ନୂଆଦିଲ୍ଲୀ: ଉପରାଷ୍ଟ୍ରପତି ଜଗଦୀପ ଧନଖଡ଼ଙ୍କ ପରେ ବିଜେପି ସାଂସଦ ନୀଶିକାନ୍ତ ଦୁବେ ନ୍ୟାୟପାଳିକା ଉପରେ ପ୍ରଶ୍ନ ଉଠାଇଛନ୍ତି । ୱାକଫ୍ ସଂଶୋଧନ ଅଧିନିୟମ ଉପରେ ସୁପ୍ରିମକୋର୍ଟରେ ଜାରି ଶୁଣାଣି ଉପରେ ଶନିବାର ବିଜେପି ସାଂସଦ କଡ଼ା ଟିପ୍ପଣୀ କରିଛନ୍ତି । ସେ କହିଛନ୍ତି ଯେ ଯଦି ଆଇନ କରିବା ବି ସୁପ୍ରିମକୋର୍ଟର କାମ, ତେବେ ସଂସଦ ଭବନ ବନ୍ଦ କରିଦେବା ଦରକାର । 

ୱାକଫ୍ ସଂଶୋଧିତ ଆଇନକୁ ଚ୍ୟାଲେଞ୍ଜ କରି ଆବେଦନକାରୀ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି । ଆବେଦନକାରୀଙ୍କ ଯୁକ୍ତି ଯେ ଏହି ସଂଶୋଧିତ ଆଇନରେ ୱାକଫ ବାଏ ୟୁଜର ପରି ଧାରା ଓ ଅଣ-ମୁସଲମାନଙ୍କୁ ୱାକଫ ବୋର୍ଡରେ ସାମିଲ କରିବା ପ୍ରାବଧାନ ସମ୍ୱିଧାନର ମୌଳିକ ଅଧିକାରକୁ ଉଲ୍ଲଂଘନ କରୁଛି ।

ସୁପ୍ରିମକୋର୍ଟରେ ଏହା ଉପରେ ଲଗାତାର ଦୁଇ ଦିନ ଧରି ଶୁଣାଣି ସରିଛି । ଶେଷ ଶୁଣାଣି ବେଳେ ପରେ କେନ୍ଦ୍ର ସରକାରଙ୍କୁ ଜବାବ ଦାଖଲ ପାଇଁ ସୁପ୍ରିମକୋର୍ଟ ୭ ଦିନର ସମୟ ଦେଇଛନ୍ତି । ସେ ପର୍ଯ୍ୟନ୍ତ ୱାକଫ୍ ବୋର୍ଡରେ ନୂତନ ନିଯୁକ୍ତି ହେବ ନାହିଁ, ସ୍ଥିତାବସ୍ଥା ବଜାୟ ରହିବ ବୋଲି କେନ୍ଦ୍ର ସରକାର କୋର୍ଟକୁ କହିଥିଲେ । ଏହି ମାମଲାର ପରବର୍ତ୍ତୀ ଶୁଣାଣି ମେ ୫ ତାରିଖରେ ହେବ ।

ନ୍ୟାୟପାଳିକ ଉପରେ କଡ଼ା ଟିପ୍ପଣୀ କରିଥିଲେ ଉପରାଷ୍ଟ୍ରପତି

ବିଧାନସଭାରୁ ପାରିତ ବିଲ୍ ଉପରେ ନିଷ୍ପତ୍ତି ନେବା ଲାଗି ରାଷ୍ଟ୍ରପତି ପାଇଁ ସୁପ୍ରିମକୋର୍ଟ ସମୟ ସୀମା ଧାର୍ଯ୍ୟ ଉପରେ ଉପରାଷ୍ଟ୍ରପତି ଆପତ୍ତି ଉଠାଇଥିଲେ । ନ୍ୟାୟପାଳିକା ପାଇଁ ସେ କଡ଼ା ଶବ୍ଦ ପ୍ରୟୋଗ କରି କହିଥିଲେ ଏଭଳି ସ୍ଥିତି ସୃଷ୍ଟି କରାଯାଇପାରିବ ନାହିଁ, ଯେଉଁଠି ରାଷ୍ଟ୍ରପତିଙ୍କୁ ସୁପ୍ରିମକୋର୍ଟ ନିର୍ଦ୍ଦେଶ ଦେବେ । ଏହାସହ ସେ କହିଥିଲେ ଯେ ସମ୍ୱିଧାନର ଧାରା ୧୪୨, ଯାହା ସୁପ୍ରିମକୋର୍ଟଙ୍କୁ ସ୍ୱତନ୍ତ୍ର ଅଧିକାର ଦେଉଛି, ତାହା ବର୍ତ୍ତମାନ ସାମ୍ୱିଧାନିକ ଶକ୍ତି ବିରୋଧରେ ନ୍ୟୁକ୍ଲିୟର ମିସାଇଲ୍ ପଲାଟିଛି । ନ୍ୟାୟପାଳିକା ପାଖରେ ଏହା ୨୪x୭ ଉପଲବ୍ଧ ରହିଛି ।

ଉପରାଷ୍ଟ୍ରପତି କହିଥିଲେ, 'ନିକଟରେ ଦିଆଯାଇଥିବା ରାୟରେ ରାଷ୍ଟ୍ରପତିଙ୍କୁ ନିର୍ଦ୍ଦେଶ ଦିଆଗଲା । ଆମେ କେଉଁ ଆଡ଼କୁ ଯାଉଛୁ ? ଦେଶରେ କ’ଣ ଚାଲିଛି ? ଆମକୁ ସମ୍ୱେଦନଶୀଳ ହେବାକୁ ପଡ଼ିବ । ରାଷ୍ଟ୍ରପତିଙ୍କୁ ସମୟ ସୀମା ଭିତରେ ନିଷ୍ପତ୍ତି ନେବା ପାଇଁ କୁହାଯାଉଛି, ଆଉ ଯଦି ନୁହେଁ, ତେବେ ଆଇନ କରାଯାଉଛି । ଆମ ପାଖରେ ଏପରି ନ୍ୟାୟଧୀଶ ଅଛନ୍ତି, ଯେଉଁମାନେ ଆଇନ କରିବେ, କାର୍ଯ୍ୟପାଳିକାର କାର୍ଯ୍ୟ ଦେଖିବେ, ସୁପର-ସଂସଦ ଭାବେ କାମ କରିବେ ଓ କୌଣସି ଉତ୍ତରଦାୟୀ ମଧ୍ୟ ରହିବେ ନାହିଁ । କାରଣ ଦେଶର ଆଇନ ସେମାନଙ୍କ ଉପରେ ଲାଗୁ ହେଉ ନାହିଁ ।'