୪୫ ବର୍ଷ ପରେ ଧରା ପଡିଲା ଚୋର, ୧୦୦ ଟଙ୍କାର ଗହମ ଲୁଟି ଛାଡିଦେଇଥିଲା ଗାଁ, କିନ୍ତୁ...

ନୂଆଦିଲ୍ଲୀ, ୧୦|୦୨ : ଫେରାର ହେବାର ୪୫ ବର୍ଷ ପରେ ମଧ୍ୟପ୍ରଦେଶର ଖରଗୋନ ଜିଲ୍ଲାର ଜଣେ ୬୫ ବର୍ଷୀୟ ବ୍ୟକ୍ତି ଏକ ଚୋରି ଅଭିଯୋଗରେ ଗିରଫ ହୋଇଛନ୍ତି । ଏତେ ଛୋଟ ଜିନିଷ ଚୋରି ହୋଇଥିଲା ଯେ ଲୋକେ କେବେଠୁ ତାକୁ ଭୁଲିଯାଇଥିଲେ । ତଥାପି ଆଇନର ଲମ୍ବା ହାତ ଦୀର୍ଘ ଦଶନ୍ଧି ପରେ ବି ଚୋରକୁ ଧରିବାରେ ସଫଳ ହୋଇଛି ।

ମାମଲା ୧୯୮୦ ମସିହାର । ବାଲକାୱଡ଼ା ଥାନା ଅଧୀନସ୍ଥ ବଲଖଡ଼ ଗାଁ ନିକଟସ୍ଥ ବାଲସମୁନ୍ଦ କାକଡ଼ ଅଞ୍ଚଳରେ ସଲିମଙ୍କ ସମେତ ୭ ଜଣ ଯୁବକ ଦିନେ ରାତିରେ କ୍ଷେତରେ ପଶି ମାତ୍ର ୧୦୦ ଟଙ୍କା ମୂଲ୍ୟର ଗହମ ଚୋରି କରିଥିବା ଅଭିଯୋଗ ହୋଇଥିଲା । ସେତେବେଳେ ୧ କ୍ୱିଣ୍ଟାଲ ଭଲ ଗୁଣବତ୍ତା ଗହମର ମୂଲ୍ୟ ପ୍ରାୟ ୧୧୫ ଟଙ୍କା ଥିଲା । ସେମାନେ ଚୋରି କରିଥିବା ଗହମରେ ଗୋଟିଏ ଛୋଟ ବସ୍ତା ଭରିଥିଲା, ଯାହା କିଛି କିଲୋ ହୋଇଥିବ । ସେତେବେଳେ ୨୦ ବର୍ଷୀୟ ସଲିମଙ୍କ ପାଇଁ ଏହି ଚୋରି ତରବରିଆ ଭାବେ କରିଥିବା କାର୍ଯ୍ୟ ଥିଲା । ଯୁବ ବୟସରେ ଏଭଳି ଏକ ତ୍ରୁଟି, ଯାହା ତାଙ୍କ ଆବଶ୍ୟକତା କିମ୍ବା ଦୁଷ୍ଟାମିର ପରିଣାମ ଥିଲା ।

ଏହି ଖବରଟି ପଢନ୍ତୁ...  ବାଚସ୍ପତିଙ୍କୁ ଚିଠି ଲେଖିଲେ ପ୍ରିୟଙ୍କାଙ୍କ ସହ ୬ ମହିଳା ସାଂସଦ, କହିଲେ- 'ସରକାର ଚାପ ପକାଉଛନ୍ତି, ଆମକୁ ନ୍ୟାୟ ଦିଅ...'

ସେତେବେଳେ ଏଭଳି ଅପରାଧ କରି ତୁରନ୍ତ ଗାଏବ ହୋଇଗଲେ, ଦଣ୍ଡ ମିଳୁନଥିଲା । ସଲିମ ଓ ତାଙ୍କ ପରିବାର ତାହା ହିଁ କରିଥିଲେ । ଏହି ଅପରାଧ ପରେ ସେମାନେ ତୁରନ୍ତ ଗାଁ ଛାଡ଼ି ଦେଇଥିଲେ । ପଡ଼ୋଶୀ ଧର୍ ଜିଲ୍ଲାର ବାଗ୍ ଅଞ୍ଚଳରେ ସଲିମ ନିଜର ନୂଆ ଜୀବନ ଆରମ୍ଭ କରିଥିଲେ । ସେଠାରେ ସ୍ୱାଭାବିକ ଜୀବନ ବିତାଇବା ସହିତ ଏକ ଛୋଟ ଦୋକାନ ମଧ୍ୟ ଚଳାଇଲେ । ଦୀର୍ଘ ଦଶନ୍ଧି ଧରି ପରିବାର ସହିତ ସାଧାରଣ ଜୀବନଯାପନ କରୁଥିବା ସଲିମଙ୍କ ଧାରଣା ଥିଲା, ସେଇ ରାତିର ଅପରାଧର ଛାଇ ସମୟ ସ୍ରୋତରେ ମିଳେଇ ଯାଇଛି । କିନ୍ତୁ ପୁଲିସର ଆଧୁନିକ ଯାଞ୍ଚ୍ ପ୍ରଣାଳୀ ପାଇଁ ଦୀର୍ଘ ୪ ଦଶନ୍ଧିରୁ ଉର୍ଦ୍ଧ୍ୱ ପୁରୁଣା ଏହି ମାମଲା ପୁଣି ଉଜାଗର ହୋଇଛି ।

ମଧ୍ୟପ୍ରଦେଶ କର୍ତ୍ତୃପକ୍ଷ ଦୀର୍ଘ ସମୟ ଧରି ପଡ଼ି ରହିଥିବା ଛୋଟ-ବଡ଼ ସମସ୍ତ ପ୍ରକାର ଅପରାଧ ମାମଲାର ସମାଧାନ ଲାଗି ରାଜ୍ୟବ୍ୟାପୀ ଅଭିଯାନ ଆରମ୍ଭ କରିଛନ୍ତି । ଗତ ଜାନୁଆରୀ ୧ରୁ ୩୧ ତାରିଖ ଯାଏ ଚାଲିଥିବା ଏକ ସ୍ୱତନ୍ତ୍ର ଅଭିଯାନ ଏଥିରେ ମୁଖ୍ୟ ଭୂମିକା ନିର୍ବାହ କରିଥିଲା । ଏହି ଅବଧିରେ ଯାଞ୍ଚ୍କର୍ତ୍ତା ପୁରୁଣା ୱାରେଣ୍ଟ ଓ ସମାଧାନ ହୋଇନଥିବା ମାମଲାଗୁଡ଼ିକର ଫାଇଲ ପୁନଃ ଖୋଲିଥିଲେ । ସଲିମଙ୍କର ଜଣେ ପୁରୁଣା ସାଥୀ ତାଙ୍କ ବର୍ତ୍ତମାନ ସ୍ଥିତି ବିଷୟରେ ପୁଲିସକୁ ଗୁରୁତ୍ୱପୂର୍ଣ୍ଣ ସୂଚନା ଦେବା ପରେ ଖାଲଟାକା ପୁଲିସ ତାଙ୍କୁ ଗିରଫ କରିଛି ।