ପରିବାର ପାଇଁ ଛାଡିଦେଲେ ଚାକିରି, ଏବେ ଏପରି କରୁଛନ୍ତି ମୋଟା ରୋଜଗାର

ନୂଆଦିଲ୍ଲୀ ୧୭।୧୦: ବର୍ତ୍ତମାନ ସମୟରେ ଲୋକ ଚାକିରୀ ଏବଂ ରୋଜଗାର ସହିତ ପରିବାରକୁ ଟାଇମ ଦେବାକୁ ଫୋକସ୍‌ କରୁଛନ୍ତି । କିନ୍ତୁ କର୍ପୋରେଟ ଚାକିରୀରେ ଏପରି କରିବା ଅସମ୍ଭବ । କେତେବେଳେ ଛୁଟି ପାଇବା କଷ୍ଟକର, ଆଉ କେତେବେଳେ ଅଫିସ୍ ସମୟ ପରେ ମଧ୍ୟ କାମ ଶେଷ ହୁଏ ନାହିଁ। ବେଙ୍ଗାଲୁରୁର ଦୀପେଶଙ୍କର ମଧ୍ୟ ସମାନ କାହାଣୀ ଥିଲା। ଶେଷରେ ଦିନେ ଏହି ଅଶାନ୍ତି ଭରା ଜୀବନରୁ ବିରକ୍ତ ହୋଇ ସେ ଚାକିରି ଛାଡିବାକୁ ନେଇଥିଲେ ନିଷ୍ପତ୍ତି ।

ସେ କର୍ପୋରେଟ ସେକ୍ଟରରେ କରୁଥିଲେ ଚାକିରୀ । ମାସକୁ ଦରମା ଥିଲା ୪୦ ହଜାର । କିନ୍ତୁ ଏହି ଚାକଚକ୍ୟ ଭରା ଚାକିରୀ ତାଙ୍କୁ ଶାନ୍ତି ଦେଇ ପାରନଥିଲା । ସେ ଚାକିରୀ ଛାଡିଦେଇଥିଲେ । ଆଉ ପାଲଟିଥିଲେ କ୍ୟାବ୍‌ ଡ୍ରାଇଭର । ଏହି ବ୍ୟକ୍ତି ଜଣକ ହେଉଛନ୍ତି ବେଙ୍ଗାଲୁରୁର ବାସିନ୍ଦା । ନାଁ ହେଉଛି ଦୀପେଶ । ତାଙ୍କ କାହାଣୀ ଏବେ ସୋସିଆଲ ମିଡିଆରେ ହେଉଛି ଭାଇରାଲ । ବାସ୍ତବରେ ଦୀପେଶ ତାଙ୍କ ଅତ୍ୟଧିକ କାମ କାରଣରୁ ସେ ସ୍ତ୍ରୀ ଏବଂ ପିଲାମାନଙ୍କୁ ଅଧିକ ସମୟ ଦେଇପାରୁନଥିଲେ । ତାଙ୍କ ପାଇଁ ଓ୍ବାର୍କ-ଲାଇଫ ବାଲାନ୍ସ କରିବା କଷ୍ଟକର ହୋଇପଡିଥିଲା । ଏଥିପାଇଁ ସେ ଚାକିରି ଛାଡି ଦେଲେ ଏବଂ କ୍ୟାବ୍ ଚଲାଇବା ଆରମ୍ଭ କଲେ।

ଦୀପେଶ ବେଙ୍ଗାଲୁରୁରେ ଏକ କମ୍ପାନୀରେ କାମ କରୁଥିଲେ । ସେ ଅଭିଯୋଗ କରିଥିଲେ ଯେ ସେ ଅଫିସ୍ ସମୟ ପରେ ମଧ୍ୟ ସବୁବେଳେ କାମରେ ବ୍ୟସ୍ତ ରହୁଥିଲେ । ଏମିତିକି ତାଙ୍କ ସ୍ତ୍ରୀ ଏବଂ ପିଲାମାନଙ୍କ ପାଇଁ ସମୟ ଦେବା କଷ୍ଟକର ହୋଇପଡୁଥିଲା। ସେ ସେହି କମ୍ପାନୀରେ ୮ ବର୍ଷ କାମ କରିଥିଲେ । ଏତେ ପରେ ବି ତାଙ୍କର ଦରମା ୪୦ ହଜାର ଟଙ୍କାରେ ପହଞ୍ଚିଥିଲା। ତେଣୁ ସେ ଚାକିରି ଛାଡି ଏକ ଫୁଲ ଟାଇମ୍‌ ଡ୍ରାଇଭର ହେବାକୁ ନିଷ୍ପତ୍ତି ନେଇଥିଲେ । ବର୍ତ୍ତମାନ ସେ ଅଧିକ ରୋଜଗାର କରୁଛନ୍ତି । ଏମିତିକି ତାଙ୍କ ପରିବାର ପାଇଁ ସମୟ ଦେଇପାରୁଛନ୍ତି ।

ଦୀପେଶ ମାସକୁ କେବଳ ୨୧ ଦିନ କାମ କରନ୍ତି । ସେ ନିଜର ଛୁଟି ଦିନ ମଧ୍ୟ ନିର୍ଦ୍ଦିଷ୍ଟ କରିଛନ୍ତି । ଏବେ ତାଙ୍କ ପାଖରେ ପରିବାର ସହିତ ବିତାଇବା ପାଇଁ ବାକି ସମୟ ଅଛି । ଯାହା ପୂର୍ବରୁ ସମ୍ଭବ ନଥିଲା । କ୍ୟାବ୍ ଚଲାଇ ମାସକୁ ପ୍ରାୟ ୫୬ ହଜାର ଟଙ୍କା ରୋଜଗାର କରୁଛନ୍ତି । ସେ ଏହି ଆୟରୁ ଭଲ ପରିମାଣର ସଞ୍ଚୟ ମଧ୍ୟ କରୁଛନ୍ତି । ଏହି ଆୟ ସହିତ ସେ ଆଉ ଏକ କାର କିଣିଛନ୍ତି ଏବଂ ଏହାକୁ ଚଲାଇବା ପାଇଁ ଜଣେ ଡ୍ରାଇଭରଙ୍କୁ ନିଯୁକ୍ତି ଦେଇଛନ୍ତି । ବର୍ତ୍ତମାନ ଦୀପେଶ ଆଗକୁ ବଢିବାକୁ ଚେଷ୍ଟା କରୁଛନ୍ତି । ଦୀପେଶଙ୍କ କାହାଣୀ ପ୍ରତ୍ୟେକ ବ୍ୟକ୍ତିଙ୍କ ପାଇଁ ବର୍ତ୍ତମାନ ପ୍ରେରଣା ପାଲଟିଛି ।