ଇନ୍ଦୋର: ଯନ୍ତ୍ରଣା ସହି ହେଉନି। କେତେ ଦିନ ବା ପଡିରହିବି। ହ୍ୱିଲ ଚେୟାର କଣ ମୋର ଜୀବନ। ଯେଉଁ ହାତ ସ୍କୁଲ ପିଲାଙ୍କ ଆଶାର କିରଣ ସାଜିଥିଲା… ଆଜି ସେହି ହାତ ପଙ୍ଗୁ ହୋଇଯାଇଛି। ଜୀବନ ରଖି କି ଲାଭ ? କୁମାରୀ ଚନ୍ଦ୍ରକାନ୍ତ ଜେଠାନୀ ନାମକ ଜଣେ ଶିକ୍ଷୟିତ୍ରୀ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଠାରୁ ଇଚ୍ଛାମୃତ୍ୟୁ ଦାବି କରିଛନ୍ତି। ମଧ୍ୟପ୍ରଦେଶର ଇନ୍ଦୋରରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଏଠାରେ ଶିକ୍ଷୟିତ୍ରୀ ଇନ୍ଦୋରର ଏକ ସରକାରୀ ସ୍କୁଲରେ ପାଠପଢ଼ନ୍ତି ଏବଂ ଗତ କିଛି ବର୍ଷ ଧରି ପ୍ରବଳ ଶାରୀରିକ ଯନ୍ତ୍ରଣା ଭୋଗୁଛନ୍ତି।
କୁମାରୀ ଚନ୍ଦ୍ରକାନ୍ତ ଇନ୍ଦୋରର ଏକ ସରକାରୀ ସ୍କୁଲରେ ଶିକ୍ଷୟିତ୍ରୀ। ସେ ବହୁ ବର୍ଷ ଧରି ଶିକ୍ଷୟିତ୍ରୀ ଭାବରେ କାର୍ଯ୍ୟ କରୁଛନ୍ତି। ଶାରୀରିକ ଯନ୍ତ୍ରଣା ସତ୍ତ୍ୱେ, ସେ ପିଲାମାନଙ୍କୁ ପାଠ ପଢ଼ାଉଛନ୍ତି। ସେ କହିଛନ୍ତି ଯେ ପ୍ରାୟ ୫ ବର୍ଷ ପୂର୍ବେ ଜଣେ ଅସ୍ଥିଶଲ୍ୟ ଡାକ୍ତର ତାଙ୍କର ଭୁଲ ଚିକିତ୍ସା କରିଥିଲେ। ଯାହାର ପରିଣାମ ସେ ଏବେ ବି ଭୋଗୁଛନ୍ତି। ସେ କହିଛନ୍ତି ଯେ ସେ ଆତ୍ମହତ୍ୟା କରିବେ ନାହିଁ, କିନ୍ତୁ ରାଷ୍ଟ୍ରପତିଙ୍କ ନିକଟରେ ଇଚ୍ଛାମୃତ୍ୟୁ ପାଇଁ ତାଙ୍କର ଇଚ୍ଛା ପ୍ରକାଶ କରିଛନ୍ତି।
ଚନ୍ଦ୍ରକାନ୍ତ ଆହୁରି କହିଛନ୍ତି ଯେ ଭୁଲ ଚିକିତ୍ସା ଯୋଗୁଁ ତାଙ୍କ ଶରୀରର ତଳ ଅଂଶ ପାରାଲିସିସ ହୋଇଛି। ଶରୀରର ନିମ୍ନ ଅଂଶ ପାରାଲିସିସ ପରେ ମଧ୍ୟ ସେ ପ୍ରତିଦିନ ହ୍ୱିଲଚେୟାରରେ ସ୍କୁଲକୁ ଯାଆନ୍ତି। ପ୍ରତିଦିନ ସ୍କୁଲ ଯିବା ଯୋଗୁଁ ତାଙ୍କୁ ୭-୮ ଘଣ୍ଟା ହ୍ୱିଲଚେୟାରରେ ବିତାଇବାକୁ ପଡ଼େ। ଯାହା ଫଳରେ ତାଙ୍କୁ ପ୍ରବଳ ଶାରୀରିକ ଯନ୍ତ୍ରଣା ସହିବାକୁ ପଡ଼େ। ଇଚ୍ଛାମୃତ୍ୟୁ ଦାବି କରି ଚନ୍ଦ୍ରକାନ୍ତ ଆହୁରି କହିଛନ୍ତି ଯେ ସେ ତାଙ୍କର ସମ୍ପୂର୍ଣ୍ଣ ସମ୍ପତ୍ତି ସ୍କୁଲର ୬ ପିଲାଙ୍କୁ ହସ୍ତାନ୍ତର କରିଛନ୍ତି।
କେବଳ ସେତିକି ନୁହେଁ ସେ ତାଙ୍କର ସମ୍ପୂର୍ଣ୍ଣ ଶରୀର MGM ମେଡିକାଲ କଲେଜକୁ ଦାନ କରିଛନ୍ତି। ତାଙ୍କର ଏହି ଅବସ୍ଥା ଦେଖି ଚନ୍ଦ୍ରକାନ୍ତ କହିଛନ୍ତି ଯେ ସେ ଆତ୍ମହତ୍ୟା କରିବେ ନାହିଁ। ସେ କହିଛନ୍ତି ଯେ ମୁଁ ପିଲାମାନଙ୍କୁ ଭୁଲ କାମ କରିବାକୁ ପ୍ରେରଣା ଦେବାକୁ ଚାହୁଁନାହିଁ। ଯଦି ମୁଁ ଆତ୍ମହତ୍ୟା କରେ, ତେବେ ପିଲାମାନେ ଶିକ୍ଷକଙ୍କ ଉପରେ ବିଶ୍ୱାସ ହରାଇବେ। ମୋର ଶରୀରର ଅଙ୍ଗ ଅଭାବୀ ଲୋକଙ୍କ ପାଇଁ କୋହିନୂର ଅପେକ୍ଷା ଅଧିକ ମୂଲ୍ୟବାନ। ମୋ ମୃତ୍ୟୁ ପରେ ମଧ୍ୟ ମୁଁ କାହାର ଉପଯୋଗୀ ହେବାକୁ ପସନ୍ଦ କରିବି।
