ମର୍ସିଡିଜ୍ ନୁହେଁ ନିଜ କାର୍‌ରେ ରାଷ୍ଟ୍ରପତି ଭବନରୁ ଫେରିଲେ ସିଜେଆଇ ବି.ଆର ଗଓ୍ବାଇ, ସାମ୍ନାକୁ ଆସିଲା କାରଣ

ନୂଆଦିଲ୍ଲୀ: ନୂଆ ଉଦାହରଣ ସୃଷ୍ଟି କଲେ ଦେଶର ପୂର୍ବତନ ପ୍ରଧାନ ବିଚାରପତି ବି.ଆର ଗଓ୍ବାଇ। ଦେଶର ନୂତନ ପ୍ରଧାନ ବିଚାରପତି ସୂର୍ଯ୍ୟକାନ୍ତଙ୍କ ଶପଥ ଗ୍ରହଣ ପରେ ରାଷ୍ଟ୍ରପତି ଭବନରୁ ତାଙ୍କ ପାଇଁ ଉଦ୍ଦିଷ୍ଟ ସରକାରୀ ମର୍ସିଡିଜ୍ ବଦଳରେ ନିଜ କାର୍ରେ ଫେରିଲେ ବି.ଆର ଗଓ୍ବାଇ। ଆଉ ଏଭଳି କରି ସେ ଏକ ନୂଆ ଉଦାହରଣ ସୃଷ୍ଟି କରିଛନ୍ତି।

ରିପୋର୍ଟ ଅନୁସାରେ, ପୂର୍ବତନ ବିଚାରପତି ଏହା ପଛର କାରଣ ମଧ୍ୟ କହିଛନ୍ତି। ସେ କହିଛନ୍ତି ଏଭଳି କରିବାର କାରଣ ହେଉଛି, ଯେପରି ନୂଆ ପ୍ରଧାନ ବିଚାରପତି ସୂର୍ଯ୍ୟକାନ୍ତଙ୍କୁ ପ୍ରଥମ ଦିନରୁ ହିଁ ତାଙ୍କର ସରକାରୀ ଗାଡ଼ି ଉପଲବ୍ଧ ହୋଇପାରିବ।

ଖାଲି ସେତିକି ନୁହେଁ ପୂର୍ବତନ ସିଜେଆଇ ଆହୁରି ଏକ ବଡ଼ ଘୋଷଣା କରିଛନ୍ତି। ସେ ସ୍ପଷ୍ଟ ଭାବରେ କହିଛନ୍ତି ଯେ, ଅବସର ପରେ କୌଣସି ସରକାରୀ ପଦ-ପଦବୀରେ ଦାୟିତ୍ବ ନେବେ ନାହିଁ। ବି.ଆର ଗଓ୍ବାଇ କହିଛନ୍ତି ‘ମୁଁ ଆରମ୍ଭରୁ ହିଁ କହିଥିଲେ ଯେ, କୌଣସି ପଦ ନେବିନାହିଁ। ଏବେ ୯-୧୦ ଦିନର କୁଲିଂ ଅଫ୍ ପିରିୟଡ ରହିଛି। ଏହା ପରେ ନୂଆ ପାଳି ଆରମ୍ଭ ହେବ।’’

ସୂଚନାଥାଉକି, ଅବସର ପୂର୍ବରୁ ବି.ଆର ଗଓ୍ବାଇ ଅନେକ ପ୍ରସଙ୍ଗ ଉପରେ ସ୍ପଷ୍ଟ ରାୟ ଦେଇଥିଲେ। ସେ କଲେଜିୟମ ସିଷ୍ଟମ ସମର୍ଥନ କରିବା ସହ କହିଥିଲେ ଯେ, ସଂରକ୍ଷଣର ଲାଭ ବାରମ୍ବାର ଗୋଟିଏ ପରିବାରକୁ ନଯିବା ଦରକାର।ଆହୁରି ମଧ୍ୟ ନିଜ କାର୍ଯ୍ୟକାଳରେ କୌଣସି ମହିଳା ବିଚାରପତି ନିଯୁକ୍ତ କରିପାରିନାହାଁନ୍ତ, ଏଥିପାଇଁ ସେ ଅନୁତପ୍ତ ଥିବା କଥା ମଧ୍ୟ କହିଥିଲେ।

କ୍ରିମି ଲେୟାରକୁ ନେଇ ରଖିଥିଲେ ମନ୍ତବ୍ୟ

ପୂର୍ବତନ ବିଚାରପତି ନିଜେ ଦଳିତ ସମ୍ପ୍ରଦାୟରୁ ଆସିଛନ୍ତି। ସେ କ୍ରିମି ଲେୟାରର ସୁବିଧାକୁ ଏସସି (ଅନୁସୂଚିତ ଜାତି) ବର୍ଗରେ ଲାଗୁ କରିବାକୁ ସମର୍ଥନ କରିଛନ୍ତି। ସେ କହିଥିଲେ ଜଣେ ମୁଖ୍ୟ ସଚିବଙ୍କ ପୁଅ ଏବଂ ଜଣେ ଚାଷୀଙ୍କ ପୁଅ ମଧ୍ୟରେ ପ୍ରତିଯୋଗିତା ସମାନ ଭାବରେ ହୋଇପାରିବନି। ଏଥିପାଇଁ ସଂରକ୍ଷଣ ସେମାନଙ୍କ ପର୍ଯ୍ୟନ୍ତ ଯିବା ଦରକାର, ଯାହାଙ୍କୁ ଏହାର ପ୍ରକୃତ ଆବଶ୍ୟକତା ରହିଛି।

ସୂଚନାଥାଉକି, ରାଷ୍ଟ୍ରପତି ଦ୍ରୌପଦୀ ମୁର୍ମୁ ସୋମବାର ବିଚାରପତି ସୂର୍ଯ୍ୟକାନ୍ତଙ୍କୁ ଭାରତର ୫୩ତମ ପ୍ରଧାନ ବିଚାରପତି ଭାବରେ ଶପଥ ପାଠ କରାଇଛନ୍ତି। ଉପରାଷ୍ଟ୍ରପତି ସିପି ରାଧାକ୍ରିଷ୍ଣନ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଏହି ସମାରୋହରେ ଉପସ୍ଥିତ ରହିଥିଲେ।