ବିହାର ବିଧାନସଭା ନିର୍ବାଚନ: ନିତିଶ ନା ତେଜସ୍ୱୀ ଆଗରେ ଅଛନ୍ତି କିଏ? ସର୍ଭେରେ ଆସିଛି ଚମକାଇବା ଭଳି ରିପୋର୍ଟ

ପାଟନା ୩୧।୧୦:  ବିହାର ବିଧାନସଭା ନିର୍ବାଚନ ୨୦୨୫ ଏବେ ଏକ ନିର୍ଣ୍ଣାୟକ ମୋଡ଼ରେ ପହଞ୍ଚି ଯାଇଛି। ଭୋଟ ଭାଇଭର ତାଜା ସର୍ଭେ (ଭଲ୍ୟୁମ ୪,୨୫ ଅକ୍ଟୋବର) ଏବେ ରାଜ୍ୟ ରାଜନୀତିରେ ହଲଚଲ ସୃଷ୍ଟି କରିଛି। ସର୍ଭେ ଅନୁସାରେ ଏଥର ନିର୍ବାଚନରେ ପ୍ରଥମ ଥର ପାର୍ଟିମାନେ ଅତି ନିକଟ ପ୍ରତିଦ୍ୱନ୍ଦ୍ୱୀତାରେ ହାରଜିତର ସମ୍ମୁଖୀନ ହେବା ନିଶ୍ଚିତ । ଏଥିରେ ଫଳାଫଳ କାହାରି ଆଡକୁ ବି ଯାଇ ପାରେ। ମହାମେଣ୍ଟ (ଏମଜିବି) ଓ ଏନଡିଏ ମଧ୍ୟରେ ମାତ୍ର ୦.୩%ର ଦୂରତା ରହୁଛି। ଏହାର ଅର୍ଥ ହେଉଛି ନିତିଶ କୁମାର ଓ ତେଜସ୍ୱୀ ଯାଦବଙ୍କ ମଧ୍ୟରେ ବାସ୍ତବ ପ୍ରତିଦ୍ୱନ୍ଦ୍ୱୀତା ଏବେ ବୁଥ ସ୍ତରରେ ହେବ।

ସର୍ଭେରେ ନିତିଶ କୁମାର ଓ ତେଜସ୍ୱୀ ଯାଦବଙ୍କ ମଧ୍ୟରେ କଣ୍ଟାରେ ଟକ୍କର ହେଉଛି। ତେବେ ଆସନ୍ତୁ ଜାଣିବା ନିର୍ବାଚନ ପୂର୍ବରୁ ଆସିଥିବା ସର୍ଭେ ରିପୋର୍ଟର ଫଳାଫଳ କହୁଛି କ’ଣ?

ସର୍ଭେରେ ତେଜସ୍ୱୀଙ୍କ ଏମଜିବିକୁ ୩୪.୭% ଭୋଟ ମିଳୁଥିବା ବେଳେ ଏନଡିଏକୁ ୩୪.୪% ଭୋଟ ସେୟାର ମିଳୁଥିବାର ଅନୁମାନ କରାଯାଇଛି। ଏଥିରେ ପ୍ରଶାନ୍ତ କିଶୋରଙ୍କ ଜନସୁରାଜ ପାର୍ଟି ତୃତୀୟ ସାମୁଖ୍ୟ ଭାବେ ସାମ୍ନାକୁ ଆସୁଥିବା ବେଳେ ୧୨.୩% ଭୋଟ ଭାଗିଦାରୀ ସହ ନିଜ ଉପସ୍ଥିତି ଜାହିର କରୁଛି। ତେବେ ସବୁଠୁ ଆଚମ୍ବିତ କରିବା ଭଳି କଥା ଯାହା ତାହା ହେଉଛି ୮.୪% ଭୋଟର ଏବେବି ‘ଝୁଲା ବିଧାନସଭା’ ଅର୍ଥାତ ଅଧାଅଧୁରା ସଂଖ୍ୟା ଗରିଷ୍ଠତା ସ୍ଥିତି ପ୍ରଦର୍ଶନ କରୁଛନ୍ତି।  

