ସନ୍ଧ୍ୟା ହେଲେ ବନ୍ଦ ହୋଇଯାଏ ଟିଭି- ମୋବାଇଲ, ଗ୍ରାମବାସୀଙ୍କ ନିଆରା ଉଦ୍ୟମର କାରଣ…

ଭୁବନେଶ୍ବର: ପିଲାଙ୍କୁ ମୋବାଇଲ୍ ନିଶାରୁ ମୁକ୍ତ କରିବା। ସେମାନେ ଯେପରି ପାଠପଢ଼ାରେ ଧ୍ୟାନ ଦେବେ ଏବଂ ପରିବାର ସହ ସମୟ ବିତାଇବେ ସେଦିଗରେ ଏକ ନିଆରା ପଦକ୍ଷେପ ନେଇଛି କର୍ଣ୍ଣାଟକର ବେଲାଗାଭି ଜିଲ୍ଲାର ହଲଗା ଗାଁର ଗ୍ରାମ ପଞ୍ଚାୟତ।

ପ୍ରକୃତରେ ପଞ୍ଚାୟତରେ ସର୍ବସମ୍ମତିକ୍ରମେ ଏକ ପ୍ରସ୍ତାବ ପାସ୍ ହୋଇଛି। ଏହା ଅନୁସାରେ ପିଲାମାନେ ପାଠପଢ଼ା ସମୟରେ ଟିଭି, ମୋବାଇଲ୍ ଫୋନ୍ ଏବଂ ଅନ୍ୟାନ୍ୟ ସମସ୍ତ ଡିଜିଟାଲ୍ ସ୍କ୍ରିନ୍ ବନ୍ଦ ରଖାଯିବ। ଏଥିପାଇଁ ପ୍ରତିଦିନ ରାତି ୭ଟାରୁ ୯ଟା ପର୍ଯ୍ୟନ୍ତ ଗାଁରେ 'ସ୍କ୍ରିନ୍ ବ୍ଲାକ୍ ଆଉଟ୍' ହୋଇଥାଏ। ପ୍ରତିଦିନ ସନ୍ଧ୍ୟା ୭ଟାରେ ସାଇରନ୍ ବଜାଇ ଏକ ସଙ୍କେତ ଦିଆଯାଏ। ଆଉ ସାଇରନ ଶୁଣିବା ମାତ୍ରେ ସମସ୍ତେ ମୋବାଇଲ ଓ ସ୍କ୍ରିନ୍ ବନ୍ଦ କରିଦିଅନ୍ତି। ଫଳରେ ଛାତ୍ରଛାତ୍ରୀମାନେ ଏକ ଶାନ୍ତିପୂର୍ଣ୍ଣ ଏବଂ ଅନୁକୂଳ ପାଠପଢ଼ା ପରିବେଶ ମିଳିଥାଏ। ଖାଲି ସେତିକି ନୁହେଁ ଲୋକଙ୍କ ପାଖାପାଖି ବସି ଖୁବ୍ ଖୁସିଗପ ମଧ୍ୟ କରିଥାନ୍ତି।

ତେବେ ପଞ୍ଚାୟତ ସଦସ୍ୟଙ୍କ ଅନୁଯାୟୀ, ଏହି ପଦକ୍ଷେପ ମହାରାଷ୍ଟ୍ରର ସାଙ୍ଗଲି ଜିଲ୍ଲା ନିକଟସ୍ଥ ଅଗ୍ରାନ ଧୂଲ୍ ଗାଁରେ ହୋଇଥିବା ସଫଳ ପରୀକ୍ଷଣ ପରେ ନିଆଯାଇଛି। ସେଠାରେ ମଧ୍ୟ ସ୍କ୍ରିନ୍ ବନ୍ଦ ରଖିବାର ସାମୂହିକ ନିଷ୍ପତ୍ତି ଦ୍ୱାରା ଛାତ୍ରଛାତ୍ରୀଙ୍କ ଶୈକ୍ଷିକ ପ୍ରଦର୍ଶନରେ ଉନ୍ନତି ଦେଖାଯାଇଥିଲା।

ଆହୁରି ମଧ୍ୟ କୁହାଯାଇଛି, ଗ୍ରାମପଞ୍ଚାୟତ ସଦସ୍ୟ ଏବଂ ସ୍ଥାନୀୟ ଶିକ୍ଷକମାନେ ଘରକୁ ଘର ଯାଇ ଅଭିଭାବକମାନଙ୍କୁ ଏହି ପଦକ୍ଷେପର ଗୁରୁତ୍ୱ ବୁଝାଉଛନ୍ତି। ଏହି ଦୁଇ ଘଣ୍ଟା ସମୟ ମଧ୍ୟରେ ପିଲାମାନଙ୍କ ସହିତ ସମୟ ବିତାଇବାକୁ ଏବଂ ସେମାନଙ୍କୁ ପଢ଼ିବା ପାଇଁ ଉତ୍ସାହିତ କରିବାକୁ ସେମାନଙ୍କୁ ଅନୁରୋଧ କରାଯାଉଛି। ପଞ୍ଚାୟତ ଅନୁଯାୟୀ, ଏହା କେବଳ ଏକ ନିୟମ ନୁହେଁ, ବରଂ ସାମାଜିକ ସହଯୋଗ ଉପରେ ଆଧାରିତ ଏକ ଅଭିଯାନ। ସମଗ୍ର ଗାଁର ସହଯୋଗରେ ପିଲାମାନଙ୍କର ଏକ ଉତ୍ତମ ଶିକ୍ଷାଗତ ପରିବେଶ ରହିବ ଏବଂ ପାଠପଢ଼ା ପ୍ରତି ସେମାନଙ୍କର ଆଗ୍ରହ ବୃଦ୍ଧି ପାଇବ। ଯଦି ଏହି ପରୀକ୍ଷଣ ସଫଳ ହୁଏ, ତେବେ ଏହାକୁ ବେଲାଗାଭି ଜିଲ୍ଲାର ଅନ୍ୟ ଗାଁରେ ମଧ୍ୟ କାର୍ଯ୍ୟକାରୀ କରାଯିବ।

ସୂଚନାଥାଉକି, ହଲଗା ଗାଁରେ ୧୪୫୨ ପରିବାର ଅଛନ୍ତି। ଗ୍ରାମ ପଞ୍ଚାୟତ ସଭାପତି ଲକ୍ଷ୍ମୀ ଗଜପତି କହିଛନ୍ତି ଯେ, ମୋବାଇଲ୍ ଫୋନ୍ ଏବଂ ଟେଲିଭିଜନ ବ୍ୟବହାର ବନ୍ଦ କରିବାକୁ ଗ୍ରାମବାସୀଙ୍କୁ ଅନୁରୋଧ କରାଯାଇଥିଲା ଏବଂ ସମସ୍ତେ ତାହା ଗ୍ରହଣ କରିଥିଲେ। ଗ୍ରାମର ଜଣେ ବାସିନ୍ଦା ନିଙ୍ଗାପ୍ପା କଳିଙ୍ଗ କହିଛନ୍ତି ଯେ ପିଲାମାନଙ୍କୁ ପଢ଼ିବାକୁ ଉତ୍ସାହିତ କରିବା ଏବଂ ପାରିବାରିକ ପାରସ୍ପରିକ କ୍ରିୟା ବୃଦ୍ଧି କରିବା ପାଇଁ ସେ ଏହି ନିଷ୍ପତ୍ତିକୁ ସମର୍ଥନ କରନ୍ତି।