ଶନିବାରଠୁ ସୋଆ ସାହିତ୍ୟ ମହାକୁମ୍ଭ, ଯୋଗଦେବେ ୧୦୦ରୁ ଅଧିକ ଅତିଥି

ଭୁବନେଶ୍ୱର ୨୯।୧୧ : ଆଜିଠୁ ସୋଆ ସାହିତ୍ୟ ମହାକୁମ୍ଭ ‘ତୃତୀୟ ସୋଆ ସାହିତ୍ୟ ଉତ୍ସବ-୨୦୨୫’ । ଯୋଗଦେବେ ଦେଶର କୋଣ ଅନୁକୋଣରୁ ପ୍ରାୟ ୧୦୦ରୁ ଅଧିକ ବିଶିଷ୍ଟ ଲେଖକ, କବି, ଚିତ୍ରକର, ଔପନ୍ୟାସିକ, ଅନୁବାଦକ, ପ୍ରକାଶକ, ଚିନ୍ତକ, ନାଟକ ଏବଂ ଗଣମାଧ୍ୟମ ଜଗତର ବିଶିଷ୍ଟ ବ୍ୟକ୍ତି। ଦୁଇଦିନ ଧରି ଭାଷା, ସାହିତ୍ୟ, ସଂସ୍କୃତି, ସମାଜ, ସିନେମା ଓ ଶିକ୍ଷା ସହ ବିଭିନ୍ନ ବିଷୟରେ ଚାଲିବ ଚର୍ଚ୍ଚା, ଆଲୋଚନା ଓ ମାନସମନ୍ଥନ। ଫୋକସ୍ରେ ରହିବ କୃତ୍ରିମ ବୁଦ୍ଧିମତା (ଏଆଇ)। ସମ୍ମାନ ଗ୍ରହଣ ପାଇଁ ଯୋଗଦେବେ ବିଶିଷ୍ଟ ବ୍ୟକ୍ତିତ୍ୱ ଜାଭେଦ ଅଖ୍ତର।

ଶିକ୍ଷା ଓ ଅନୁସନ୍ଧାନ (ସୋଆ) ବିଶ୍ୱବିଦ୍ୟାଳୟ ଆନୁକୂଲ୍ୟରେ ସୋଆ ପରିଚାଳିତ ସେଣ୍ଟର୍ ଫର୍ ପ୍ରିଜର୍ଭେସନ୍, ପ୍ରୋପାଗେସନ୍ ଆଣ୍ଡ୍ ରେଷ୍ଟୋରେସନ୍ ଅଫ୍ ଆନ୍ସିଏଣ୍ଟ କଲ୍ଚର୍ ଆଣ୍ଡ୍ ହେରିଟେଜ୍ ଅଫ୍ ଇଣ୍ଡିଆ (ପ୍ରାଚୀନ) ପକ୍ଷରୁ ଶନିବାର ଓ ରବିବାର (୨୯ ଓ ୩୦) ସୋଆ ଅଡିଟୋରିୟମ୍ କ୍ୟାମ୍ପସ୍-୨ରେ ଏହି ଉତ୍ସବ ଅନୁଷ୍ଠିତ ହେଉଛି । ଚଳିତ ବର୍ଷର ପ୍ରସଙ୍ଗ "କଲ୍ଚର୍, କ୍ରିଏଟିଭିଟି ଆଣ୍ଡ୍ ଆର୍ଟିଫିସିଆଲ୍ ଇଣ୍ଟେଲିଜେନ୍ସ' ଅର୍ଥାତ୍ ସଂସ୍କୃତି ସୃଜନଶୀଳତା ଓ କୃତ୍ରିମ ବୁଦ୍ଧିମତା ରହିଥିଲା ବେଳେ ୩୦ଟି ବିଭିନ୍ନ ଅଧିବେଶନ ଆୟୋଜିତ ହେବ । ସାହିତ୍ୟ ଉତ୍ସବକୁ ଉଦ୍ଘାଟନ କରିବେ ରାଜ୍ୟପାଳ ଡ. ହରି ବାବୁ କମ୍ଭମ୍ପାଟି । ପରେ ଭାରତୀୟ ଚଳଚ୍ଚିତ୍ର ଓ ସାହିତ୍ୟ କ୍ଷେତ୍ରରେ ଉଲ୍ଲେଖନୀୟ ଓ ଜୀବନବ୍ୟାପୀ ଅବଦାନ ନିମନ୍ତେ ପ୍ରଖ୍ୟାତ କବି, ସଂଳାପ ଲେଖକ, ଗୀତିକାର ଓ ସମାଜ ଚିନ୍ତକ ପଦ୍ମଭୂଷଣ ଜାଭେଦ ଅଖ୍ତରଙ୍କୁ ସୋଆ ସାହିତ୍ୟ ସମ୍ମାନ-୨୦୨୫ ପ୍ରଦାନ କରାଯିବ । ସେଥିପାଇଁ ଶୁକ୍ରବାର ରାତିରେ ଆସି ଭୁବନେଶ୍ୱରରେ ପହଞ୍ଚିଛନ୍ତି ଶ୍ରୀ ଅଖ୍ତର । ସୋଆ ପକ୍ଷରୁ ତାଙ୍କୁ ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନ ବନ୍ଦରରେ ବିଶେଷ ଭାବେ ଉଚ୍ଛ୍ୱସିତ ସ୍ୱାଗତ, ସମ୍ବର୍ଦ୍ଧନା ଦିଆଯାଇଛି ।

