ନୂଆଦିଲ୍ଲୀ: ଚେନ୍ନାଇ ସୁପର୍ କିଙ୍ଗ୍ସର ଅଧିନାୟକ ମହେନ୍ଦ୍ର ସିଂହ ଧୋନୀ ଶୁକ୍ରବାର ହାଇଦ୍ରବାଦ ବିପକ୍ଷ ମ୍ୟାଚ୍ ଖେଳିବାକୁ ଓହ୍ଲଇବା ସହ ଏକ ବଡ଼ ଉପଲବ୍ଧି ହାସଲ କରିବେ । ଧୋନୀଙ୍କ ଏହା ଟି-୨୦ କ୍ରିକେଟରେ ୪୦୦ତମ ମୁକାବିଲା ହେବ । ଏହାସହ ଏହି ଉପଲବ୍ଧି ହାସଲ କରିବାରେ ସେ ୨୫ତମ ଖେଳାଳି ହେବେ ।
ସିଏସ୍କେ ଓ ହାଇଦ୍ରାବାଦ ମଧ୍ୟରେ ଶୁକ୍ରବାର ଆଇପିଏଲ୍ ୨୦୨୫ର ମୁକାବିଲା ଚେନ୍ନାଇରେ ଖେଳାଯିବ । ଉଭୟ ଦଳ ପାଇଁ ଆଇପିଏଲ୍ ୧୮ତମ ସଂସ୍କରଣ ବର୍ତ୍ତମାନ ସୁଦ୍ଧା ଭଲ କଟିନି । ଦୁଇ ଟିମ୍ ଛଅଟି ଲେଖାଏଁ ପରାଜୟ ପରେ ଅଙ୍କ ତାଲିକାରେ ଏସଆରଏଚ୍ ନବମ ଓ ଚେନ୍ନାଇ ଦଶମ ସ୍ଥାନରେ ଅଛନ୍ତି । ଦୁଇ ଟିମ୍ ଲାଗି ଗୋଟିଏ ପରାଜୟ ପ୍ଲେ-ଅଫ୍ ରାସ୍ତା ବନ୍ଦ କରିଦେବ ।
ସିଏସ୍କେର ନିୟମିତ ଅଧିନାୟକ ଋତୁରାଜ ଗାଏକୱାଡ୍ ଆହତ କାରଣରୁ ଆଇପିଏଲ୍ ଅଧାରୁ ସଂସ୍କରଣରୁ ବାହାର ହୋଇଥିଲେ । ଏହାପରେ ଧୋନୀ ବଳକା ମ୍ୟାଚ୍ ପାଇଁ ଟିମ୍ର ଅଧିନାୟକ ହୋଇଛନ୍ତି । ଅନ୍ତରାଷ୍ଟ୍ରୀୟ କ୍ରିକେଟ୍ରୁ ଅବସର ନେଇସାରିଥିବା ଧୋନୀ ଚଳିତ ବର୍ଷ ଅନ୍କ୍ୟାପଡ୍ ଖେଳାଳି ଭାବେ ଖେଳୁଛନ୍ତି । ଧୋନୀଙ୍କ ନାଁରେ ଆଇପିଏଲ୍ରେ ୫ ଟ୍ରଫି ଅଛି । ଏହି କାରଣରୁ ସେ ଏହି ଲିଗର ସବୁଠୁ ସଫଳ ଅଧିନାୟକ ।
୪୦୦ ଟି-୨୦ ମୁକାବିଲା ଖେଳିବାରେ ଧୋନୀ ହେବେ ଚତୁର୍ଥ ଭାରତୀୟ ଖେଳାଳି । ତାଙ୍କ ପୂର୍ବରୁ ରୋହିତ ଶର୍ମା, ଡିନେଶ କାର୍ତ୍ତିକ ଓ ବିରାଟ କୋହଲି ଏହି ଫର୍ମାଟରେ ୪୦୦ ମ୍ୟାଚ୍ ଖେଳି ସାରିଛନ୍ତି । ରୋହିତ୍ ଶର୍ମା ୪୫୬ ମ୍ୟାଚ୍ ସହ ସବୁଠୁ ଅଧିକ ଟି-୨୦ ମ୍ୟାଚ୍ ଖେଳିଥିବା ଭାରତୀୟ । ଦ୍ୱିତୀୟ ସ୍ଥାନରେ ୪୧୨ ମ୍ୟାଚ୍ ସହ ଡିନେଶ କାର୍ତ୍ତିକ ଅଛନ୍ତି । ବିରାଟ କୋହଲି ୪୦୭ ମ୍ୟାଚ୍ ସହ ତୃତୀୟ ସ୍ଥାନରେ ଅଛନ୍ତି ।
