ନୂଆଦିଲ୍ଲୀ: ଆମେରିକୀୟ ଡଲାର ତୁଳନାରେ ଟଙ୍କାର ମୂଲ୍ୟ "ସର୍ବନିମ୍ନ ସ୍ତରରେ" ପହଞ୍ଚିବା ନେଇ ଶନିବାର କେନ୍ଦ୍ର ସରକାରଙ୍କୁ ଉତ୍ତର ଚାହିଁଛନ୍ତି କଂଗ୍ରେସ ନେନ୍ତ୍ରୀ ପ୍ରିୟଙ୍କା ଗାନ୍ଧୀ ଭଦ୍ରା। ଶୁକ୍ରବାର ପ୍ରଥମ ଥର ପାଇଁ ଆମେରିକୀୟ ଡଲାର ତୁଳନାରେ ଟଙ୍କା ୧୮ ପଇସା ହ୍ରାସ ପାଇ ୮୬ ସ୍ତର ଅତିକ୍ରମ କରିଛି। ଭାରତୀୟ ମୁଦ୍ରା ବର୍ତ୍ତମାନ ଆମେରିକୀୟ ମୁଦ୍ରା ତୁଳନାରେ ୮୬.୦୪କୁ ଖସି ଆସିଛି। ଅର୍ଥାତ୍ ଗୋଟିଏ ଆମେରିକୀୟ ଡଲାର ମୂଲ୍ୟ ଭାରତରେ ୮୬.୦୪ ଟଙ୍କା ହୋଇଛି। ଟଙ୍କାର ଏଭଳି ଦୁର୍ଦ୍ଦଶା କେମିତି ହେଲା ? କେନ୍ଦ୍ର ସରକାର ଏହାର ଉତ୍ତର ରଖନ୍ତୁ ବୋଲି ପ୍ରୟିଙ୍କା ଗାନ୍ଧୀ ପ୍ରଶ୍ନ କରିଛନ୍ତି।
ଏନେଇ ପ୍ରିୟଙ୍କା ଏକ୍ସରେ ହିନ୍ଦୀରେ ପୋଷ୍ଟ କରି ଲେଖିଛନ୍ତି “ଡଲାର ତୁଳନାରେ ଟଙ୍କାର ମୂଲ୍ୟ ସର୍ବକାଳୀନ ସର୍ବନିମ୍ନ ସ୍ତରକୁ ଖସି ଯାଇଛି। ଇତିହାସରେ ପ୍ରଥମ ଥର ପାଇଁ ଗୋଟିଏ ଡଲାରର ମୂଲ୍ୟ ୮୬.୪ ଟଙ୍କା ହୋଇଛି।” ସେ ଆହୁରି କହିଛନ୍ତି ଯେ ମନମୋହନ ସିଂହଙ୍କ କାର୍ଯ୍ୟକାଳରେ, ଯେତେବେଳେ ଗୋଟିଏ ଡଲାରର ମୂଲ୍ୟ ୫୮-୫୯ ଟଙ୍କା ଥିଲା, ସେତେବେଳେ ନରେନ୍ଦ୍ର ମୋଦି ଟଙ୍କାର ମୂଲ୍ୟକୁ ସରକାରଙ୍କ ପ୍ରତିଷ୍ଠା ସହିତ ଯୋଡୁଥିଲେ। ଏବଂ ମୋଦୀ କହୁଥିଲେ ମୁଁ ସବୁ ଜାଣିଛି କୌଣସି ଦେଶର ମୁଦ୍ରା ଏଭଳି ତଳକୁ ଖସିବନି। ଆଜି ସେ ନିଜେ ପ୍ରଧାନମନ୍ତ୍ରୀ ଅଛନ୍ତି। ଏବଂ ଟଙ୍କା ମୂଲ୍ୟ ହ୍ରାସର ସମସ୍ତ ରେକର୍ଡ ଭାଙ୍ଗି ଦେଇଛି। ତେଣୁ ସେ ଆଜି ଦେଶର ଲୋକଙ୍କୁ ଏହାର ଉତ୍ତର ଦେବା ଉଚିତ ବୋଲି ପ୍ରିୟଙ୍କା ଏକ୍ସରେ ପୋଷ୍ଟ କରି ସୂଚନା ଦେଇଛନ୍ତି।
