ମୁମ୍ବାଇ ୮।୫: ମୁମ୍ବାଇ ଅନ୍ତର୍ଜାତୀୟ ବିମାନ ବନ୍ଦରକୁ ଯାତାୟାତ କରୁଥିବା ଯାତ୍ରୀଙ୍କୁ ମେ ୧୬ ତାରିଖରୁ ବର୍ଦ୍ଧିତ ୟୁଜର ଫି (ୟୁଡିଏଫ) ଦେବାକୁ ପଡିବ। ଏ ବାବଦେ ଯାତ୍ରୀଙ୍କ ଠାରୁ ୬୯୫ ଟଙ୍କା ପର୍ଯ୍ୟନ୍ତ ଆଦାୟ କରାଯାଇପାରେ। ଏୟାରପୋର୍ଟ ଫି ରେଗୁଲେଟର ଏୟାରପୋର୍ଟ ଅପରେଟରଙ୍କୁ ଫି ସଂଶୋଧନ ଅନୁମତି ମଞ୍ଜୁର କରିଛନ୍ତି। ଏୟାରପୋର୍ଟ ଇକୋନମିକ ରେଗୁଲେଟରୀ ଅଥରିଟି ଅଫ ଇଣ୍ଡିଆ (ଏଇଆରଏଆଇ) ୧୬ ମେ ୨୦୨୫ରୁ ୩୧ ମାର୍ଚ୍ଚ ୨୦୨୯ଅବଧି ଲାଗି ସଂଶୋଧିତ ୟୁଡିଏଫ ହାର ଧାର୍ଯ୍ୟ କରିଛନ୍ତି।
ଏହା ପୂର୍ବରୁ ମୁମ୍ବାଇ ଏୟାରପୋର୍ଟରୁ ପ୍ରସ୍ଥାନ କରୁଥିବା ଡୋମେଷ୍ଟିକ୍ ଯାତ୍ରୀ ପିଛା ଅଗଷ୍ଟ ୨୦୨୪ ପର୍ଯ୍ୟନ୍ତ ୧୨୦ ଟଙ୍କା ଓ ଅନ୍ତର୍ଜାତୀୟ ଯାତ୍ରୀଙ୍କ ପିଛା ୧୮୭ ଟଙ୍କା ଫି ଅସୁଲ କରୁଥିଲେ। ଏଇଆରଏଆଇ ୮ ମେ ଗୁରୁବାର ଜାରି ବୟାନରେ କହିଛନ୍ତି ଯେ ସବୁ ସମ୍ବଧିତ ହିତଧାରୀଙ୍କ ମଧ୍ୟରେ ଏରୋନଟିକ୍ସ ଶୁଳ୍କ ସମାନ ଆବଣ୍ଟନ ସୁନିଶ୍ଚିତ କରିବା ପାଇଁ ଏହି ପଦକ୍ଷେପ ନିଆଯାଇଛି। ଏୟାରପୋର୍ଟରୁ ଉଡାଣ କରିବାକୁ ଥିବା ଡୋମେଷ୍ଟିକ ଯାତ୍ରୀଙ୍କ ନିମନ୍ତେ ପ୍ରତି ପ୍ରସ୍ଥାନ ୟୁଡିଏଫ ୧୭୫ ଟଙ୍କା ହେବ। ସେହିପରି ଏୟାରପୋର୍ଟରେ ଅବତରଣ କରୁଥିବା ଅନ୍ତର୍ଜାତୀୟ ଯାତ୍ରୀଙ୍କ ନିମନ୍ତେ ଏହା ୭୫ ଟଙ୍କା ଧାର୍ଯ୍ୟ କରାଯାଇଛି।
ବୟାନ ଅନୁସାରେ ଅନ୍ତର୍ଜାତୀୟ ଉଡାଣ ନିମନ୍ତେ ୟୁଡିଏଫକୁ ‘ଇକୋନମୀ’ ଓ ‘ବିଜନେସ୍’ କ୍ଲାସ୍ ହିସାବରେ ଧାର୍ଯ୍ୟ କରାଯାଇଛି। ଅନ୍ତର୍ଜାତୀୟ ଯାତ୍ରା କରୁଥିବା ଇକୋନମୀ କ୍ଲାସ୍ ଯାତ୍ରୀଙ୍କ ନିମନ୍ତେ ପ୍ରତି ଯାତ୍ରୀ ୬୧୫ ଟଙ୍କା ଧାର୍ଯ୍ୟ କରାଯାଇଥିବା ବେଳେ ବିଜନେସ୍ କ୍ଲାସଙ୍କ ନିମନ୍ତେ ୬୯୫ ଟଙ୍କା ଧାର୍ଯ୍ୟ ହୋଇଛି। ଏହା ପୂର୍ବରୁ ଏହି ଶୁଳ୍କ କ୍ରମଶଃ ୩୦୪ ଓ ୨୬୦ ଟଙ୍କା ଆଦାୟ ହେଉଥିଲା। ଦେଶର ପ୍ରମୁଖ ଏୟାରପୋର୍ଟ ନିମନ୍ତେ ସମସ୍ତ ପ୍ରକାର ଶୁଳ୍କ ନିର୍ଦ୍ଧାରିତ କରିବାର ଅଧିକାର କେବଳ ଏଇଆରଏଙ୍କର ରହିଛି।
ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ଏୟାରପୋର୍ଟ (ସିଏସଏମଆଇଏ)ର ସଞ୍ଚାଳନ ମୁମ୍ବାଇ ଇଣ୍ଟରନ୍ୟାସନାଲ ଏୟାରପୋର୍ଟ ଲିମିଟେଡ (ଏମଆଇଏଏଲ) ଦ୍ୱାରା କରାଯାଉଛି। ଏମଆଇଏଏଲ ଆଦାନୀ ଗ୍ରୁପ ନେତୃତ୍ୱାଧୀନ ଏକ ଗ୍ରୁପ। ଏହି ଏୟାରପୋର୍ଟ ପ୍ରତି ବର୍ଷ ୩୫ ଲକ୍ଷରୁ ଊର୍ଦ୍ଧ୍ୱ ଯାତ୍ରୀଙ୍କୁ ସେବା ଯୋଗାଇ ଦେଇଥାଏ। ଏହା ଦେଶର ମୁଖ୍ୟ ଏୟାରପୋର୍ଟ କ୍ୟାଟଗରୀରେ ଆସୁଛି।
