ରାଞ୍ଚି ଦିନିକିଆ: ଏମିତି ହୋଇପାରେ ଭାରତର ଚୂଡ଼ାନ୍ତ ଏକାଦଶ, ୪ ଓ ୬ ନମ୍ବରକୁ ନେଇ ଫସିଲା ପେଞ୍ଚ

ନୂଆଦିଲ୍ଲୀ: ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ ସିରିଜରେ ୦-୨ରେ କ୍ଲିନ ସୁଇପ ହେବା ପରେ ଏବେ ଦିନିକିଆ ସିରିଜ୍ ପାଇଁ ପ୍ରସ୍ତୁତ ଟିମ୍ ଇଣ୍ଡିଆ। ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜର ପ୍ରଥମ ମୁକାବିଲା ଆସନ୍ତାକାଲି ରାଞ୍ଚିରେ ଖେଳାଯିବ। ଏହି ମ୍ୟାଚ୍ ପାଇଁ ଭାରତୀୟ ଦଳର ଚୂଡ଼ାନ୍ତ ଏକାଦଶ ପ୍ରାୟତଃ ସ୍ପଷ୍ଟ ହୋଇ ସାରିଥିବା କୁହାଯାଉଛି।

ଶୁଭମନ ଗିଲଙ୍କ ଅନୁପସ୍ଥିତିରେ କେଏଲ ରାହୁଲ ସିରିଜର ଅଧିନାୟକ ଦାୟିତ୍ଵ ସମ୍ଭାଳିବେ। ଏହା ସହ ଓ୍ଵିକେଟ୍ କିପିଂ ମଧ୍ୟ କରିବେ। ଗିଲଙ୍କ ଅନୁପସ୍ଥିତିରେ ରୋହିତ ଶର୍ମାଙ୍କ ସହ ଯଶସ୍ଵୀ ଜୟସ୍ଵାଲ ଓପନିଂ କରି ପାରନ୍ତି। ରୋହିତ ଓ ଜୟସ୍ଵାଲ ଓପନିଂ କଲେ ରାଇଟ୍ ଏବଂ ଲେଫ୍ଟ ସମନ୍ଵୟ ମଧ୍ୟ ରହିବ। ନମ୍ବର ୩ରେ ଖେଳିବେ ବିରାଟ କୋହଲି।

ଶ୍ରେୟସ ଆୟର ଆହତ କାରଣରୁ ଏହି ସିରିଜ୍ ଖେଳିବେ ନାହିଁ। ଏମିତିରେ ନମ୍ବର ୪ରେ ବ୍ୟାଟିଂ ପାଇଁ ୩ ଜଣ ଦାବିଦାର ଅଛନ୍ତି। ଋତୁରାଜ ଗାଏକ୍ଵାଡ଼, ତିଳକ ବର୍ମା ଓ ଋଷଭ ପନ୍ତ ଅଛନ୍ତି। ନମ୍ବର ୬ ପାଇଁ ମଧ୍ୟ ଏହି ତିନି ଖେଳାଳି ଦାବିଦାର ଅଛନ୍ତି। କିନ୍ତୁ ନମ୍ବର ୪ ପାଇଁ ଋତୁରାଜ ଗାଏକ୍ଵାଡ଼ଙ୍କୁ ସୁଯୋଗ ମିଳିପାରେ। ଏହା ସ୍ପଷ୍ଟ ଯେ, କେଏଲ ରାହୁଲ ନିଜେ ଓ୍ଵିକେଟ୍ କିପିଂ କରିବେ। ଯଦି ପନ୍ତ ଖେଳିବେ ତେବେ ସେ ଜଣେ ବ୍ୟାଟର ଭାବେ ଖେଳି ପାରନ୍ତି। ନମ୍ବର ୫ରେ କେଏଲ ରାହୁଲ ବ୍ୟାଟିଂ କରି ପାରନ୍ତି। ମୋଟାମୋଟି ଭାବେ ଏହା ଅନୁମାନ କରାଯାଇ ପାରିବ ଯେ, ମ୍ୟାଚ୍ର ସ୍ଥିତି ଏବଂ ବିପକ୍ଷ ଦଳର ବୋଲିଂ ଆକ୍ରମଣକୁ ଦେଖି ନମ୍ବର ୪ରୁ ୬ ପର୍ଯ୍ୟନ୍ତ ଖେଳାଳିଙ୍କ ବ୍ୟାଟିଂ କ୍ରମର ବଦଳିପାରେ।

ରବୀନ୍ଦ୍ର ଜାଡ଼େଜାଙ୍କ ଚୂଡ଼ାନ୍ତ ଏକାଦଶରେ ରହିବା ନିଶ୍ଚିତ। ଅନ୍ୟପଟେ ଓ୍ଵାଶିଂଟନ ସୁନ୍ଦର ଓ ନୀତିଶ କୁମାର ରେଡ୍ଡୀଙ୍କ ମଧ୍ୟରୁ ଜଣଙ୍କୁ ଖେଳିବାର ସୁଯୋଗ ମିଳିପାରେ। କୁଲଦୀପ ଯାଦବ ବିଶେଷଜ୍ଞ ସ୍ପିନର ଭାବେ ଖେଳିବେ।ଦ୍ରୁତ ବୋଲର ଭାବେ ହର୍ଷିତ ରାଣା ଓ ଅର୍ଶଦୀପ ସିଂଙ୍କୁ ସୁଯୋଗ ମିଳିବ। ବୁମରା ଓ ମହମ୍ମଦ ସିରାଜଙ୍କୁ ବିଶ୍ରାମ ଦିଆଯାଇଛି। ରାଞ୍ଚିର ପିଚ୍ ସ୍ପିନରଙ୍କୁ ବେଶ ସୁହାଇପାରେ। ମାତ୍ର ପିଚ୍ ଉପରେ ଘାସ ଥିବାରୁ ଦ୍ରୁତ ବୋଲର ଅଲରାଉଣ୍ଡର ଭାବେ ନୀତିଶ ରେଡ୍ଡୀଙ୍କୁ ସୁଯୋଗ ମିଳିପାରେ।

ରାଞ୍ଚି ପାଇଁ ଭାରତର ସମ୍ଭାବିତ ଏକାଦଶ

ରୋହିତ ଶର୍ମା, ଯଶସ୍ଵୀ ଜୟସ୍ଵାଲ, ବିରାଟ କୋହଲି, ଋତୁରାଜ ଗାଏକ୍ଵାଡ଼, କେଏଲ ରାହୁଲ(ଓ୍ଵିକେଟ୍ କିପର), ତିଳକ ବର୍ମା/ଋଷଭ ପନ୍ତ, ରବୀନ୍ଦ୍ର ଜାଡ଼େଜା, ଓ୍ଵାଶିଂଟନ ସୁନ୍ଦର/ନୀତିଶ କୁମାର ରେଡ୍ଡୀ, ହର୍ଷିତ ରାଣା, କୁଲଦୀପ ଯାଦବ, ଅର୍ଶଦୀପ ସିଂ।