ଭୁବନେଶ୍ଵର: ହାଇ ଆଲର୍ଟରେ ଓଡିଶା । ସେନା ପ୍ରତିଷ୍ଠାନ, ମନ୍ଦିର, ବନ୍ଦର ଠାରୁ ଆରମ୍ଭ କରି ଉପକୂଳ ସୁରକ୍ଷା କଡାକଡି କଲେ ଓଡିଶା ସରକାର । ଏନେଇ ଜିଲ୍ଲା ସ୍ତରଠାରୁ ରାଜ୍ୟସ୍ତର ଯାଏ ଘନଘନ ବୈଠକ ବସିଛି । ମୁଖ୍ୟମନ୍ତ୍ରୀ ମୋହନ ମାଝି ରାଜ୍ୟର ସୁରକ୍ଷା ବ୍ୟବସ୍ଥାର ସମୀକ୍ଷା କରିଛନ୍ତି । ଜିଲ୍ଲାସ୍ତତରରେ ଏସପି ଓ ଜିଲ୍ଲାପାଳ ମାନେ ସୁରକ୍ଷା ବ୍ୟବସ୍ଥା ତଦାରଖ କରିଛନ୍ତି । ଚାନ୍ଦିପୁର କ୍ଷେପଣାସ୍ତ ଘାଟିର ସୁରକ୍ଷା ପାଇଂ ସ୍ବତନ୍ତ୍ର ଧ୍ୟାନ ଦେଇଛନ୍ତି ସରକାର ।

ଭାରତ ପାକିସ୍ଥାନ ମୁହାଁମୁହିଁ ସ୍ଥିତିକୁ ନେଇ ସାରା ଓଡିଶାରେ ହାଇ ଆଲର୍ଟ। ଓଡିଶା ସରକାରଙ୍କ ଘନଘନ ବୈଠକ ଓ ସୁରକ୍ଷା ପ୍ରସ୍ତୁତି। ଗୁରୁତ୍ବପୂର୍ଣ୍ଣ ସ୍ଥାନ, ସେନା ପ୍ରତିଷ୍ଠାନ, ମନ୍ଦିର, ବନ୍ଦର ଠାରୁ ଆରମ୍ଭ କରି ଉପକୂଳ ସୁରକ୍ଷା କିଭଳି ସୁରକ୍ଷିତ ରହିବ ପୁରା ପ୍ରସ୍ତୁତି କରିଛି ଓଡିଶା । ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଅଧ୍ୟକ୍ଷତାରେ ହାଇ ଲେବଲ ବୈଠକ ବସି ରାଜ୍ୟର ସୁରକ୍ଷା ସ୍ଥିତି ସମୀକ୍ଷା ହୋଇଛି।ବିଭିନ୍ନ ବିଭାଗର ବରିଷ୍ଠ ଅଧିକାରୀ, ପୋଲିସ ଅଧିକାରୀଙ୍କ ସହ ମୁଖ୍ୟମନ୍ତ୍ରୀ ଆଲୋଚନା କରିଛନ୍ତି। ସୀମାନ୍ତ ରାଜ୍ୟରେ ଥିବା ଓଡିଆ କିଭଳି ରାଜ୍ୟକୁ ସୁରକ୍ଷିତ ଫେରିବେ ତାପାଇଂ ମଧ୍ୟ ଦିଲ୍ଲିରେ ୨୪ ଘଣ୍ଟିଆ ହେଲ୍ପ ଡେସ୍କ ଖୋଲାଯାଇଛି ।

ବିଶେଷକରି ଓଡିଶା କ୍ଷେତ୍ରରେ ଚାନ୍ଦିପୁର, ପୁରୀ ଭଳି ସ୍ଥାନ ଗୁଡ଼ିକରେ ବଙ୍ଗୋପସାଗର ପଟୁ ଆକ୍ରମଣ ର ଆଶଙ୍କା ଥିବାରୁ ଏହାର ସୁରକ୍ଷାକୁ ଗୁରୁତ୍ବ ଦିଆଯଉଥିବା ମୁଖ୍ୟମନ୍ତ୍ରୀ ସୂଚନା ଦେଇଛନ୍ତି ।ଯୁଦ୍ଧ ସ୍ଥିତିକୁ ଦେଖି ରାଜ୍ୟ ସରକାର ପ୍ରସ୍ତୁତି ବଢ଼େଇଛନ୍ତି। ରାଜସ୍ବ ବିଭାଗ ପକ୍ଷରୁ ମୁଖ୍ୟ ଶାସନ ସଚିବ, ଡିଜିଙ୍କ ସହ ଆଲୋଚନା କରାଯାଇଛି। ଚାନ୍ଦିପୁର, ହୀରାକୁଦ, ସଇଁତଲା ଗୋଳା ବାରୂଦ କାରଖାନା ଭଳି ସ୍ଥାନରେ ସୁରକ୍ଷା ବଢ଼ାଯାଇଛି। ପୁରୀ ଜଗନ୍ନାଥ ମନ୍ଦିରର ସୁରକ୍ଷା ବ୍ୟବସ୍ଥା ବି ବଢାଯାଇଛି ।ରାଜ୍ୟରେ ଥିବା ପର୍ଯ୍ୟଟନ ସ୍ଥଳୀ ଗୁଡିକରେ ଯାଞ୍ଚ ଏବଂ ସୁରକ୍ଷା କଡାକଡି କରାଯାଇଛି।

 Also read: ୨ କି ୪ ଡ୍ରୋନ ନୁହେଁ, ପାକିସ୍ତାନ ମାଡ଼ କରିଛି ୫୦୦ ଡ୍ରୋନ, ଭାରତର ୨୪ ସହରକୁ କରିଥିଲା ଟାର୍ଗେଟ୍