ସୋଆ ପକ୍ଷରୁ ଏବର୍ଷ ପ୍ରତିଷ୍ଠିତ ସାହିତ୍ୟ ସମ୍ମାନ ଦେଶରେ ସାହିତ୍ୟ କ୍ଷେତ୍ରରେ ଉଲ୍ଲେଖନୀୟ ଅବଦାନ ରଖିଥିବା ବିଶିଷ୍ଟ ବ୍ୟକ୍ତି ବିଶେଷଙ୍କୁ ପ୍ରଦାନ କରାଯିବ । ଯେଉଁମାନଙ୍କର ଏହି କ୍ଷେତ୍ରରେ ଉତ୍କର୍ଷତା, ସୃଜନଶୀଳତା ଓ ବୌଦ୍ଧିକ ଗଭୀରତା ରହିଛି ସେମାନଙ୍କୁ ସମ୍ମାନିତ କରିବା ହିଁ ସୋଆ ସାହିତ୍ୟ ସମ୍ମାନର ବିନମ୍ର ଉଦ୍ଦେଶ୍ୟ। ଭାରତୀୟ ସମ୍ବିଧାନ ଅନୁମୋଦିତ ଯେକୌଣସି ଭାରତୀୟ ଭାଷାର ସାହିତ୍ୟିକଙ୍କୁ ଏହି ସମ୍ମାନ ପ୍ରଦାନ କରାଯିବ । ଉତ୍ସବରେ ଶବ୍ଦର ଯାଦୁକର ଶ୍ରୀ ଅଖ୍ତର ସମ୍ମାନ ଗ୍ରହଣ ପୂର୍ବକ ସଭାରେ ଉଦ୍ବୋଧନ ଦେବେ । ଏଥିରେ ସୋଆର ଉପସଭାପତି ଶାଶ୍ୱତୀ ଦାସ ଏବଂ କେନ୍ଦ୍ର ସାହିତ୍ୟ ଏକାଡେମୀର ପୂର୍ବତନ ସଚିବ ଡ. କେ ଶ୍ରୀନିବାସ ରାଓ ସମ୍ମାନନୀୟ ଅତିଥି ଭାବେ ଯୋଗ ଦେବେ । ସୋଆ କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ ଉତ୍ସବରେ ଅଧ୍ୟକ୍ଷତା କରିବେ । ସୋଆ ପ୍ରାଚୀନର ମୁଖ୍ୟ ପ୍ରଫେସର ଗାୟତ୍ରୀବାଳା ପଣ୍ଡା ଓ ଛାତ୍ର ମଙ୍ଗଳ ଡିନ୍ ପ୍ରଫେସର ଜ୍ୟୋତି ରଞ୍ଜନ ଦାସ ମଧ୍ୟ ଉପସ୍ଥିତ ରହି ବକ୍ତବ୍ୟ ରଖିବେ ।

