ମସ୍ତିଷ୍କକୁ ଦୁର୍ବଳ କରିପାରେ ଏଆଇ ବ୍ୟବହାର ! କମିପାରେ ଆଣଙ୍କର ବିଚାର କରିବା ଶକ୍ତି

ନୂଆଦିଲ୍ଲୀ ୨୨।୧୨;ପ୍ରାୟ ସବୁ କ୍ଷେତ୍ରରେ ଆର୍ଟିଫିସିଆଲ ଇଣ୍ଟେଲିଜେନ୍ସ ବା କୃତ୍ରିମ ବୁଦ୍ଧିମତ୍ତା (ଏଆଇ)ର ବ୍ୟବହାର ଦ୍ରୁତଗତିରେ ବଢ଼ିଚାଲିଛି । ସୃଜନଶୀଳତା ହେଉ କିମ୍ବା ଟେକ୍ନୋଲୋଜି, କଷ୍ଟରୁ କଷ୍ଟକର ପ୍ରଶ୍ନର ଉତ୍ତର ଏଆଇ ମାତ୍ର କିଛି ସେକେଣ୍ଡରେ ଦେବାକୁ ସକ୍ଷମ । ଏହାର ବ୍ୟବହାରରେ ମଣିଷ ନିଜର ସମୟ ଏବଂ ଶକ୍ତି ଉଭୟ ବଞ୍ଚାଇବାରେ ସଫଳ ହେଉଛି । କିନ୍ତୁ ଗଭୀରତାର ସହ ବିଶ୍ଲେଷଣ କଲେ ଏଆଇର ବ୍ୟବହାର ମଣିଷର ସୃଜନଶୀଳତା ହ୍ରାସ କରିବା ସହ ମସ୍ତିଷ୍କର ଉପଯୋଗ ମଧ୍ୟ କମାଉଛି । ଯଦି ପ୍ରତ୍ୟେକ କ୍ଷେତ୍ରରେ ମଣିଷ ମୁଣ୍ଡ ନ ଖଟାଇ ଏଆଇ ଦ୍ୱାରା କାମ ହାସଲ କରେ ତେବେ ଧିରେ ଧିରେ ଆମ ମସ୍ତିଷ୍କ ଦୁର୍ବଳ ହେବାର ଆଶଙ୍କା ରହିଥିବା ବିଶେଷଜ୍ଞମାନେ ସତର୍କ କରାଇଛନ୍ତି । ଚଳିତ ବର୍ଷ ପ୍ରାରମ୍ଭରେ ମାସାଚୁସେଟ୍ସ ଇନ୍ଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି(ଏମ୍ଆଇଟି)ଏକ ଅଧ୍ୟୟନ ରିପୋର୍ଟ ପ୍ରକାଶ କରିଥିଲା । ଏଥିରୁ ଜାଣିବାକୁ ମିଳିଥିଲା ଯେ ଯେଉଁମାନେ ପ୍ରବନ୍ଧ ଲେଖିବା ଲାଗି ଚାଟ୍ ଜିପିଟି କିମ୍ବା ଅନ୍ୟ ଏଆଇ ଟୁଲ୍ସ ବ୍ୟବହାର କରିଛନ୍ତି, ସେମାନଙ୍କ ମଧ୍ୟରେ ସେହି ସମୟରେ କଗ୍ନିଟିଭ୍ ପ୍ରକ୍ରିୟା ସହ ଜଡ଼ିତ ମସ୍ତିଷ୍କର ନେଟ୍ୱର୍କ ଗତିବିଧି କମିଛି । ଏହା ଦ୍ୱାରା ମଣିଷର ଶିଖିବା କ୍ଷମତା ଏବଂ ନୂଆ କିଛି ରଚନା କରିବାର ଦକ୍ଷତା ହ୍ରାସ ପାଇବାର ଆଶଙ୍କା ବଢ଼ିଛି । ଏହି ଅଧ୍ୟୟନରେ ୫୪ ଜଣଙ୍କୁ ସାମିଲ କରାଯାଇଥିଲା ।