ବାଲେଶ୍ବର ଜିଲ୍ଲା ଚାନ୍ଦିପୁର ସୁରକ୍ଷାକୁ ନେଇ ଗୁରୁତ୍ବପୂର୍ଣ୍ଣ ବୈଠକ ଡାକିଛନ୍ତି ପୂର୍ବାଂଚଳ ଡିଆଇଜି । ଏଥିରେ ITR ଓ PXEର ଡାଇରେକ୍ଟରଙ୍କ ସମେତ ବାଲେଶ୍ବର ଜିଲ୍ଲାପାଳ ଓ ଏସପି ଯୋଗଦେଇଥିଲେ। ସ୍ଥଳ କିମ୍ବା ଜଳ ପଥରେ ଅନୁପ୍ରବେଶକାରୀ ଯେପରି ଚାନ୍ଦିପୁରକୁ ଆସି ନପାରିବେ ତୀକ୍ଷ୍ଣଣ ନଜର ରଖିବାକୁ ନିର୍ଦେଶ ଦିଆଯାଇଛି।ପୁରୀ ପୋଲିସ ପକ୍ଷରୁ ଶ୍ରୀମନ୍ଦିର ସମେତ ରେଲୱେ ଷ୍ଟେସନ, ସମୁଦ୍ର କୂଳ ଓ ବିଭିନ୍ନ ଗୁରୁତ୍ବପୂର୍ଣ୍ଣ ସ୍ଥାନରେ ପୋଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି। ଶ୍ରୀମନ୍ଦିର ଭିତରେ, ବାହାରେ ସୁରକ୍ଷା ବ୍ୟବସ୍ଥାରେ ଅଧିକ ସଂଖ୍ୟକ ପୋଲିସ ଫୋର୍ସ ମୁତୟନ କରାଯାଇଛି। ଭକ୍ତ ମାନଙ୍କୁ କଡ଼ା ଚେକିଙ୍ଗ କରାଯିବା ସହ ଚତୁଃପାର୍ଶ୍ଵରେ ବନ୍ଧୁକରଧାରୀ ପୋଲିସ ସୁରକ୍ଷା ଦାୟିତ୍ବରେ ନିୟୋଜିତ ଅଛନ୍ତି। ପୁରୀର ପ୍ରମୁଖ ପ୍ରବେଶ ପଥ ଗୁଡ଼ିକରେ ପୋଲିସ ପକ୍ଷରୁ ନାକା ଲଗାଯାଇ ଗାଡ଼ି ଗୁଡ଼ିକୁ ଚେକିଙ୍ଗ କରାଯାଉଛି। ସେପଟେ ଗଞ୍ଜାମ ପୋଲିସ ପକ୍ଷରୁ  ଜିଲ୍ଲାର ସମୁଦ୍ର ଉପକୁଳ ବର୍ତ୍ତି ଅଂଚଳ ରେ ପ୍ରାୟ ୩୩ କିମି ପର୍ଯ୍ୟନ୍ତ କଡା କଡ଼ି ପାଟ୍ରୋଲଂ କରାଯାଉଛି | ରାତିରେ ମେରାଇନ ପୋଲିସ ପକ୍ଷରୁ ଦୁଇଟି ବୋଟ ସମୁଦ୍ରରେ ପାଟ୍ରୋଲିଂ କରୁଛି। 

Also read: ବ୍ରିଟେନରେ ଭାରତ ହାଇକମିସନ ‘ସ୍କାଇ ନ୍ୟୁଜ୍’ରେ ହଟାଇଲେ ପାକିସ୍ତାନର ମୁଖା

ଆଜିଠୁ  ହୀରାକୁଦ ଡ୍ୟାମକୁ ପର୍ଯ୍ୟଟକ ବାରଣ | ଡ୍ୟାମର ଉଭୟ ପାର୍ଶ୍ବରେ ରକେଟ ଲଂଚର, ଏଲଏମଜି ଖଂଜାଯାଇଛି ।ସେପଟେ ପାରାଦ୍ବିପ ବନ୍ଦରରେ ସୁରକ୍ଷା ବ୍ୟବସ୍ଥାକୁ କଡ଼ାକଡି କରାଯାଇଛି। ପାରାଦ୍ଵୀପ ବନ୍ଦରରେ ଦୁଇ ନମ୍ବର ସୁରକ୍ଷା ବ୍ୟବସ୍ଥା ଜାରି। ବନ୍ଦର ନିଷିଦ୍ଧାଞ୍ଚଳରେ ପାଟ୍ରୋଲିଙ୍ଗ  କରାଯିବା ସହ ଜାହାଜକୁ ଯାଞ୍ଚ କରାଯାଉଛି । ଭୋଗରାଇ ତାଳସାରି ନିକଟରେ ଥିବା ଆଇଲାଣ୍ଡ ଗୁଡିକ ତନତନ କରି ଯାଞ୍ଚ କରାଯାଉଥିବା ବେଳେ ନୌସନା ଅଧିକାରୀ ମାନେ ପାଣିରେ ପହଁରି ପହଁରି ଡଙ୍ଗାକୁ ଚେକ କରୁଛନ୍ତି । ପୋଲିସ ଫୋର୍ସ,ମତ୍ସ୍ୟ ବିଭାଗ ,ଗୁଇନ୍ଦା ବିଭାଗ କୁ ତାଳସାରି ରେ ନିୟୋଜିତ କରାଯାଇଛି । ତାଳସରି ଠାରୁ ମାତ୍ର ୧୫୦ କିଲୋମିଟର ଦୂରରେ ରହିଛି ବଙ୍ଗଳାଦେଶ ।ସେଥିପାଇଁ ତାଳସରି- ଉଦୟପୁର କୁ ହାଇଆଲର୍ଟରେ ରଖାଯାଇଛି ।