ଦ୍ୱିତୀୟ ଦିନ ଅର୍ଥାତ୍ ଉଦ୍ଯାପନୀ ପର୍ବରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମୁଖ୍ୟ ଅତିଥି ଭାବେ ଯୋଗ ଦେଇ ସାହିତ୍ୟିକମାନଙ୍କୁ ଉତ୍ସାହିତ କରିବା ସହ ଅଭିଭାଷଣ ପ୍ରଦାନ କରିବେ । କାର୍ଯ୍ୟକ୍ରମରେ ସୋଆର ଉପକୁଳପତି ପ୍ରଫେସର ଡ. ପିକେ ପାତ୍ର ଅଧ୍ୟକ୍ଷତା କରିବେ । ପ୍ରାଚୀନର ମୁଖ୍ୟ ପ୍ରଫେସର ପଣ୍ଡା ଏବଂ ଛାତ୍ର ମଙ୍ଗଳ ଡିନ୍ ପ୍ରଫେସର ଦାସ ଉପସ୍ଥିତ ରହିବେ । ଏହି ଅବସରରେ ଓଡ଼ିଆ ଯୁବ କବି ଓ ଲେଖକ ସୂର୍ଯ୍ୟସ୍ନାତ ତ୍ରିପାଠୀଙ୍କୁ ‘ସୋଆ ଯୁବ ସାହିତ୍ୟ ପୁରସ୍କାର-୨୦୨୫’ରେ ସମ୍ମାନିତ କରାଯିବ । ବର୍ଷା ପ୍ରକାଶନୀ ଦ୍ୱାରା ୨୦୨୪ରେ ପ୍ରକାଶିତ ଶ୍ରୀ ତ୍ରିପାଠୀଙ୍କର କ୍ଷୁଦ୍ର ଗଳ୍ପ ସଙ୍କଳନ "ଠିଆ ପୁଚି ନାରଙ୍ଗ' ନିମନ୍ତେ ବିଚାରକମଣ୍ଡଳୀ ସର୍ବସମ୍ମତି କ୍ରମେ ତାଙ୍କ ନାମକୁ ପୁରସ୍କାର ଲାଗି ମନୋନୀତ କରିଛନ୍ତି । ଏହି ସଙ୍କଳନରେ ୧୨ଟି ଗଳ୍ପ ରହିଛି । ଯେଉଁଥିରେ ଲେଖକ ମଣିଷର ମନସ୍ତତ୍ତ୍ୱ ଏବଂ ସମସାମୟିକ ଅନୁଭୂତିର ନିଚ୍ଛକ ପରିପ୍ରକାଶ କରିଛନ୍ତି ।

ଶେଷ ଦିନରେ ଜନଜାତି ସଂସ୍କୃତିକୁ ନେଇ ଏକ ସ୍ୱତନ୍ତ୍ର ଅଧିବେଶନର ଆୟୋଜନ କରାଯାଇଛି । ଏହି ସ୍ୱତନ୍ତ୍ର ଅଧିବେଶନର ପ୍ରସଙ୍ଗ ରହିଛି "କଲ୍ଚର୍: ଦ ହେରିଟେଜ୍ ୱି ମଷ୍ଟ ପ୍ରିଜର୍ଭ' ଅର୍ଥାତ୍ "ଜନଜାତି ସଂସ୍କୃତି: ଏହାର ଐତିହ୍ୟକୁ ଆମେ ସଂରକ୍ଷିତ ରଖିବା ଉଚିତ' । ତା’ ଉପରେ ବିଶଦ ଚର୍ଚ୍ଚା ହେବ ବୋଲି ଆୟୋଜକ ଅନୁଷ୍ଠାନ ପକ୍ଷରୁ ସୂଚନା ଦିଆଯାଇଛି