ସର୍ଭେ ଅନୁସାରେ ୬୬.୨% ଲୋକଙ୍କ କହିବା କଥା ହେଉଛି ଛଟ ପୂଜା ପରେ ପ୍ରବାସୀ ଶ୍ରମିକ ବିହାର ଫେରିବେ। ସେମାନଙ୍କ ଉପସ୍ଥିତିରେ ଭୋଟ ପ୍ରତିଶତ ବଦଳିଯିବ। ଅର୍ଥାତ ଯେଉଁ ଭୋଟର ଏବେ ବାହାରେ ଅଛନ୍ତି ସେମାନେ ନିର୍ବାଚନର ଫଳାଫଳ ନିର୍ଣ୍ଣୟ କରିବେ । ଖାସ ଏହି କାରଣରୁ ସବୁ ରାଜନୈତିକ ଦଳ ସେମାନଙ୍କ ନିର୍ବାଚନ ପ୍ରଚାରକୁ ଗ୍ରାମାଞ୍ଚଳକୁ ନେଇ ଯାଇଛନ୍ତି। ଏହା ଛଡା ବିହାର ବିଧାନସଭା ନିର୍ବାଚନରେ ପ୍ରଥମ ଥର ଭୋଟର ଜାତି ବଦଳେ ପାର୍ଟି ପ୍ରତି ଆସ୍ଥା ପ୍ରଦର୍ଶନ କରୁଛନ୍ତି।  ଏପରି ଭୋଟରଙ୍କ ପ୍ରତିଶତ ୫୧.୧%ରୁ ମଧ୍ୟ ଅଧିକ।

Bihar Elections 2025 | Vote Vibe's State Vibe Vol 4

Win perception: Virtually tied
MGB: 34.7% | NDA: 34.4%

Critical swing factor: 66% believe migrant workers will vote post-Chhath Puja

Jan Suraj perception at 12.3% | Hung Assembly: 8.4%

A tight, multi-cornered contest.

Full… pic.twitter.com/rcFVWNWCiq

— Vote Vibe (@VoteVibeIndia) October 25, 2025

ଏହି ଟ୍ରେଣ୍ଡ ଖାସ କରି ସହରାଞ୍ଚଳ ଓ ଯୁବ ଭୋଟରଙ୍କ ଠାରେ ଦେଖାଯାଉଛି। ଏଣୁ ରାଜନୈତିକ ଦଳଙ୍କୁ ସ୍ପଷ୍ଟ ଆଭିମୁଖ୍ୟ ଓ ନିର୍ଭର ଯୋଗ୍ୟ ଚେହେରାଙ୍କ ଉପରେ ଆସ୍ଥା ରଖିବାକୁ ପଡିବ। ସେହିମାନେ ହିଁ ଜନତାଙ୍କ ବିଶ୍ୱାସ ଜିତି ପାରିବେ। ତେଜସ୍ୱୀ ଯାଦବ ତାଙ୍କ ପ୍ରଚାରରେ ୧୦ଲକ୍ଷ ନିଯୁକ୍ତିକୁ ପ୍ରସଙ୍ଗ କରିଛନ୍ତି। ତେବେ ସର୍ଭେ ଅନୁସାରା ୪୮% ଭୋଟର ଏହାକୁ କେବଳ ଏକ ନିର୍ବାଚନୀ ସ୍ଲୋଗାନ ଭାବୁଛନ୍ତି। ହେଲେ ୫୦% ଲୋକଙ୍କ କହିବା କଥା ହେଉଛି ଏହା ନିତିଶ କୁମାରଙ୍କ ୧୦,୦୦୦ ଟଙ୍କା ସହାୟତା ଯୋଜନାର ମୁକାବିଲା କରିପାରିବ।

ଅର୍ଥାତ ରୋଜଗାର ଏବେବି ନିର୍ବାଚନରେ ସବୁଠୁ ବଡ଼ ପ୍ରସଙ୍ଗ ହୋଇ ରହିଛି ଓ ଲୋକଙ୍କ ମଧ୍ୟରେ ସନ୍ଦେହ ଏବଂ ଆଶାର ମିଶ୍ରିତ ପ୍ରଭାବ ରହିଛି। ସର୍ଭେର ଆଉ ଏକ ଫଳାଫଳ ହେଉଛି ନିତିଶ କୁମାରଙ୍କ ଶାସନକୁ ୫୬.୭% ଲୋକେ  ଲାଲୁ ଓ ରାବଡୀଙ୍କ ଶାସନ ଠାରୁ ଅନେକ ଗୁଣାରେ ଭଲ ବୋଲି କହିଛନ୍ତି। ଏଥିରୁ ସ୍ପଷ୍ଟ ଜଣାପଡୁଛି ଯେ ବିକାଶ, ବିଜୁଳି, ସଡ଼କ ଓ ଆଇନଶୃଙ୍ଖଳା ମାମଲାରେ ଏବେବି ଲୋକେ ନିତିଶଙ୍କ ଉପରେ ଦୃଢ ବିଶ୍ୱାସ କରୁଛନ୍ତି। ହେଲେ କିଛି ଭୋଟର ବିଜେପି ସହିତ ମେଣ୍ଟ ଯୋଗୁ ତାଙ୍କୁ ପୁରୁଣା ନିତିଶ ଭାବେ ଦେଖୁ ନାହାନ୍ତି।

