ୱାସିଂଟନ ୩୦।୮: ଆମେରିକାର ଏକ କୋର୍ଟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ଭାରତ ସମେତ ବିଭିନ୍ନ ଦେଶ ଉପରେ ଲଗାଯାଇଥିବା ଆମଦାନୀ ଶୁଳ୍କ (ଟାରିଫ)କୁ ନେଇ କଡ଼ା ମନ୍ତବ୍ୟ ଦେଇଛନ୍ତି। କୋର୍ଟ ଶୁକ୍ରବାର କହିଛନ୍ତି ଯେ ସବୁ ଦେଶଙ୍କ ଉପରେ ଟାରିଫ ଲାଗୁ କରିବାର ଅଧିକାର ଟ୍ରମ୍ପଙ୍କର ନାହିଁ। ଏଣୁ ଅଧିକାଂଶ ଟାରିଫ ବେଆଇନ। ତେବେ ଅପିଲ କୋର୍ଟ ଟାରିଫ ଉପରେ କୌଣସି କଟକଣା ଲଗାଇ ନାହାନ୍ତି। ଏହା ଏବେ ଲାଗୁ ରହିବ ଯାହା ଦ୍ୱାରା ଟ୍ରମ୍ପ ପ୍ରଶାସନ ଏହାକୁ ସୁପ୍ରିମକୋର୍ଟରେ ଅପିଲ କରିପାରିବ।
କୋର୍ଟ ସ୍ପଷ୍ଟ ରୂପେ କହିଛନ୍ତି ଯେ ଜାତୀୟ ଜରୁରୀ ଘୋଷଣା କରି ବିଶ୍ୱରେ ଟ୍ୟାକ୍ସ ଲାଗୁ କରିବା ଉଚିତ ନୁହେଁ। କୋର୍ଟରେ ଏହି ରାୟ ୭-୪ର ବହୁମତରେ ଗୃହୀତ ହୋଇଛି। ବିଚାରପତିମାନେ ଟିପ୍ପଣୀ କରିଛନ୍ତି ଯେ କଂଗ୍ରେସ ରାଷ୍ଟ୍ରପତିଙ୍କୁ ଅସିମୀତ ଅଧିକାର ଦେଇଥିବା ମନେ କରାଯାଉ ନାହିଁ। କୋର୍ଟ କହିଛନ୍ତି ଯେ ଟ୍ରେଡ ଡେଫିସିଟ୍ କୌଣସି ବିପଦ ନୁହେଁ। ଗତ ୪୯ ବର୍ଷ ହେଲା ଆମେରିକା ଲଗାତାର କ୍ଷତିରେ ଚାଲିଛି। ନ୍ୟୁୟର୍କ ଟ୍ରେଡ କୋର୍ଟ ମଧ୍ୟ ଗତ ମେ ମାସରେ କହିଥିଲେ ଯେ ଲିବରେସନ ଡେ ଟାରିଫ ରାଷ୍ଟ୍ରପତିଙ୍କ ଶକ୍ତିରୁ ବାହାରେ।
କାନାଡା, ଚୀନ ଓ ମେକ୍ସିକୋ ଉପରେ ଲଗାଯାଇଥିବା ଟାରିଫ ମଧ୍ୟ ଆଇନତଃ ସର୍ତ୍ତ ପାଳନ କରୁ ନାହିଁ। ତେବେ ଏ ନେଇ କୋର୍ଟ ଏପରି କହିଲେ ବିପୁଳ କ୍ଷତି ହେବ ବୋଲି ସରକାର ତର୍କ ଦେଇଛନ୍ତି। କହିଛନ୍ତି ଯେ ଯଦି ଟାରିଫ ହଟିଲା ତେବେ ସରକାରଙ୍କୁ ଏହା ଫେରାଇବାକୁ ପଡିବ। ଏ ବାବଦେ ବିପୁଳ ଡଲାର ବ୍ୟୟ ହେବ। ଏଥିରେ ଜୁଲାଇ ମାସ ସୁଦ୍ଧା ୧୫୯ ବିଲିୟନ ଡଲାର ଅସୁଲ ହୋଇଛି, ଯାହା ଗତବର୍ଷ ଅସୁଲ ହୋଇଥିବା ଶୁଳ୍କର ଦୁଇ ଗୁଣା। ଯଦି କୋର୍ଟ-୧ ଏପରି କୌଣସି ନିଷ୍ପତ୍ତି ନିଅନ୍ତି ତେବେ ଆମେରିକା ବରବାଦ ହୋଇଯିବ।
