ନୂଆଦିଲ୍ଲୀ ୨୪।୫: ସଂକଟଗ୍ରସ୍ତ ପେଟିଏମର ମୂଳ କମ୍ପାନୀ ୱାନ୯୭ କମ୍ୟୁନିକେସନ ତାଙ୍କର ୫ହଜାରରୁ ୬,୩୦୦ କର୍ମଚାରୀଙ୍କୁ ଚାକିରୀରୁ ଛଟେଇ କରିପାରନ୍ତି। ଅନ୍ୟପଟେ ପେଟିଏମ ସେୟାର ମଧ୍ୟ ୪.୫୫ ପ୍ରତିଶତ ହ୍ରାସ ପାଇ ୩୪୦.୦୫ ଟଙ୍କାକୁ ଖସି ଆସିଛି। ଗତ ୬ ମାସରେ ସେୟାର ମୂଲ୍ୟରେ ପାଖାପାଖି ୬୨ ପ୍ରତିଶତ ହ୍ରାସ ହେଲାଣି। ଏହି ଷ୍ଟକ୍ ବର୍ଷରେ ଏପର୍ଯ୍ୟନ୍ତ ୪୭ ପ୍ରତିଶତରୁ ଅଧିକ କମିଲାଣି। ଏଣୁ ଉପୁଜିଥିବା ପରିସ୍ଥିତିରେ କମ୍ପାନୀ କର୍ମଚାରୀ ଛଟେଇ କରିବାକୁ ନିଷ୍ପତ୍ତି ନେଇଛି।
କମ୍ପାନୀ ଚଳିତ ଆର୍ଥିକ ବର୍ଷରେ କର୍ମଚାରୀ ବାବଦ ବ୍ୟୟ ହ୍ରାସ କରିବାକୁ ଚାହୁଁଛି। ଫାଇନାନସିଆଲ ଏକ୍ସପ୍ରେସ୍ ରିପୋର୍ଟ ଅନୁସାରେ କମ୍ପାନୀ ତାଙ୍କ ୱାର୍କ ଫୋର୍ସରେ ୧୫ରୁ ୨୦ ପ୍ରତିଶତ କାଟ କରିପାରେ। ଏହାର ଅର୍ଥ କମ୍ପାନୀରେ କାମ କରୁଥିବା ମୋଟ କର୍ମଚାରୀଙ୍କ ମଧ୍ୟରୁ ୫୦୦୦-୬,୩୦୦ କର୍ମଚାରୀ ଛଟେଇ ହୋଇପାରନ୍ତି। ୱାନ୯୭ କମ୍ୟୁନିକେସନର ଟାର୍ଗେଟ୍ ୪୦୦ରୁ ୫୦୦ କୋଟି ଟଙ୍କା ସଞ୍ଚୟ କରିବା। ଏଣୁ ଏତେ ସଂଖ୍ୟକ କର୍ମଚାରୀ ଛଟେଇ କରିବାକୁ ଯୋଜନା କରିଛନ୍ତି।
୨୦୨୩ ଆର୍ଥିକ ବର୍ଷରେ ୱାନ୯୭ କମ୍ୟୁନିକେସନ ପେରୋଲରେ ହାରାହାରି ୩୨,୭୯୮ ଜଣ କର୍ମଚାରୀ କାମ କରୁଛନ୍ତି। ଏମାନଙ୍କ ମଧ୍ୟରୁ ୨୯,୫୦୩ ଜଣ ସକ୍ରିୟ ରୂପେ କାମ କରୁଥିବା ବେଳେ ଆର୍ଥିକ ବର୍ଷ ନିମନ୍ତେ ମୋଟ କର୍ମଚାରୀ ବ୍ୟୟ ବର୍ଷକୁ ବର୍ଷ ୩୪ ପ୍ରତିଶତ ବୃଦ୍ଧି ହୋଇ ୩,୧୨୪ କୋଟି ଟଙ୍କା ହୋଇଯାଇଥିଲା। ଏହି ରିପୋର୍ଟ ଅନୁସାରେ ଗତ ଡିସେମ୍ବର ମାସରେ ୧୦୦୦ରୁ ଅଧିକ କର୍ମଚାରୀଙ୍କୁ ବରଖାସ୍ତ କରି କମ୍ପାନୀ କର୍ମଚାରୀ ହ୍ରାସ ପ୍ରକ୍ରିୟା ଆରମ୍ଭ କରିସାରିଛି।
ଉଲ୍ଲେଖଯୋଗ୍ୟ ଯେ ଚତୁର୍ଥ ତ୍ରୈମାସିକରେ ପେଟିଏମର ୫୫୦ କୋଟି ଟଙ୍କାର ନେଟ୍ ଲସ୍ ହୋଇଛି, ତେବେ ଗତବର୍ଷ ଏହା ମାତ୍ର ୧୬୮ କୋଟି ଟଙ୍କା ଥିଲା। ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ) ପେଟିଏମ ପେମେଣ୍ଟସ୍ ବ୍ୟାଙ୍କ କଟକଣା ଲାଗୁ କରିବା ପରେ ମାର୍ଚ୍ଚ ତ୍ରୈମାସିକରେ କମ୍ପାନୀର ଅପରେସନ ରେଭିନ୍ୟୁ ବାର୍ଷିକ ଆଧାରରେ ୩ ପ୍ରତିଶତ ହ୍ରାସ ହୋଇ ୨,୨୬୭ କୋଟିକୁ ଚାଲି ଆସିଛି। ଏଥିରେ ପେଟିଏମ ସିଇଓ ଆଶା କରନ୍ତି ଯେ ଆରବିଆଇ ଦ୍ୱାରା ତାଙ୍କ ସହଯୋଗୀ ପେଟିଏମ ପେମେଣ୍ଟସ୍ ବ୍ୟାଙ୍କ ଉପରେ ନିଷିଦ୍ଧାଦେଶ ପରେ କମ୍ପାନୀର ରାଜସ୍ୱ ଓ ପ୍ରଫିଟେବିଲିଟି ଉପରେ ପ୍ରଭାବ ପଡିପାରେ।
