ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁକ୍ରବାର ଚନ୍ଦ୍ରଯାନ-୫ ମିଶନକୁ ନେଇ ବଡ଼ ଘୋଷଣା କରିଛନ୍ତି । ଭାରତୀୟ ମହାକଶ ଅନୁସନ୍ଧାନ ସଂଗଠନ (ଇସ୍ରୋ) ଓ ଜାପାନ ଏରୋସ୍ପେସ୍ ଏକ୍ସପ୍ଲୋରେସନ୍ ଏଜେନ୍ସି ମଧ୍ୟରେ ବୁଝାମଣା ଘୋଷଣା କରିଛନ୍ତି । ପ୍ରଧାନମନ୍ତ୍ରୀ କହିଛନ୍ତି, ଚନ୍ଦ୍ରଯାନ-୫ ମିଶନ ପାଇଁ ଇସ୍ରୋ ଓ ଜାପାନର JAXA ମଧ୍ୟରେ ସହଯୋଗକୁ ସ୍ୱାଗତ କରୁଛୁ । ଆମର ସକ୍ରିୟ ଭାଗିଦାରୀ ପୃଥିବୀର ସୀମା ବାହାରକୁ ଯାଇସାରିଛି ଓ ମହାକାଶରେ ମାନବଜାତିର ପ୍ରଗତିର ପ୍ରତୀକ ହେବ ।
ପ୍ରଧାନମନ୍ତ୍ରୀ ମୋଦୀ ଟୋକିଓରେ ନିଜ ଜାପାନ ସମକକ୍ଷ ଶିଗେରୁ ଇଶିବାଙ୍କ ସହ ବୈଠକ ପରେ ମିଳିତ ସାମ୍ୱାଦିକ ସମ୍ମିଳନୀରେ ଦୁଇ ଦେଶର ମହାକାଶ ଏଜେନ୍ସି ମଧ୍ୟରେ ପାର୍ଟନରଶିପ୍ ଘୋଷଣା କରିଛନ୍ତି । ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଆଗାମୀ ଦଶନ୍ଧି ପାଇଁ ସହଯୋଗର ରୋଡ୍ମ୍ୟାପ୍ ପ୍ରସ୍ତୁତ ହୋଇସାରିଛି । ଆଜି ଆମର ଆଲୋଚନା ସାର୍ଥକ ଓ ଉପଯୋଗୀ ହୋଇଛି । ପିଏମ୍ କହିଛନ୍ତି, ଆଗାମୀ ୧୦ ବର୍ଷରେ ଜାପାନଠାରୁ ଭାରତରେ ୧୦ ଟ୍ରିଲିୟନ୍ ୟେନ୍ ନିବେଶ ନେଇ ଲକ୍ଷ୍ୟ ରଖାଯାଇଛି ।
ପ୍ରଧାନମନ୍ତ୍ରୀ ଟୋକିଓରେ କହିଛନ୍ତି ଯେ ଭାରତ ଏବଂ ଜାପାନ ଏକ ମୁକ୍ତ, ଅବାଧ, ଶାନ୍ତିପୂର୍ଣ୍ଣ, ସମୃଦ୍ଧ ଏବଂ ନିୟମ ଆଧାରିତ ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ର ପାଇଁ ସମ୍ପୂର୍ଣ୍ଣ ପ୍ରତିବଦ୍ଧ । ପ୍ରତିରକ୍ଷା ଶିଳ୍ପ ଏବଂ ନବସୃଜନ କ୍ଷେତ୍ରରେ ସହଯୋଗକୁ ଆହୁରି ମଜଭୁତ କରିବାକୁ ଉଭୟ ପକ୍ଷ ନିଷ୍ପତ୍ତି ନେଇଛନ୍ତି । ମୋଦୀ କହିଛନ୍ତି, ଭାରତ ଏବଂ ଜାପାନ ଆତଙ୍କବାଦ ଓ ସାଇବର ସୁରକ୍ଷା ସମ୍ପର୍କରେ ସମାନ ଚିନ୍ତା ପ୍ରକଟ କରିଛନ୍ତି । ପ୍ରତିରକ୍ଷା ଏବଂ ସାମୁଦ୍ରିକ ସୁରକ୍ଷା ବଢାଇବାରେ ଉଭୟ ପକ୍ଷର ସମାନ ସ୍ୱାର୍ଥ ରହିଛି ।
ସେ କହିଛନ୍ତି, ଭାରତ-ଜାପାନ ସହଭାଗୀତା ପାରସ୍ପରିକ ବିଶ୍ୱାସ ଉପରେ ଆଧାରିତ । ଏହା ଆମର ଜାତୀୟ ପ୍ରାଥମିକତାକୁ ପ୍ରତିବିମ୍ୱିତ କରେ ଏବଂ ଆମର ସମାନ ମୂଲ୍ୟବୋଧ ଏବଂ ବିଶ୍ୱାସକୁ ଦର୍ଶାଏ । ଏହି ଅବସରରେ ଜାପାନ ପ୍ରଧାନମନ୍ତ୍ରୀ କହିଛନ୍ତି, ପରବର୍ତ୍ତୀ ପିଢ଼ିର ଆହ୍ୱାନକୁ ମୁକାବିଲା କରିବା ପାଇଁ ଉଭୟ ପକ୍ଷ ପରସ୍ପରର ଶକ୍ତିକୁ ଉପଯୋଗ କରିବା ଆବଶ୍ୟକ ।