ସେପଟେ ଜନସୁରାଜର ସଂସ୍ଥାପକ ପ୍ରଶାନ୍ତ କିଶୋର ଯିଏ ଏବେ ଜନତାଙ୍କ ମଧ୍ୟରେ ‘ପରିବର୍ତ୍ତନ’ ଯାତ୍ରା ଚଳାଇଛନ୍ତି ଧିରେ ଧିରେ ନିଜ ପାଇଁ ମାର୍ଗ ପ୍ରଶସ୍ତ କରୁଛନ୍ତି। ଜନସୁରାଜର ୧୨.୩% ଭୋଟ ସେୟାର ଏକ ବଡ଼ ଉପଲବ୍ଧି ମନେ କରାଯାଉଛି। ରାଜନୈତିକ ବିଶେଷଜ୍ଞଙ୍କ ଅନୁସାରେ ଯଦି ପ୍ରଶାସନ୍ତ କିଶୋର ଏହି ଧାରା ବଜାୟ ରଖନ୍ତି ତେବେ ସେ ନିର୍ବାଚନରେ ୨୦-୨୫ ପର୍ଯ୍ୟନ୍ତ ଆସନ ହାତେଇ ନେଇ ପାରନ୍ତି।  

ଭୋଟ ଭାଇଭ ସର୍ଭେ ୧୫ରୁ ୧୯ ଅକ୍ଟୋବର ମଧ୍ୟରେ କରାଯାଇଥିଲା। ଏଥିରେ ମୋଟ ୧୦,୮୫୯ଙ୍କ ସହ କଥାବାର୍ତ୍ତା କରାଯାଇଥିଲା। ଏଥିରେ ଗ୍ରାମାଞ୍ଚଳରୁ ୩୦% ଭୋଟର ଥିବା ବେଳେ ସହରାଞ୍ଚଳର ୭୦% ଭୋଟର ସାମିଲ ହୋଇଥିଲେ। ଏଥିରେ ୫୨% ପୁରୁଷଙ୍କୁ ସାମିଲ କରାଯାଇଥିବା ବେଳେ ୪୮% ମହିଳା ସାମିଲ ଥିଲେ। ସର୍ଭେର ମାର୍ଜିନ ଅଫ ଏରର +/-୩% ରହିଛି। ଅର୍ଥାତ ଫଳାଫଳରେ ସାମାନ୍ୟ ଏପଟସେପଟ ହେଲେ ପୁରା ଗଣିତ ବଦଳିଯିବ।

ଭୋଟ ଭାଇଭ ତଥ୍ୟରୁ ଏହା ସ୍ପଷ୍ଟ ଯେ ବିହାର ରାଜନୀତି ଏଥର ପୂର୍ବାପେକ୍ଷା ଅଧିକ ରୋମାଞ୍ଚକ ହେବ। ନିତିଶ ତାଙ୍କର ବିକାଶ ରାଜନୀତି ଆଧାରରେ ଜନତାଙ୍କ ନିକଟକୁ ପହଞ୍ଚୁଥିବା ବେଳେ ତେଜସ୍ୱୀ ବେକାରୀ ଓ ଯୁବ ବର୍ଗଙ୍କ ଆଧାରରେ ଜନତାଙ୍କ ପର୍ଯ୍ୟନ୍ତ ପହଞ୍ଚୁଛନ୍ତି। ଏଥିରେ ପ୍ରଶାନ୍ତ କିଶୋର ତୃତୀୟ ବିକଳ୍ପ ରୂପେ ଧିରେ ଧିରେ ନିଜର ପରିସର ବଢାଇବାରେ ଲାଗିଛନ୍ତି। ତେବେ ଏଥର ପ୍ରଶ୍ନ ହେଉଛି ନିତିଶଙ୍କ ଅଭିଜ୍ଞତା ତେଜସ୍ୱୀଙ୍କ ଯୁବ ଲହର ଉପରେ ପ୍ରଭାବ ପକାଇ ପାରିବ ତ? ନା ବିହାର ପୁଣି ଥରେ ନୂଆ ରାଜନୈତିକ ସମୀକରଣର ସାକ୍ଷ ହେବ?