ପିଲା ଦିନେ ଟ୍ରମ୍ପ ରହୁଥିବା ଘର ଏବେ ବିକ୍ରି ପାଇଁ ପ୍ରସ୍ତୁତ, ଦାମ୍‌ କେତେ ଜାଣନ୍ତୁ ?

ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନ୍ୟୁୟର୍କର କୁଇନ୍ସରେ ଥିବା ପିଲାଦିନର ଘର ପୁଣିଥରେ ବିକ୍ରୟ ପାଇଁ ପ୍ରସ୍ତୁତ । ବଜାରରେ ଏହି ଘରର ମୂଲ୍ୟ ପୁଣି ଥରେ ବୃଦ୍ଧି ପାଇଛି। ଏହାକୁ ୨.୩ ମିଲିୟନ ଡଲାରରେ ତାଲିକାଭୁକ୍ତ କରାଯାଇଛି । ଭାରତୀୟ ମୂଦ୍ରାରେ ଏହି ଘରର ମୂଲ୍ୟ  ପ୍ରାୟ ୨ କୋଟି ୫ ଲକ୍ଷ ୫୨ ହଜାର ଟଙ୍କା ହେବ । ନ୍ୟୁୟର୍କ ଟାଇମ୍ସ ଅନୁଯାୟୀ, ଘରଟି ସମ୍ପୂର୍ଣ୍ଣ ନବୀକରଣ ଏବଂ ପୁନଃସଜ୍ଜିତ ହୋଇଛି। ଟୁଡର ଶୈଳୀରେ ନିର୍ମିତ ଏହି ଘରଟି ୧୯୪୦ ମସିହାରେ ଟ୍ରମ୍ପଙ୍କ ପିତା ରିଅଲ୍ ଇଷ୍ଟେଟ୍ ଡେଭଲପର ଫ୍ରେଡ୍ ଟ୍ରମ୍ପଙ୍କ ଦ୍ୱାରା ନିର୍ମିତ ହୋଇଥିଲା। ଏହା ଜାମାଇକା ଇଷ୍ଟେଟ୍ସର ଉଚ୍ଚକୋଟୀର ପଡ଼ୋଶୀରେ ଅବସ୍ଥିତ। 

ଟ୍ରମ୍ପ ଚାରି ବର୍ଷ ବୟସ ପର୍ଯ୍ୟନ୍ତ ସେଠାରେ ରହୁଥିଲେ । ପରେ ତାଙ୍କ ପରିବାର ପାଖରେ ଥିବା ଏକ ବଡ଼ ଘରକୁ ଚାଲିଆସିଥିଲେ। ରିଅଲ୍ ଇଷ୍ଟେଟ୍ ଡେଭଲପର୍ ଟମି ଲିନ୍ ମାର୍ଚ୍ଚ ମାସରେ ୮.୩୫ ମିଲିୟନ ଡଲାରରେ ଘରଟି କିଣିଥିଲେ। ଏହା ପରେ ଘର ମରାମତି ଲାଗି ସେ ପ୍ରାୟ ୫ ଲକ୍ଷ ଡଲାର ଖର୍ଚ୍ଚ କରିଥିଲେ । ଉପରୁ ତଳ ପର୍ଯ୍ୟନ୍ତ ସମ୍ପୂର୍ଣ୍ଣ ନବୀକରଣକରିଥିଲେ। ଲିନଙ୍କ ଅନୁସାରେ, ଯେତେବେଳେ ସେ ଏହାକୁ କିଣିଥିଲେ ସେତେବେଳେ ଘରଟି ବାସପୋଯୋଗୀ ନଥିଲା । ଘରେ ପାଣି ଏବଂ ବିଦ୍ୟୁତ୍ ସମସ୍ୟା ଥିଲା । ଲିନ୍ ଘରଟି କିଣିବା ପୂର୍ବରୁ, ଏହା ମ୍ୟାନହଟନର ଜଣେ ପ୍ରାଇଭେଟ୍ ଇକ୍ୱିଟି ପାର୍ଟନର ମାଇକେଲ୍ ଡେଭିସଙ୍କ ମାଲିକାନାରେ ଥିଲା । ଯିଏ ଏହାକୁ ୧.୩୯ ମିଲିୟନ ଡଲାରରେ କିଣିଥିଲେ ଏବଂ ମରାମତି ମଧ୍ୟ କରାଇଥିଲେ । 

ସମ୍ପୂର୍ଣ୍ଣ ନବୀକରଣ ପରେ, ଘରେ ଏବେ ୫ଟି ବେଡ୍‌ ରୁମ, ତିନୋଟି ବାଥରୁମ୍,  ଏକ ବେସମେଣ୍ଟ ଏବଂ ଦୁଇ-କାର ରହିବା ଭଳି ଗ୍ୟାରେଜ ରହିଛି। ଘରେ ଏକ ଉଚ୍ଚମାନର ରୋଷେଇ ଘର ଭଳି ଆଧୁନିକ ସୁବିଧା ମଧ୍ୟ ରହିଛି। ପ୍ରାୟ ୨୫୦୦ ବର୍ଗଫୁଟର ଘରଟି ଏବେ ଟ୍ରମ୍ପ ସମର୍ଥକ ଏବଂ ରାଜନୈତିକ ବିରୋଧୀ ଉଭୟଙ୍କ ଦୃଷ୍ଟି ଆକର୍ଷଣ କରିଛି।

ଟ୍ରମ୍ପ ନିଜେ ଏହି ଘର ବିଷୟରେ ଅନେକ ଥର କହିଛନ୍ତି। ୨୦୧୬ରେ ଜିମି ଫାଲନଙ୍କ ସହିତ ଏକ ସାକ୍ଷାତକାରରେ ସେ କହିଥିଲେ ଯେ, ଘରର ଖରାପ ଅବସ୍ଥା ଦୁଃଖଦ ଥିଲା । କିନ୍ତୁ ଏହା ମଧ୍ୟ ଉଲ୍ଲେଖ କରିଥିଲେ ଯେ, ଏହିଠାରେ ତାଙ୍କର ଜନ୍ମ ହୋଇଥିଲା ଏବଂ ତାଙ୍କର ପିଲାଦିନର ସ୍ମୃତି  ଥିଲା। ପୂର୍ବରୁ, ଇଣ୍ଡିପେଣ୍ଡେଣ୍ଟ ରିପୋର୍ଟ କରିଥିଲା ​​ଯେ, ନ୍ୟୁୟର୍କରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପିଲାଦିନର ଘର ବିକ୍ରୟ ପାଇଁ ପ୍ରସ୍ତୁତ ।