ଭୁବନେଶ୍ୱର ୨୮।୮: ଭୁବନେଶ୍ବରରେ ଆୟୋଜିତ ହେଉଛି ଦୁଇ ଦିନିଆ ଅନୁସୂଚିତ ଜାତି ଓ ଜନଜାତି ଜାତୀୟ ସମ୍ମିଳନୀ । ଏହାକୁ ଉଦଘାଟନ କରିଛନ୍ତି ଲୋକସଭା ବାଚସ୍ପତି ଓମ୍ ବିର୍ଲା । ଏହାକୁ ନେଇ ବିରୋଧୀ ବିଜେଡି ଓ କଂଗ୍ରେସ କଟାକ୍ଷ କରିଥିବା ବେଳେ କଡା ଜବାବ ରଖିଛି ବିଜେପି ।
ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ କହିଛନ୍ତି, ଏ ସମ୍ମିଳନୀରେ ଜନଜାତିଙ୍କ ଉନ୍ନତି ପାଇଁ ଆଲୋଚନା ହେବ । ହେଲେ ଏହା କେତେ ଦୂର କାର୍ଯ୍ୟକାରୀ ହେଉଛି ତାହା ଜାଣିବା କଥା । ଆଦିବାସୀ ହରିଜନ ମାନଙ୍କୁ ଅବହେଳା କରୁଛନ୍ତି ସରକାର । ସବୁ ରାଜ୍ୟରେ ଏ କାର୍ଯ୍ୟକ୍ରମ ହୁଏ । ଏ ବର୍ଷ ଓଡ଼ିଶାରେ ହେଉଛି । କିନ୍ତୁ SC/STଙ୍କ ଉନ୍ନତି ପାଇଁ ସରକାରଙ୍କର ଆନ୍ତରିକତା ନାହିଁ ।
ବିଜେଡି ବିଧାୟକ ଅରୁଣ ସାହୁ କହିଛନ୍ତି, ଭୁବନେଶ୍ୱରରେ SC/ST ସଂସଦୀୟ ଜାତୀୟ ସମ୍ମିଳନୀ ଭଲ କଥା । ସମସ୍ତଙ୍କୁ ସ୍ୱାଗତ । ହେଲେ ବିଜେଡି ସ୍ୱର ଉଠାଇଥିଲା ଛାତ୍ରମାନଙ୍କୁ ବୈଷୟିକ ଶିକ୍ଷାରେ ସଂରକ୍ଷଣ ଦିଆଯାଉ, ତାହା ବି ଜନସଂଖ୍ୟା ଅନୁସାରେ ୩୯% SC STଙ୍କୁ ଓ OBCଙ୍କୁ ବି ଦିଆଯାଉ । ଯୁକ୍ତ ଦୁଇରେ ସଂରକ୍ଷଣ ଦେବେ କହୁଛନ୍ତି । ହେଲେ ଯୁକ୍ତ ଦୁଇରେ ସିଟ୍ ବଳୁଛି । ଏଠି ସଂରକ୍ଷଣର କି ଆବଶ୍ୟକ ? ବୈଷୟିକ ଶିକ୍ଷାରେ ସଂରକ୍ଷଣ ଦେଇ ସରକାର ଉଦାହରଣ ହୁଅନ୍ତୁ ବୋଲି ଅରୁଣ ସାହୁ କହିଛନ୍ତି ।
ସେହିଭଳି କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ୍ କହିଛନ୍ତି, ସମ୍ମିଳନୀ କରିବା ଭଲ କଥା । ହେଲେ ଆଦିବାସୀ ମାନଙ୍କ ପାଇଁ ଆସୁଥିବା ଟଙ୍କାକୁ ଡାଇଭର୍ଟ କରାଯାଉଛି । ଜଙ୍ଗଲ ଜମି ଅଧିକାର ଆକ୍ଟ ହୋଇଥିଲେ ମଧ୍ୟ ରାଜ୍ୟରେ ପେସା ରୁଲ୍ ଲାଗୁ ହୋଇପାରି ନାହିଁ । ରାଜ୍ୟରେ ଜାତି ଜନଜାତି ପାଇଁ ଥିବା ନିୟମ କାର୍ଯ୍ୟକାରୀ କଲେ ନାହିଁ । ଅନେକ ବିଭାଗ ଅତୀତରୁ ବର୍ତ୍ତମାନ ପର୍ଯ୍ୟନ୍ତ ବିନା ସଂରକ୍ଷଣରେ ନିଯୁକ୍ତି ଦିଆଯାଇଛି । ତେଣୁ ଅନେକ ସମସ୍ୟା ରହିଛି । ତାକୁ ଉଠାଇବା ଉଚିତ । ଏ ସମ୍ମିଳନୀ ରାଜ୍ୟରେ ପ୍ରଥମ ଥର ପାଇଁ ହେଉଛି । ଦେଶରେ ତୃତୀୟ ସର୍ବାଧିକ ଆଦିବାସୀ ଏଠି । ହେଲେ ଆଦିବାସୀଙ୍କ ପାଇଁ ଥିବା ସୁବିଧା ଠିକ୍ରେ ମିଳୁନାହିଁ । ଝାଡ଼ଖଣ୍ଡ ଓ ଛତିଶଗଡ଼ ପରି ସୁବିଧା ମିଳୁନାହିଁ । ଆଜି ଏସବୁ ସମ୍ପର୍କରେ ଆଲୋଚନା ହେବା ଉଚିତ ।
ବିରୋଧୀଙ୍କୁ କଡ଼ା ଜବାବ ଦେଇଛି ବିଜେପି । ବିଜେପି ବିଧାୟକ ଭାସ୍କର ମଢ଼େଇ କହିଛନ୍ତି, ଏହା ଅତ୍ୟନ୍ତ ଶୁଭର ଦିନ । ଜାତୀୟ ସ୍ତରର କାର୍ଯ୍ୟକ୍ରମ ରାଜ୍ୟରେ ହେବା ଗର୍ବର ବିଷୟ । ଏଥିପାଇଁ ରାଜ୍ୟରେ ଯେଉଁଠି ତ୍ରୁଟି ରହିଛି, ତାକୁ ସୁଧାରିବା । ଏଥିପାଇଁ ଦଳମତ ନିର୍ବିଶେଷରେ ଏକାଠି ହୋଇଛି । ଆଦିବାସୀ ସମାଜ ଏକ । ସବୁ ସମୟରେ କଂଗ୍ରେସ ରାଜନୀତି କଲେ କେମିତି ହେବ । ଗୋଟେ ସମାଜର ସ୍ଥିତି ପରିସ୍ଥିତିକୁ ଲକ୍ଷ୍ୟ କରି ଏଠି ରାଜନୀତି କରିବା କଥା ନୁହେଁ । ବିରୋଧୀ ସବୁ ଜାଗାରେ ରାଜନୀତି କରୁଛନ୍ତି । ରାଜନୀତିରୁ ଉର୍ଦ୍ଧ୍ବରେ ରହି ସବୁ କାମ କରିବା କଥା ।
You Can Read:
