ହୃଦୟ ବିଦାରକ ଘଟଣା...ଗୋଟିଏ ଦିନରେ ଚାଲିଗଲା ବାପ-ପୁଅଙ୍କ ଜୀବନ

ବଡ଼ମାଳ ୦୨/୦୧: ପୁଅର ମୃତ୍ୟୁ ଖବର ଶୁଣି ବାପାର ଉଡ଼ିଗଲା ପ୍ରାଣବାୟୁ । ଗୋଟିଏ ଦିନରେ ଚାଲିଗଲା ବାପ- ପୁଅଙ୍କ ଜୀବନ । ଦାଦନ ଖଟିବାକୁ ଯାଇଥିବା ପୁଅର ଶବ ତାମିଲନାଡୁରେ ପଡ଼ିରହିଥିବା ବେଳେ ଘରେ ପଡ଼ିଛି ବାପାଙ୍କ ମୃତଦେହ । ଏପରି ହୃଦୟ ବିଦାରକ ଘଟଣା ଘଟିଛି ସମ୍ବଲପୁର ଜିଲ୍ଲା ରେଢ଼ାଖୋଲ ବ୍ଲକ ଚାରମାଳ ଥାନା ବ୍ରାହ୍ମଣିପାଲି ଗ୍ରାମରେ । 

ସୂଚନା ଥାଉକି, ମୋଚିବାହାଲ ପଞ୍ଚାୟତ ବ୍ରାହ୍ମଣିପାଲି ଗାଁର ଭୁଜ ମିର୍ଦ୍ଧାଙ୍କ ଏକମାତ୍ର ୨୩ ବର୍ଷ ପୁଅ ଶରତ । ତାମିଲନାଡୁ କୋଇମ୍ୱାଟୁରରେ ଏକ କାଷ୍ଟ୍‌ ଆଇରନ୍‌ କମ୍ପାନିରେ  ଶ୍ରମିକ ଭାବେ କାମ କରୁଥିଲେ । ରାତି ଡ୍ୟୁଟି ସାରି ନିଜ କୋଠରିରେ ଶୋଇଥିଲେ । ତେବେ ଅପରାହ୍ନ ୩ଟାରେ ତାଙ୍କ ମୃତ୍ୟୁ ଘଟିଥିବା କମ୍ପାନି ସ୍ପଷ୍ଟ କରିଛି । ପୋଲିସ୍‌ ମୃତଦେହ ଜବତ କରି ତଦନ୍ତ କରୁଛି । ତେବେ ମୃତଦେହ ଗାଁକୁ କେମିତି ଆସିବ କାହା ପାଖରେ ଖବର ନାହିଁ । ତାଙ୍କ ମୃତ୍ୟୁର ପ୍ରକୃତ କାରଣ ଜଣାପଡ଼ିନଥିବା ବେଳେ ପୁଅର ମୃତ୍ୟୁକୁ ପରିବାର ଲୋକେ ଗ୍ରହଣ କରିପାରୁନାହାନ୍ତି । 

ସେପଟେ ଗୁରୁବାର ସନ୍ଧ୍ୟାରେ ପୁଅର ମୃତ୍ୟୁ ଖବର ଶୁଣିବା ପରେ ପରିବାରରେ ପଡିଥିଲା ଚଡ଼କ । ବାପା ଭୁଜ ସହିପାରିନଥିଲେ ଭେଣ୍ଡିଆ ପୁଅର ମୃତ୍ୟୁ । ସଂଗେ ସଂଗେ ଚେତାଶୂନ୍ୟ ହୋଇପଡ଼ିଥିଲେ ବାପା । ତାଙ୍କୁ ରେଢ଼ାଖୋଲ ଡାକ୍ତରଖାନା ନିଆଯାଇଥିଲା । ସେଠାରେ ରାତି ସାଢ଼େ ୮ଟାରେ ତାଙ୍କ ମୃତ୍ୟୁ ଘଟିଛି । ଏବେ ପୁଅର ମୃତେଦହ ଘରକୁ କେମିତି ପହଞ୍ଚିବ ପରିବାର ଚିନ୍ତିତ ଥିବା ବେଳେ ଅନ୍ୟ ପଟେ ବାପାଙ୍କ ମୃତ୍ୟୁରେ ପରିବାର ସମ୍ପୂର୍ଣ୍ଣ ଭାଙ୍ଗିପଡ଼ିଛି । ଯାହା ଜଣାପଡିଛି ଭୁଜଙ୍କ ଅନ୍ତିମ ସଂସ୍କାର ପାଇଁ ଗ୍ରାମବାସୀ ଓ ପରିବାର ବ୍ୟବସ୍ଥା କରୁଛନ୍ତି ।