ଭୁବନେଶ୍ବର ୧୨।୩: ସରକାର ଧରିବେ ବାଳିଆ ମାଛ । ବଡ଼ ବାଳିଆ ଧରିବାକୁ ଏବେ ଚିନ୍ତା କରୁଛନ୍ତି ସରକାର । କାରଣ ପୋଖରୀରେ ବାଳିଆ ମାଛ ଜାଆଁଳ ଖାଇ ଦେଉଛନ୍ତି । ବାଳିଆ ମଲା ପରେ ଯାଇ ରୋହି, ଭାକୁର ଜାଆଁଳ ଛଡ଼ାଯିବ । ଗତ ସରକାର ସମୟରେ ଜାଆଁଳ ଛଡ଼ା ଯାଇଥିଲା । ରାତିରେ ଛଡ଼ା ଯାଇଥିଲା । କେବଳ ଖାତା କଲମରେ ଜାଆଁଳ ଛଡ଼ା ଯାଉଥିଲା । ଗତ ସରକାର ସମୟରେ କେବଳ ବାଳିଆ ମାଛ ଜାଆଁଳ ଛାଡ଼ିଥିଲେ । ତେଣୁ ବର୍ତମାନ ସରକାର ବଡ଼ ବାଳିଆଙ୍କୁ ଧରିବାକୁ ପଦକ୍ଷେପ ନେଉଛନ୍ତି । ଆଠଗଡ଼, ନୟାଗଡ଼ ଏବଂ କେନ୍ଦ୍ରାପଡ଼ାରେ ବାଳିଆ ମାଛ ଅଛନ୍ତି ବୋଲି କହିଛନ୍ତି ମତ୍ସ୍ୟ ଓ ପ୍ରାଣୀ ସମ୍ପଦ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ । ରାଜ୍ୟରେ ମଧୁର ମାଛର ଅଭାବ ରହିଛି । ତେଣୁ ମଧୁର ମାଛର ଅଭାବ ଦୂର କରିବାକୁ ଏଭଳି ପଦକ୍ଷେପ ପାଇଁ ଚିନ୍ତା କରିଛନ୍ତି ସରକାର । ଆଜି ବିଧାନସଭାରେ ମନ୍ତ୍ରୀ ଦେଇଥିବା ଉତ୍ତର ଅନୁସାରେ ରାଜ୍ୟରେ ,ବେ ୧୧.୨୩ ଲକ୍ଷ ମେଟ୍ରିକ୍ ଟନ୍ ମାଛ ଉତ୍ପାଦନ ହେଉଛି । ବାହାର ରାଜ୍ୟରୁ ମାତ୍ର ୩୩ହଜାର ୪୨୪ ମେଟ୍ରିକ୍ ଟନ୍ ମାଛ ଆମଦାନୀ ହେଉଛି । ୨.୯୮ ଲକ୍ଷ ମେଟ୍ରିକ୍ ଟନ୍ ମାଛ ବାହାରକୁ ପଠା ଯାଉଛି । ମଧୁର ମାଛ ପାଇଁ ଆମେ ବାହାର ରାଜ୍ୟ ଉପରେ ନିର୍ଭର କରୁଛେ । ଆଗାମୀ ଦିନରେ ମଧୁର ମାଛ ଉତ୍ପାଦନ ବଢ଼ିବ । ମଧୁର ମାଛ ଉତ୍ପାଦନ ପାଇଁ ସରକାର ଅନେକ ଯୋଜନା କରୁଛନ୍ତି ବୋଲି କହିଛନ୍ତି ମନ୍ତ୍ରୀ ।
ସେହିଭଳି ଓଡ଼ିଶାରେ ଅଣ୍ଡାର ମଧ୍ୟ ଅଭାବ ରହିଛି । ରାଜ୍ୟରେ ଦୈନିକ ୩କୋଟି ଅଣ୍ଡାର ଆବଶ୍ୟକତା ଥିବା ବେଳେ ଉତ୍ପାଦନ ହେଉଛି ମାତ୍ର ୧କୋଟି ୧୦ହଜାର ଅଣ୍ଡା । ଆଗକୁ ବିଭିନ୍ନ ଯୋଜନା ମାଧ୍ୟମରେ ଅଣ୍ଡା ଉତ୍ପାଦନ ବଢ଼ାଇବା ପାଇଁ ସରକାର ଯୋଜନା କରୁଛନ୍ତି ବୋଲି କହିଛନ୍ତି ମତ୍ସ୍ୟ ଓ ପ୍ରାଣୀ ସମ୍ପଦ ମନ୍ତ୍ରୀ ।
ଓଡ଼ିଶାରେ ଅଣ୍ଡା ଓ ମଧୁର ମାଛର ଅଭାବ ରହିଛି । ତେଣୁ ଆଗାମୀ ଦିନରେ କିଭଳି ଏହି ଅଭାବ ଦୂର ହୋଇପାରିବ ଏବଂ ଅଣ୍ଡା ଓ ମଧୁର ମାଛ ଉତ୍ପାଦନରେ ଓଡ଼ିଶା ଆତ୍ମନିର୍ଭରଶୀଳ ହୋଇପାରିବ ସେଥିପାଇଁ ସରକାର ଚାଷୀଙ୍କୁ ପ୍ରୋତ୍ସାହନ ଯୋଗାଇ ଦେବାର ଆବଶ୍ୟକତା ରହିଛି । ଆଉ ଏହାକୁ ମିଶନ ମୋଡ୍ରେ କାର୍ଯ୍ୟକାରୀ କରାଯାଉ ।
