ଦୀପାବଳି ଲାଗି ୪ ଦିନ ବନ୍ଦ ରହିବ ସେୟାର ମାର୍କେଟ, ନୋଟ୍ କରି ରଖନ୍ତୁ ତାରିଖ

ମୁମ୍ବାଇ ୧୫।୧୦: ଚଳିତବର୍ଷ ଦୀପାବଳିରେ ସେୟାର ମାର୍କେଟ୍ ଲଗାତାର ୪ ଦିନ ବନ୍ଦ ରହିବ। ବମ୍ବେ ଷ୍ଟକ୍ ଏକ୍ସଚେଞ୍ଜ (ବିଏସଇ) ଓ ନ୍ୟାସନାଲ ଷ୍ଟକ୍ ଏକ୍ସଚେଞ୍ଜ (ଏନଏସଇ) ୧୯,୨୧ ଓ ୨୨ ଅକ୍ଟୋବରରେ ବନ୍ଦ ରହିବ ଓ ସପ୍ତାହନ୍ତରେ କୌଣସି କାରବାର ମଧ୍ୟ ହେବ ନାହିଁ। ୧୯ ଅକ୍ଟୋବର ରବିବାର ଧନତେରସ ଓ ୨୧ ଅକ୍ଟୋବର ଦୀପାବଳି(ଲକ୍ଷ୍ମୀ ପୂଜନ) ଏହା ପରଦିନ ଅର୍ଥାତ ୨୨ ତାରିଖ ଦିନ ବଳି ପ୍ରତିପଦା ପାଳିତ ହେବ। ଏଣୁ ଏହି ସବୁ ଦିନ ଷ୍ଟକ୍ ଏକ୍ସଚେଞ୍ଜରେ କାରବାର ହେବ ନାହିଁ। ଏହି ଦିନଗୁଡିକରେ ମଲ୍ଟି କମଡିଟି ଏକ୍ସଚେଞ୍ଜ (ଏମସିଏକ୍ସ) ଓ କରେନ୍ସୀ ଡେରିଭେଟିଭ ବଜାର ମଧ୍ୟ ବନ୍ଦ ରହିବ।

ଏ ନେଇ ଏନସଇ ଓ ବିଏସଇ ପିଛିଲା ସେପ୍ଟେମ୍ବର ୨୨ ତାରିଖରେ ଏକ ସର୍କୁଲାର ଜାରି କରିଥିଲେ। ଏଥିରେ ଦିବାଲୀ ମୁହୂର୍ତ୍ତ ଟ୍ରେଡିଂ ୨୧ ଅକ୍ଟୋବର ମଧ୍ୟାହ୍ନ ୧.୪୫ ମିନିଟ୍ ରୁ ୨.୪୫ ମିନିଟ୍ ପର୍ଯ୍ୟନ୍ତ ଆୟୋଜିତ ହେବ ବୋଲି ସୂଚିତ କରାଯାଇଥିଲା। ଏନଏସଇ କହିଛନ୍ତି ଯେ ଏହି ମୁହୂର୍ତ୍ତ ଟ୍ରେଡିଂରେ କରାଯାଇଥିବା ସମସ୍ତ ଟ୍ରେଡ ସମାଧାନ ପାଇଁ ମାନ୍ୟ ହେବେ। ମୁହୂର୍ତ୍ତ ଟ୍ରେଡିଂ ସବୁବର୍ଷ ଦୀପାବଳିରେ ଅନୁଷ୍ଠିତ ହେଉଥିବା ଏକ ଘଣ୍ଟିକିଆ କାର୍ଯ୍ୟକ୍ରମ, ଯାହା ନୂଆ ହିନ୍ଦୁ କ୍ୟାଲେଣ୍ଡର (୨୦୨୫ରେ ସମ୍ବତ ୨୦୮୨)ର ପ୍ରାରମ୍ଭର ପ୍ରତୀକ।

ସାଧାରଣତଃ ଏହି ଅଧିବେଶନ ସନ୍ଧ୍ୟାରେ ଅନୁଷ୍ଠିତ ହୋଇଥାଏ। ହେଲେ ଚଳିତବର୍ଷ ଏହା ମଧ୍ୟାହ୍ନରେ ହେବ। ଏହି ଟ୍ରେଡିଂ ସବୁ କ୍ଷେତ୍ରରେ ଉପଲବ୍ଧ ହେବ,ଯେଉଁଥିରେ ଇକ୍ୱିଟି, କମୋଡିଟି ଡେରିଭେଟିବସ୍, କରେନ୍ସୀ ଡେରିଭେଟିବସ୍. ଇକ୍ୱିଟି ଫ୍ୟୁଚର୍ସ ଆଣ୍ଡ ଅପସନ୍ସ ଓ ସିକ୍ୟୁରିଟିଜ୍ ଲେଣ୍ଡିଂ ଆଣ୍ଡ ବରୋଇଂ ମଧ୍ୟ ସାମିଲ ରହିଛି। ଐତିହାସିକ ରୂପେ ମୁହୂର୍ତ୍ତ ଟ୍ରେଡିଂକୁ ସାଧାରଣତଃ ଶୁଭ ମନେ କରାଯାଏ। ଗତ ୧୬ ବର୍ଷରୁ ୧୩ ବର୍ଷରେ ପ୍ରମୁଖ ସୂଚକାଙ୍କ ଅଭିବୃଦ୍ଧି ସହ ବନ୍ଦ ହୋଇଥିବାର ରେକର୍ଡ ରହିଛି। ଗତ ୨୦୨୪ ମୁହୂର୍ତ୍ତ ଟ୍ରେଡିଂରେ ମଧ୍ୟ ଭଲ ଅଭିବୃଦ୍ଧି ଦେଖାଯାଇଥିଲା।