ଜାନୁଆରୀ ୯’ରେ ମୁକ୍ତିଲାଭ କରିବ ଥାଲାପତି ବିଜୟଙ୍କ ଶେଷ ଫିଲ୍ମ ‘ଜନ ନାୟଗନ୍’; ହଜାର ହଜାର ପ୍ରଶଂସକଙ୍କ ଗହଣରେ କାନ୍ଦି ପକାଇଲେ ଅଭିନେତା

ନୂଆଦିଲ୍ଲୀ: ଦକ୍ଷିଣ ଫିଲ୍ମ ସୁପରଷ୍ଟାର ଥାଲାପତି ବିଜୟ ତାଙ୍କ ଫିଲ୍ମ କ୍ୟାରିୟରକୁ ବିଦାୟ ଦେଇଛନ୍ତି। ଅଭିନେତାଙ୍କ ଶେଷ ଫିଲ୍ମ "ଜନ ନାୟଗନ" ଆସନ୍ତା ବର୍ଷ ଜାନୁଆରୀରେ ବଡ଼ ପରଦାରେ ଆସିବ। ଏହା ପୂର୍ବରୁ, ଡିସେମ୍ବର ୨୭ ତାରିଖରେ ମାଲେସିଆରେ "ଜନ ନାୟଗନ" ପାଇଁ ଏକ ଅଡିଓ ଲଞ୍ଚ ଇଭେଣ୍ଟ ଅନୁଷ୍ଠିତ ହୋଇଥିଲା। ଏହି ଇଭେଣ୍ଟ ସମୟରେ ଅଭିନେତା ଭାବପ୍ରବଣ ହୋଇ ଯାଇଥିଲେ ଏବଂ ତାଙ୍କର ଶେଷ ଫିଲ୍ମକୁ "ବେଦନା ଦାୟକ" ବୋଲି ବର୍ଣ୍ଣନା କରିଥିଲେ।

ବିଜୟ ଅଭିନୟ ଛାଡି ରାଜନୀତିରେ ଧ୍ୟାନ ଦେବାକୁ ନିଷ୍ପତ୍ତି ନେଇଛନ୍ତି। ଗତ ବର୍ଷ ସେ ତାଙ୍କର ରାଜନୈତିକ ଦଳ, ତାମିଲଗା ଭେଟ୍ଟି କାଝାଗମ ଆରମ୍ଭ କରିଥିଲେ। ଅଭିନେତା ଆଗାମୀ ତାମିଲନାଡୁ ରାଜ୍ୟ ନିର୍ବାଚନ ଲଢ଼ିବାକୁ ପ୍ରସ୍ତୁତ ହେଉଛନ୍ତି। ପିଙ୍କଭିଲା ଅନୁଯାୟୀ, ଥାଲାପତି ବିଜୟ ତାଙ୍କର ଶେଷ ଚଳଚ୍ଚିତ୍ର "ଜନ ନାୟଗନ" ବିଷୟରେ କହିଛନ୍ତି, ‘ମୁଁ ଜାଣିନାହିଁ ଏହା କହିବା ଉଚିତ କି ନାହିଁ, କିନ୍ତୁ ମୋର ଶେଷ ଚଳଚ୍ଚିତ୍ର ଟିକେ ଯନ୍ତ୍ରଣା ଦାୟକ ଥିଲା ।’

ଅଭିନେତା ବିଜୟ ତାଙ୍କ ଫିଲ୍ମ କ୍ୟାରିୟର ଛାଡି ରାଜନୀତିରେ ଧ୍ୟାନ ଦେବାକୁ ନିଷ୍ପତ୍ତି ନେଇଛନ୍ତି । ସେ କହିଛନ୍ତି, ‘ମୋ ପାଇଁ କେବଳ ଗୋଟିଏ କଥା ଗୁରୁତ୍ୱପୂର୍ଣ୍ଣ। ଲୋକମାନେ ସିନେମା ହଲକୁ ଆସନ୍ତି ଏବଂ ମୋତେ ଦେଖିବା ପାଇଁ ଧାଡିରେ ଛିଡା ହୁଅନ୍ତି। ସେଥିପାଇଁ ମୁଁ ଆଗାମୀ ୩୦-୩୩ ବର୍ଷ ପାଇଁ ସେମାନଙ୍କ ପାଇଁ ଛିଡ଼ା ହେବାକୁ ପ୍ରସ୍ତୁତ।’ ସେ ଆହୁରି କହିଛନ୍ତି, ‘ମୁଁ ପ୍ରଥମ ଦିନରୁ ସମସ୍ତ ପ୍ରକାରର ସମାଲୋଚନାର ସମ୍ମୁଖୀନ ହୋଇଛି। କିନ୍ତୁ ମୋର ପ୍ରଶଂସକମାନେ ଆରମ୍ଭରୁ ମୋ ସହିତ ଠିଆ ହୋଇଛନ୍ତି। ମୁଁ ଏକ ଛୋଟ ବାଲିର ଘର ତିଆରି କରିବାକୁ ସିନେମାରେ ପାଦ ଦେଇଥିଲି, କିନ୍ତୁ ଆପଣମାନେ ମୋତେ ଏକ ମହଲ ଦେଇଛନ୍ତି।’

ବିଜୟଙ୍କ ଶେଷ ଫିଲ୍ମ ୯ ଜାନୁଆରୀ, ୨୦୨୬ ରେ ସିନେମା ହଲରେ ମୁକ୍ତିଲାଭ କରିବ। ଏହି ଫିଲ୍ମର ନିର୍ଦ୍ଦେଶନା ଦେଇଛନ୍ତି ଏଚ୍. ବିନୋଦ। ଏହି ଫିଲ୍ମରେ ବବି ଦେଓଲ, ପୂଜା ହେଗଡେ, ମମିତା ବୈଜୁ, ଗୌତମ ବାସୁଦେବ ମେନନ୍, ପ୍ରକାଶ ରାଜ, ନାରାୟଣ ଏବଂ ପ୍ରିୟାମଣି ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକାରେ ଅଛନ୍ତି।