କେତେକ ବିଶ୍ୱବିଦ୍ୟାଳୟରେ କାର୍ଯ୍ୟରତ କର୍ମଚାରୀଙ୍କ ମଧ୍ୟରୁ ସେମାନଙ୍କୁ ବଛା ଯାଇଥିଲା । ସେମାନଙ୍କ ମସ୍ତିଷ୍କର ଗତିବିଧିକୁ ଇସିଜି ଜରିଆରେ ରେକର୍ଡ କରାଯାଇଥିଲା । ଏହି ପ୍ରକ୍ରିୟା ବେଳେ ସେମାନଙ୍କ ମୁଣ୍ଡର ଚର୍ମରେ ଇଲେକ୍ଟ୍ରୋଡ୍ ଲଗାଯାଇଥିଲା । ପ୍ରତିଯୋଗୀମାନେ ଏଆଇ ଦ୍ୱାରା ପ୍ରବନ୍ଧ ଲେଖିବା, ପ୍ରଶ୍ନର ଉତ୍ତର ପ୍ରସ୍ତୁତ କରିବା, ତଥ୍ୟର ସ୍ରୋତ ଖୋଜିବା, ଭାଷା ଏବଂ ଶୈଳୀ ସୁଧାରିବା ଆଦି କାମ କରିଥିଲେ। ଏଆଇର ବ୍ୟବହାର ଆଇଡିଆ ସୃଷ୍ଟି କରିବା ଏବଂ ତାହାକୁ ବ୍ୟବସ୍ଥିତ କରିବା ଲାଗି ମଧ୍ୟ ବ୍ୟବହାର କରାଯାଇଥିଲା । କିନ୍ତୁ କିଛି ବ୍ୟବହାରକାରୀଙ୍କ ଅନୁସାରେ ସୃଜନଶୀଳତା କିମ୍ବା ଆଇଡିଆ ଖୋଜିବା ମାମଲରେ ଏଆଇ ସେତେମାତ୍ରାରେ ଦକ୍ଷ ହୋଇନାହିଁ । ଆଉ ଏକ ଅଧ୍ୟୟନରେ ଜାଣିବାକୁ ପାଇଛନ୍ତି ଯେ, ଯଦି ଲୋକେ ଏଆଇ ଉପରେ ଆବଶ୍ୟକତା ଠାରୁ ଅଧିକ ନିର୍ଭର କରନ୍ତି ତେବେ ସେମାନଙ୍କ ସମସ୍ୟା ସମାଧାନ କରିବା ଦକ୍ଷତା ଦୁର୍ବଳ ହୋଇପାରେ ।

ରିସର୍ଚ୍ଚରମାନେ ୩୧୯ ହ୍ୱାଇଟ କଲାର କର୍ମଚାରୀଙ୍କୁ ନେଇ ସର୍ଭେ କରିଥିଲେ, ଯେଉଁମାନେ କାମରେ ସପ୍ତାହେରୁ ବି କମ୍ ସମୟ ଭିତରେ ଅନ୍ୟୁନ ଥରେ ଏଆଇ ଟୁଲ୍ସର ବ୍ୟବହାର କରିଥାନ୍ତି । ଏଆଇ ବ୍ୟବହାର ବେଳେ ସେମାନେ କ୍ରିଟିକାଲ ଥିଙ୍କିଙ୍ଗ୍ (ଜଟିଳ ବା ଗଭୀର ଭାବେ ଚିନ୍ତା କରିବା)ର ବେଶ୍ କମ୍ ଉପଯୋଗ କରିଥାନ୍ତି । ଅଧ୍ୟୟନରେ ଏଆଇକୁ ଦିଆଯାଇଥିବା ଅଲଗା ଅଲଗା ୯୦୦ କାମକୁ ମଧ୍ୟ ବିଶ୍ଳେଷଣ କରାଯାଇଥିଲା । ସେହିପରି ଛାତ୍ରଛାତ୍ରୀମାନେ ଆରମ୍ଭରୁ ହିଁ ଏଆଇ ଉପରେ ନିର୍ଭରଶୀଳ ହେବା ସେମାନଙ୍କ ବିଚାର ତଥା ଚିନ୍ତା କରିବା ଦକ୍ଷତା ବିକାଶରେ ବାଧା ସୃଷ୍ଟି କରିପାରେ । ଏଆଇ ବ୍ୟବହାର ଦ୍ୱାରା କମ୍ ସମୟରେ ଉନ୍ନତ ତଥା ସହଜ ସମାଧାନ ଏବଂ ଉତ୍ତର ବାହାରି ପାରୁଥିଲେ ହେଁ ଏହା ଶିଖିବା ଦକ୍ଷତାକୁ ଦୁର୍ବଳ କରିବାର ଆଶଙ୍କା ରହିଥିବା କୁହାଯାଇଛି ।