏ ସଂପର୍କରେ ଜିଲ୍ଲାପ୍ରଶାସନ ଓ ରେଲୱେ ଅଧିକାରୀଙ୍କୁ ଲିଖିତ ଭାବରେ ଜଣାଇଥିଲେ ମଧ୍ୟ
ସେମାନେ କୌଣସି ପଦକ୍ଷେପ ନେଇନଥିବା କ୍ଷୋଭର ସହ କହିଛନ୍ତି ସ୍ଥାନୀୟ ଲୋକେ ।
ରବିବାର ଲୋକଙ୍କ ସହ ଆନ୍ଦୋଳନରେ ସାମିଲ ହୋଇଥିବା ବିଧାୟକ ଯୋଗେଶ ସିଂଙ୍କୁ ଉଠାଇ ନେଇଥିଲା ପୋଲିସ । ୮ ଘଣ୍ଟା ଅଟକ ରଖିବା ପରେ ଛାଡିଦେଇଥିଲା । ଏହା ପରେ ବିଜେଡି ପକ୍ଷରୁ ଘଟଣାର ସମୀକ୍ଷା କରାଯିବା ସହ ସାମ୍ବାଦିକ ସମ୍ମିଳନୀ କରାଯାଇ ସମାଲୋଚନା କରାଯାଇଥିଲା । ସୋମବାର ପୁଣି ରାଲି କରି କୋଇଲା ପରିବହନ ସ୍ଥାନରେ ବିକ୍ଷୋଭ କରିଛନ୍ତି ଉତ୍ତ୍ୟକ୍ତ ଲୋକେ । ସେମାନଙ୍କର ଅଭିଯୋଗ ହେଉଛି ଜନବସତି ପାଖରେ କିଭଳି ସାଇଡିଂ ନିର୍ମାଣ କରାଯାଉଛି । ତୁରନ୍ତ ଏହାକୁ ବନ୍ଦ କରାଯାଉ । ଏହା ବନ୍ଦ ନହେଲେ ଜୀବନ ହାରିଦେବୁ । ତେବେ ହାଇକୋର୍ଟରେ ମାମଲା ବିଚାରାଧୀନ ଥିବାବେଳେ ଜୁନ ୨୫ରେ ମାମଲାର ଶୁଣାଣି ହେବ । ତା ପୂର୍ବରୁ ପ୍ରଶାସନ କାହିଁକି ବଳପୂର୍ବକ ରେଲୱେ ସାଇଡିଂ ନିର୍ମାଣ କରୁଛି ? ୟା ପଛର କାରଣକୁ ନେଇ ବଢୁଛି ସନ୍ଦେହ ।
