ନୂଆଦିଲ୍ଲୀ ୪।୫: ଡାକ୍ତରୀ ପ୍ରବେଶ ପରୀକ୍ଷା ନିଟ୍ ୟୁଜି ୨୦୨୫ ରବିବାର ଅନୁଷ୍ଠିତ ହୋଇଯାଇଛି। ସାରା ଦେଶର ୫୫୨ଟି ସହରରେ ଥିବା ୫ ହଜାର କେନ୍ଦ୍ର ଓ ୧୪ ବିଦେଶୀ ସେଣ୍ଟରରେ ଏହି ପ୍ରବେଶ ପରୀକ୍ଷା କରାଯାଇଛି। ଏଥର ପରୀକ୍ଷା ପେନ ଓ ପେପର ମୋଡରେ କରାଯାଇଛି। ଏହି ପରୀକ୍ଷା ଗୋଟିଏ ସିଫ୍ଟରେ ଶେଷ ହୋଇଥିବା ବେଳେ ଅପରାହ୍ନ ୨ଟାରୁ ୫ଟା ପର୍ଯ୍ୟନ୍ତ ଛାତ୍ରଛାତ୍ରୀ ପରୀକ୍ଷା ଦେଇଛନ୍ତି। ଏହି ପରୀକ୍ଷା ପାଇଁ ବଡ଼ ଧରଣର ପ୍ରସ୍ତୁତି କରାଯାଇଥିଲା।
କୁହାଯାଉଛି ଏଥର ଅଧିକାଂଶ ସେଣ୍ଟର ସରକାରୀ କଲେଜରେ ହୋଇଛି। ଏହି ପରୀକ୍ଷା ପାଇଁ ସବୁ ସ୍ତରରେ କଡ଼ାକଡ଼ି ଯାଞ୍ଚ ହୋଇଛି। ପରୀକ୍ଷା ପାଇଁ ଛାତ୍ର ଛାତ୍ରୀଙ୍କୁ ପରୀକ୍ଷା ହଲ ଭିତରକୁ ପେନ୍ ନେବା ମଧ୍ୟ ମନା ଥିଲା ଓ ପରୀକ୍ଷା ପାଇଁ ପୂର୍ବରୁ ଡ୍ରେସକୋଡ ସମ୍ପର୍କରେ ସୂଚିତ କରି ଦିଆଯାଇଥିଲା। କର୍ଣ୍ଣାଟକ କଲବର୍ଗିରେ ରବିବାର ନିଟ୍ ୟୁଜି ପରୀକ୍ଷା ବେଳେ ପରୀକ୍ଷା କେନ୍ଦ୍ର ନିକଟରେ ବ୍ରାହ୍ମଣ ସମୂଦାୟର ଛାତ୍ରଙ୍କ ପଇତା ଉତାରିବା ମାମଲା ସାମ୍ନାକୁ ଆସିଛି। ଏହା ବିରୋଧରେ ବ୍ରାହ୍ଣଣ ସମୂଦାୟର ସଦସ୍ୟମାନେ ପରୀକ୍ଷା କେନ୍ଦ୍ର ବାହାରେ ବିକ୍ଷୋଭ ପ୍ରଦର୍ଶନ କରିଛନ୍ତି।
ସେପଟେ ରାଜସ୍ଥାନ ପୋଲିସର ସ୍ୱତନ୍ତ୍ର ସ୍କ୍ୱାର୍ଡ ଜଣେ ନିଟ୍ ପରୀକ୍ଷାର୍ଥୀଙ୍କୁ ପ୍ରଶ୍ନପତ୍ର ଦେବାର ପ୍ରତିଶ୍ରୁତି ଦେଇ ୪୦ ଲକ୍ଷ ଟଙ୍କା ଠକିବାକୁ ଚେଷ୍ଟା କରୁଥିବା ୩ ଜଣଙ୍କୁ ଗିରଫ କରିଛି। ଭାରତରେ ଏମବିବିଏସ୍, ବିଡିଏସ୍ ଓ ଅନ୍ୟ ସ୍ନାତକ ଚିକିତ୍ସା ପାଠ୍ୟକ୍ରମରେ ପ୍ରବେଶ ନିମନ୍ତେ ପ୍ରତିବର୍ଷ ଲକ୍ଷଲକ୍ଷ ଛାତ୍ରଛାତ୍ରୀ ନିଟ୍ ୟୁଜି ପରୀକ୍ଷା ଦେଉଛନ୍ତି। ତେବେ ୨୦୨୪ ନିଟ ୟୁଜି ପରୀକ୍ଷା ପରିଚାଳନାକୁ ନେଇ ବିବାଦ ଦେଖାଯାଇଥିଲା। ଏଥିରେ ପେପର ଲିକ୍, ଅଧିକ ନମ୍ବର ଦିଆଯିବା ଓ ଗ୍ରେସ ମାର୍କ ଦିଆଯିବା ନେଇ ଆଇଗତ ସମସ୍ୟା ଉପୁଜିଥିଲା। ତେବେ ଏଥର ସେପରି କୌଣସି ଅଭିଯୋଗ ହେବ ନାହିଁ ବୋଲି ଅନୁମାନ କାରଯାଉଛି।
