ବ୍ରହ୍ମପୁର: ବ୍ରହ୍ମପୁର ଗୋସାଇନୁଆଁଗାଁର ପ୍ରସିଦ୍ଧ ମା କାଳୁଆ ଯାତ୍ରା ପାଇଁ ଗୁରୁବାର ଶୁଭଖୁଣ୍ଟି ସ୍ଥାପନ ହୋଇଛି। ଯାତ୍ରା ନିମନ୍ତେ ପୁରୋହିତ ଦେଇଥିବା ନିର୍ଘଣ୍ଟ ସମୟରେ ମାଆଙ୍କ ମନ୍ଦିରରେ ପୂଜାର୍ଚ୍ଚନା କରାଯାଇ ଶୁଭଖୁଣ୍ଟିକୁ ଅସ୍ଥାୟୀ ମଣ୍ଡପ ନିକଟକୁ ଅଣାଯାଇଥିଲା। ସେଠାରେ ପୂଜାର୍ଚ୍ଚନା କରାଯିବା ପରେ ଗ୍ରାମବାସୀଙ୍କ ସହଯୋଗ କ୍ରମେ ଶୁଭଖୁଣ୍ଟି ସ୍ଥାପନ କରାଯାଇଥିଲା।
ଆସନ୍ତା ମହାଳୟା ଅମବାସ୍ୟା ଠାରୁ ଯାତ୍ରା ଆରମ୍ଭ ହୋଇ କୁମାର ପୂର୍ଣ୍ଣିମା ପର୍ଯ୍ୟନ୍ତ ଅନୁଷ୍ଠିତ ହେବ ଯାତ୍ରା। ଗାଁର ମଙ୍ଗଳ, ସୁରକ୍ଷା ପାଇଁ ପରମ୍ପରା ଅନୁଯାୟୀ ଯାତ୍ରା ଅନୁଷ୍ଠିତ ହେଉଥିବା କହିଛନ୍ତି ଗ୍ରାମବାସୀ। ପ୍ରତ୍ୟେକ ବର୍ଷ ଆଶ୍ଵିନ ମାସରେ ଏହି ଯାତ୍ରା ଅନୁଷ୍ଠିତ ହେବା ପରମ୍ପରା ରହିଛି। ଚଳିତ ବର୍ଷ ମଧ୍ୟ ପରମ୍ପରା ଅନୁସାରେ ଯାତ୍ରା ଅନୁଷ୍ଠିତ ହେବାକୁ ଯାଉଥିବାରୁ ସ୍ଥାନୀୟ ଅଞ୍ଚଳରେ ଖୁସିର ମାହୋଲ ରହିଛି। ଏଥିପାଇଁ ସମସ୍ଥେ ଖୁସି ଥିବା କହିଛନ୍ତି ଗ୍ରାମବାସୀ।
