ଭୁବନେଶ୍ଵର: ମ୍ୟାଚ୍ ବେଳେ ବାରବାଟୀରେ ଫ୍ଲଡ୍ ଲାଇଟ୍ ଲିଭିବାକୁ ନେଇ ସରଗରମ ହୋଇଛି ରାଜ୍ୟ ରାଜନୀତି । ଏହି ବିଭ୍ରାଟ ପାଇଁ ବିଜେଡି ଓ କଂଗ୍ରେସ ରାଜ୍ୟ ସରକାରଙ୍କୁ ଦାୟୀ କରିଛନ୍ତି । ବିଜେଡି କ୍ରୀଡାମନ୍ତ୍ରୀଙ୍କ ଇସ୍ତଫା ଦାବି କରିଛି । କଂଗ୍ରେସ କହିଛି ଏଥିପାଇଁ ଓଡ଼ିଶା ବିଶ୍ବ ଦରବାରରେ ନିନ୍ଦିତ ହେଲା । ତେଣୁ ଏଥିପାଇଁ ଯେଉଁମାନେ ଦାୟୀ ଚିହ୍ନଟ କରାଯାଇ ଦଣ୍ଡ ମିଳୁ । ଏହାର ଜବାବରେ ବିଜେପି ପୂର୍ବ ସରକାରକୁ ଦାୟୀ କରିଛି । ଦଳ କହିଛି ପୂର୍ବ ସରକାର ୨୪ ବର୍ଷ ଧରି କୌଣସି ବ୍ୟାକ ଅପ୍ ବ୍ୟବସ୍ଥା କିମ୍ବା ପାରଲାଲ ଇଲେକ୍ଟ୍ରି କନେକ୍ସନ୍ କାହିଁକି କରିନଥିଲେ। 

ବାରବାଟୀ ବିଭ୍ରାଟ, ଦାୟୀ କିଏ । ମ୍ୟାଚ୍ ଚାଲିଥିବା ବେଳେ ଫ୍ଲଡ ଲାଇଟ ବନ୍ଦ ହୋଇଯିବା ପରେ ତେଜିଲା ରାଜନୀତି । ବିଜେପି ଓ ବିଜେଡି ପରସ୍ପର ଉପରେ ଦୋଷ ଲଦିଛନ୍ତି । କ୍ରୀଡ଼ା ମନ୍ତ୍ରୀଙ୍କ ଇସ୍ତଫା ଦାବି କରିଛି ବିଜେଡି । ନୈତିକତା ଅଛି ଯଦି କ୍ରୀଡା ମନ୍ତ୍ରୀ ନିଜ ଉପରେ ପଦକ୍ଷେପ ନେଇ ଇସ୍ତଫା ଦିଅନ୍ତୁ । ସେ OCA କୁ କଣ ଜବାବ ମାଗୁଛନ୍ତି । BCCI, OCA ଉପରେ କାର୍ଯ୍ୟାନୁଷ୍ଠାନ ନିଆଯାଉ। କ୍ରୀଡା ମନ୍ତ୍ରୀ ଚାରି ଚାରି ଥର ବାରବାଟୀ ଯାଇ ସମୀକ୍ଷା କଲେ । ମୁଖ୍ୟମନ୍ତ୍ରୀ ବି ସମୀକ୍ଷା କଲେ । ହେଲେ ହେଲା କଣ ?  ମ୍ୟାଚ୍ ଆୟୋଜନ ପାଇଁ କିଛି ନୂଆ କରି ନାହାନ୍ତି । DG ସେଟ୍ ପ୍ରଥମରୁ ଶେଷ ଯାଏଁ ଅନ୍ ରହିବା ଦରକାର । ବନ୍ଦ ହେଲା କେମିତି ? ଓଡିଶା ସାରା ବିଶ୍ବରେ ନିନ୍ଦିତ ହୋଇଛି । କଂଗ୍ରେସ ବି ଏଥିପାଇଁ  ସରକାରଙ୍କୁ  ଦାୟୀ କରିଛି। ଯେଉଁମାନେ ଭୁଲ କରିଛନ୍ତି ଚିହ୍ନଟ କରାଯାଇ ତାଙ୍କୁ ଦଣ୍ଡ ମିଳୁ। ଲୋକଙ୍କୁ ଦେଇଥିବା ପ୍ରତିଶ୍ରୁତି ବିଜେପି ଭୁଲି ଯାଇଥିବାରୁ ଜଗନ୍ନାଥ ଏମାନଙ୍କୁ ଅଭିଶାପ ଦେଇଥିବା କଂଗ୍ରେସ କହିଛି । 

ସେପଟେ ବିରୋଧୀଙ୍କ ଅଭିଯୋଗର ଜବାବ ରଖିଛି ଶାସକ ଦଳ । ଫ୍ଲଡ ଲାଇଟ୍ ବିଭ୍ରାଟ ପାଇଁ ପୂର୍ବ ବିଜେଡ଼ି ସରକାରକୁ ଦାୟୀ କରିଛି ବିଜେପି । ବିଜେପି ବିଧାୟକ ପ୍ରକାଶ ସେଠୀ କହିଛନ୍ତି ସେମାନେ କାହିଁକି ପାରାଲାଲ କନେକ୍ସନ କରିନଥିଲେ । ୨୪  ବର୍ଷ ଧରି କାହିଁକି ବ୍ୟାକଅପ ବ୍ୟବସ୍ଥା କରିନଥିଲେ ପୂର୍ବ ବିଜେଡି ସରକାର । ୨୪ ବର୍ଷ ଧରି ବାରବାଟୀ ଷ୍ଟାଡିୟମ ଅବହେଳିତ ହୋଇ ପଡ଼ିରହିଥିଲା। ଏହା ଏକ ଦୁଃଖଦ ଘଟଣା । କିନ୍ତୁ ଘଟଣାକୁ କେହି ରୋକି ପାରିବେ ନାହିଁ । ୬ ମାସରେ ସରକାର କଣ ଷ୍ଟାଡିୟମକୁ  ନୂଆ କରିପାରିବେ କି ? କ୍ରୀଡା ମନ୍ତ୍ରୀଙ୍କ ଇସ୍ତଫା ଦାବି କରିବା ବିଜେଡିର ଡ୍ରାମା ବାଜି । ମ୍ୟାଚ ସଂପୂର୍ଣ୍ଣ ହୋଇପାରିନଥିଲେ ସମସ୍ୟା ହୋଇଥାନ୍ତା । କିନ୍ତୁ ମ୍ୟାଚ ସଂପୂର୍ଣ୍ଣ ହୋଇଛି  ବୋଲି ବୋଲି ପ୍ରକାଶ କହିଛନ୍ତି ।  ଦୀର୍ଘ ବର୍ଷ ପରେ କଟକ ବାରବାଟୀ ଷ୍ଟାଡିଏମକୁ ଦିନିକିଆ ମ୍ୟାଚ ଫେରିଥିଲା । ଆଉ ଏହି ବିଭ୍ରାଟ ଓଡିଶା ପାଇଁ ପୁଣି ନିନ୍ଦା ସୃଷ୍ଟି କରିଛି।