ହରମନପ୍ରିତ୍ ଅଧିନାୟକ ପଦ ଛାଡିବା ଆବଶ୍ୟକ : ପୂର୍ବତନ କ୍ୟାପ୍ଟେନ୍ ଦେଲେ ପରାମର୍ଶ

ନୂଆଦିଲ୍ଲୀ,  ୦୪ |୧୧  ଦକ୍ଷିଣ ଆଫ୍ରିକାକୁ ହରାଇ ମହିଳା ବିଶ୍ବକପ୍ ଟାଇଟଲ୍ ଜିତିଛି ଟିମ୍ ଇଣ୍ଡିଆ । ରବିବାର ଆୟୋଜିତ ମୁକାବିଲାରେ ଟିମ୍ ଇଣ୍ଡିଆ ମୁମ୍ବାଇର ଡିଓ୍ୱାଇ ପାଟିଲ୍ ଷ୍ଟାଡିୟମରେ ଦକ୍ଷିଣ ଆଫ୍ରିକାକୁ ୫୨ ରନରେ ପରାସ୍ତ କରିଛି । ତେବେ ମୁକାବିଲା ଖୁବ୍ ରୋମାଞ୍ଚକର ଥିଲା । ଭାରତୀୟ ଦଳର ସବୁ ପ୍ଲେୟର ଦମଦାର ପ୍ରଦର୍ଶନ କରିଥିଲେ । ଉଭୟ ବ୍ୟାଟିଂ ଓ ବୋଲିଂରେ ସେମାନେ ନିଜର ଦମ୍ ଦେଖାଇଥିଲେ । ଫଳରେ ପ୍ରଥମ ଥର ପାଇଁ ବିଶ୍ୱ ବିଜେତା ହୋଇ ପାରିଥିଲା ଟିମ୍ ।

ଟ୍ରଫି ଜିତିବା ପରେ ସବୁଠୁ ବେଶୀ ଚର୍ଚ୍ଚାରେ ଥିଲେ ଅଧିନାୟକ ହରମନପ୍ରିତ କୌର୍ । ଆଇସିସି ଚେୟାରମ୍ୟାନ୍ ଜୟ ଶାହଙ୍କଠୁ ସେ ଟ୍ରଫି ଗ୍ରହଣ କରିବା ସହ ପାଦ ଛୁଇଁ ଆଶୀର୍ବାଦ ନେଇଥିଲେ । ଏହାସହ ପ୍ରଥମ ଅଧିନାୟକ ଭାବେ ଦଳକୁ ଜିତାଇବାରେ ନେଇଥିଲେ ଗୁରୁତ୍ୱପୂର୍ଣ୍ଣ ଭୂମିକା । କିନ୍ତୁ ବିଶ୍ବକପ୍ ହାତେଇବା ପରେ ହରମନପ୍ରିତ ଅଧିନାୟକ ପଦ ଛାଡିଦେବା ଜରୁରୀ ବୋଲି କହିଛନ୍ତି ପୂର୍ବତନ ମହିଳା ଟିମ୍ ଅଧିନାୟକ ଶାନ୍ଥା ରଙ୍ଗାସ୍ବାମୀ । ସେ କହିଛନ୍ତି ଯେ, ଏହା ହେଉଛି ଅଧିନାୟକ ପଦ ଛାଡିବା ପାଇଁ ଉପଯୁକ୍ତ ସମୟ । ତାଙ୍କ ଜାଗାରେ ସ୍ମୃତି ମନ୍ଧାନା ଦଳର ନେତୃତ୍ୱ ନେଲେ ଖୁବ୍ ଭଲ ହେବ ।

ଗଣମାଧ୍ୟମକୁ ସାକ୍ଷାତକାର ଦେଇ ଶାନ୍ଥା କହିଛନ୍ତି ଯେ, ଭବିଷ୍ୟତକୁ ଆଖି ଆଗରେ ରଖି ଦଳ କିଛି ବଡ ନିଷ୍ପତ୍ତି ନେବା ଆବଶ୍ୟକ । ୨୦୨୯ ବିଶ୍ବକପ୍ ପାଇଁ ଏବେଠୁ ପ୍ରସ୍ତୁତି ଆରମ୍ଭ କରାଯିବା ଆବଶ୍ୟକ । ହରମନପ୍ରିତ ଜଣେ ଭଲ ଅଧିନାୟକ । ସେ ଭଲ ଫର୍ମରେ ଅଛନ୍ତି । ତାଙ୍କର ଫିଟନେସ୍ ମଧ୍ୟ ରହିଛି ।  ଆହୁରି କିଛି ବର୍ଷ ସେ ଆରାମରେ କ୍ରିକେଟ୍ ଖେଳିପାରିବେ । ଅଧିନାୟକ ପଦ ଛାଡି ବ୍ୟାଟିଂ ଉପରେ ଏବେ ହରମନପ୍ରିତ ଫୋକସ ଦେବା ଜରୁରୀ ବୋଲି କହିଛନ୍ତି ରଙ୍ଗାସ୍ବାମୀ ।

ସେ ଆହୁରି କହିଛନ୍ତି ଯେ, ସ୍ମୃତି ଭାରତୀୟ ଦଳ ପାଇଁ ପରଫେକ୍ଟ ଅଧିନାୟକ ହୋଇପାରିବେ । ତାଙ୍କୁ ଏବେ ୨୯ ବର୍ଷ ବୟସ ହୋଇଛି । ସବୁ ଫର୍ମାଟରେ ଦଳର ନେତୃତ୍ ନେବା ପାଇଁ ସେ ଫିଟ୍ । ଏପରିକି ସ୍ମୃତିଙ୍କ ପାଖରେ ଦଳର ନେତୃତ୍ୱ ନେବାକୁ ସମସ୍ତ ଗୁଣ ରହିଛି । ଆଗାମୀ କିଛି ବର୍ଷ ସେ ଏହି ଭାର ତୁଲାଇପାରିବେ । ଏହାସହ ରୋହିତ ଶର୍ମାଙ୍କ କ୍ଷେତ୍ରରେ ମଧ୍ୟ ଚୟନକର୍ତ୍ତା ଏପରି ପଦକ୍ଷେପ ନେଇଥିବା ରଙ୍ଗାସ୍ବାମୀ କହିଛନ୍ତି ।