ଭଦ୍ରକ ୨୮।୮: କମ୍ପାନୀରେ କାମ କରୁନଥିଲେ କେତେକ ଯୁବକ । ଓଡ଼ିଆ ଇନ୍ଚାର୍ଜ ମାଲିକଙ୍କୁ କହିଦେଇଥିଲେ ଏସବୁ ଘଟଣା । ଏହି ଘଟଣାରେ ଉତ୍ତ୍ୟକ୍ତ ହୋଇ କମ୍ପାନୀ କର୍ମଚାରୀ ମାନେ ସଙ୍ଗବଦ୍ଧ ଭାବେ ରଡ଼ରେ ଆକ୍ରମଣ କରି ହତ୍ୟା କରିଛନ୍ତି ।
ସୂଚନାଯୋଗ୍ୟ ଯେ, ଭଦ୍ରକ ଗ୍ରାମାଞ୍ଚଳ ଥାନା ଅଧୀନ ଦଇସିଂ ପଞ୍ଚାୟତ, କୁସୁନନଗର ଗାଁର ସନ୍ତୋଷ ପଣ୍ଡା ମୁମ୍ବାଇର କୋହଲାପୁର ଠାରେ ଏକ କପଡା କମ୍ପାନୀରେ ଦୀର୍ଘ ବର୍ଷ ରୁ ଅଧିକ ଦିନ ଧରି ଇନଚାର୍ଜ ଥିଲେ । ତେବେ ଢେଙ୍କାନାଳ ଅଞ୍ଚଳର କେତେକ ଯୁବକ କମ୍ପାନୀରେ ଡ୍ୟୁଟି ସମୟରେ କାମ କରୁନଥିବା ବେଳେ ସନ୍ତୋଷ ଏ ନେଇ ମାଲିକଙ୍କୁ ଜଣାଇଥିଲେ । ପରେ ଏହି ଘଟଣାକୁ ନେଇ କିଛି ଦିନ ପୂର୍ବରୁ ଝଗଡା ହୋଇଥିଲା । ତେବେ ଗଣେଶ ପୂଜା ପରଦିନ ରାତି ଡ୍ୟୁଟି ଥିବାରୁ ସନ୍ତୋଷ ପଣ୍ଡା ରୁମ୍ରୁ ବାହାରିଥିଲେ । କିନ୍ତୁ ରାତି ୧୦ଟା ପରେ ତାଙ୍କ ସ୍ତ୍ରୀ ଓ ପୁଅଙ୍କୁ ଖବର ମିଳିଥିଲା ଯେ ସନ୍ତୋଷଙ୍କୁ ରଡ଼ରେ ଆକ୍ରମଣ କରି ୩ ଜଣ ହତ୍ୟା କରିଛନ୍ତି । ଥାନାରେ ହତ୍ୟା ନେଇ ଅଭିଯୋଗ ପରେ ସ୍ଥାନୀୟ ଲୋକଙ୍କ ବୟାନ ଆଧାରରେ ସ୍ଥାନୀୟ ପୋଲିସ କଂପାନୀରେ କାମ କରୁଥିବା ଢେଙ୍କାନାଳ ଅଞ୍ଚଳର ତିନି ଜଣ ଯୁବକଙ୍କୁ ଅଟକ ରଖିଥିବା ପରିବାର ଲୋକେ ସୂଚନା ଦେଉଛନ୍ତି । ମୃତଦେହ ନିକଟରେ ସନ୍ତୋଷଙ୍କ ପୁଅ ଓ ସ୍ତ୍ରୀ ଥିବାବେଳେ ଶବ ବ୍ୟବଚ୍ଛେଦ ପରେ ମୃତଦେହ ଭଦ୍ରକ ଆଣିବେ ବୋଲି ସୂଚନା ମିଳିଛି ।
