ବିଶ୍ୱକୁ ବ୍ୟାପିଥିଲା କାଦିରଙ୍କ ପରମାଣୁ ନେଟୱର୍କ, ସ୍ପଷ୍ଟ କଲେ ଆମେରିକା ଗୁଇନ୍ଦା ଅଧିକାରୀ

ନୂଆଦିଲ୍ଲୀ ୨୫/୧୧: ଆମେରିକାର CIAର ପୂର୍ବତନ ବରିଷ୍ଠ ଅଧିକାରୀ ଜେମ୍ସ ଲାଲର ପାକିସ୍ତାନୀ ବୈଜ୍ଞାନିକ ଡକ୍ଟର ଅବଦୁଲ କାଦିର ଖାନଙ୍କ ପରମାଣୁ ଚୋରା ଚାଲାଣ ନେଟୱାର୍କ ବିଷୟରେ ଅନେକ ଖୁଲାସା କରିଛନ୍ତି।ANI ସହିତ କଥାବାର୍ତ୍ତା କରି ଲାଲର ବ୍ୟାଖ୍ୟା କରିଛନ୍ତି ଯେ ଆମେରିକା ପ୍ରଥମେ ବିଶ୍ୱାସ କରୁଥିଲା ଯେ କାଦିର ଖାନ କେବଳ ପାକିସ୍ତାନ ପାଇଁ ପରମାଣୁ ବ୍ଲୁପ୍ରିଣ୍ଟ ବିକଶିତ କରୁଛନ୍ତି।

କିନ୍ତୁ ପରେ ଜଣାପଡିଲା ଯେ ସେ ଲିବିଆ ଏବଂ ଇରାନ ସମେତ ଅନେକ ଦେଶକୁ ଅବୈଧ ଭାବରେ ପରମାଣୁ ପ୍ରଯୁକ୍ତିବିଦ୍ୟା ଏବଂ ଅସ୍ତ୍ରଶସ୍ତ୍ର ସାମଗ୍ରୀ ବିକ୍ରି କରୁଥିଲେ। ଲାଲର କହିଛନ୍ତି, "ଆମେ ବହୁତ ବିଳମ୍ବରେ ଜାଣିଲୁ। ଆମେ ଜାଣି ନଥିଲୁ ଯେ ସେ ଏତେ ପ୍ରମୁଖ ଚୋରା ଚାଲାଣକାରୀ ସୃଷ୍ଟି ହେବେ।" ସରକାରୀ ସହଯୋଗ ସମ୍ପର୍କରେ ଲାଲର କହିଛନ୍ତି ଯେ ଖାନ କିଛି ପାକିସ୍ତାନୀ ଜେନେରାଲ ଏବଂ ରାଜନେତାଙ୍କୁ ଲାଞ୍ଚ ଦେଇଥିଲେ। ଲାଲର କହିଛନ୍ତି ଯେ CIA ମୁଖ୍ୟ ଜର୍ଜ ଟେନେଟ୍ ପୂର୍ବତନ ପାକିସ୍ତାନୀ ରାଷ୍ଟ୍ରପତି ପରଭେଜ ମୁଶାରଫଙ୍କୁ ଚୋରା ଚାଲାଣ ବିଷୟରେ ଜଣାଇଥିଲେ।

ଏହା ଶୁଣି ମୁଶାରଫ ବହୁତ ରାଗିଯାଇଥିଲେ । ଖାନଙ୍କୁ ମୌଖିକ ଭାବରେ ଗାଳି ଦେଲେ ଓ ତାଙ୍କୁ ହତ୍ୟା କରିବାକୁ ଧମକ ଦେଲେ । କାଦିର ଖାନ୍ ପାକିସ୍ତାନର କେତେକ ସେନା ଜେନେରାଲ ଓ ନେତାଙ୍କୁ ଏ ବାବଦରେ ଲାଞ୍ଚ ମଧ୍ୟ ଦେଉଥିଲେ । କାଦିର ଖାନ୍‌ଙ୍କୁ ପାକିସ୍ତାନ ପରମାଣୁ କାର୍ଯ୍ୟକ୍ରମର ଜନକ ବୋଲି କୁହାଯାଏ । ସେହିପରି କାଦିର ଖାନ୍‌ଙ୍କୁ ପରମାଣୁ ତସ୍କରି ନେଟୱର୍କ ଶେଷ କରିବାର ଶ୍ରେୟ ଲାଲରଙ୍କୁ ଦିଆଯାଇଥାଏ । ସାରା ବିଶ୍ୱରେ କାଦିର ଖାନଙ୍କ ନେଟୱର୍କ ଏତେ ବଡ଼ ଥିଲା ଯେ ପରମାଣୁ ବୋମା ବନାଇବା ଲାଗି ମେସିନ୍, ବ୍ଲୁ ପ୍ରିଣ୍ଟ, ସେଣ୍ଟ୍ରିଫ୍ୟୁଜ୍ ଏବଂୟୁରାନିୟମ ବିକଶିତ କରିବାର ଟେକ୍ନିକ୍କୁ ସେ ବେଆଇନ ଭାବେ ଅନେକ ଦେଶକୁ ବିକ୍ରି କରୁଥିଲେ ।

ଲାଲରଙ୍କ କହିବା କଥା, କାଦିର ନିଜ ଦମ୍‌ରେ ଦୁନିଆର ସବୁଠୁ ବଡ଼ ବିପଜ୍ଜନକପରମାଣୁ ବ୍ଲାକ୍ ମାର୍କେଟ ଚଲାଇଥିଲେ । ପ୍ରଥମେ ସିଆଇଏ ଭାବିଥିଲା ଯେ କାଦିର କେବଳ ପାକିସ୍ତାନ ପାଇଁ ସାମଗ୍ରୀ ଚୋରି କରୁଛନ୍ତି । କିନ୍ତୁ ୧୯୯୦ ଦଶକରେ ଜଣାପଡ଼ିଥିଲା ଯେ ସେ ପରମାଣୁ ଅସ୍ତ୍ରଶସ୍ତ୍ର ବିକୁଛନ୍ତି । ଜେମ୍ସ ଲଲରଙ୍କୁ କାଦିର ଖାନ୍ ନେଟୱର୍କରେ ପଶି କାମ କରିବାର ଗୁରୁଦାୟିତ୍ୱ ଦିଆଯାଇଥିଲା ।

ଲଲରଙ୍କ ଟିମ୍ ସ୍ୱିଜରଲ୍ୟାଣ୍ଡ, ଜର୍ମାନୀ, ଦୁବାଇ ଏବଂ ମାଲେସିଆରେ ନକଲି କମ୍ପାନୀ ବନାଇଥିଲେ ଯାହା କି ପୂରା ଅସଲି ଲାଗୁଥିଲା । ଏହି କମ୍ପାନୀଗୁଡ଼ିକ ପରମାଣୁ ଡିଭାଇସ୍ ବିକିବା କାମ କରୁଥିଲେ । କାଦିରଙ୍କ ଲୋକେ ଏହି କମ୍ପାନୀକୁ ଅସଲି ଭାବି ସେଠାରୁ ଉପକରଣ କ୍ରୟ କରିବାରେ ଲାଗିଲେ । ଏହା ମାଧ୍ୟମରେ ସିଆଇଏ କାଦିରଙ୍କ ନେଟୱର୍କରେ ପଶି ତଥ୍ୟ ସଂଗ୍ରହ କରିଥିଲା ।