ଭୁବନେଶ୍ଵର: OPSC ଏବଂ OSSC ପରୀକ୍ଷା ବିଭ୍ରାଟକୁ ନେଇ ତେଜିଛି ଅସନ୍ତୋଷ । ଛାତ୍ରଛାତ୍ରୀମାନେ ପରୀକ୍ଷା ବାତିଲ କରିବାକୁ ଦାବି କରିଥିବା ବେଳେ ଏହାକୁ ନେଇ ଆରମ୍ଭ ହୋଇଛି ରାଜନୀତି । ପରୀକ୍ଷାରେ ବିଭ୍ରାଟକୁ ନେଇ ବିରୋଧୀ ସରକାରଙ୍କୁ ଦାୟୀ କରିଥିବା ବେଳେ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ କହିଛନ୍ତି ଏଥିରେ ଯାହାର ଦୋଷ ତ୍ରୁଟି ରହିଛି ସରକାର ତଦନ୍ତ ପଦକ୍ଷେପ ଗ୍ରହଣ କରିବେ ।
OPSC ଏବଂ OSSC ପରୀକ୍ଷାରେ ପୁଣି ବିଭ୍ରାଟ । ବିଭ୍ରାଟକୁ ନେଇ ଛାତ୍ରଛାତ୍ରୀଙ୍କ ଭିତରେ ତେଜୁଛି ଅସନ୍ତୋଷ । ପରୀକ୍ଷା ବାତିଲ କରିବା ସହ ସାନି ପରୀକ୍ଷା କରିବାକୁ ଉଠିଛି ଦାବି । ଓଡ଼ିଶା ଷ୍ଟାଫ୍ ସିଲେକ୍ସନ କମିଶନ ୨୧ଟି ASI ଟ୍ରାଫିକ୍ ପଦବୀ, ୧୦ଟି ASI ଏକ୍ସାଇଜ୍ ପଦବୀ ପାଇଁ ମିଳିତ ପରୀକ୍ଷା କରିଥିଲେ । ହେଲେ ଯେଉଁ ବିଷୟ ସବୁ ଆସିବା କଥା ତାହା ବଦଳରେ ଅଲଗା ବିଷୟରେ ପ୍ରଶ୍ନ ଆସିଥିଲା । ସେହିଭଳି ଓଡ଼ିଶା ପବ୍ଲିକ ସର୍ଭିସ୍ କମିଶନ ପକ୍ଷରୁ ଆୟୋଜିତ ଓଡ଼ିଶା ସିଭିଲ ସର୍ଭିସ ପରୀକ୍ଷାରେ ଆନ୍ଥ୍ରୋପଲୋଜିର ପେପର -୧ ଓ ପେପର -୨ ପ୍ରଶ୍ନପତ୍ର ଅଦଳବଦଳ ହୋଇଯାଇଛି । ପରୀକ୍ଷାରେ ଏଭଳି ତ୍ରୁଟିକୁ କର୍ତ୍ତୃପକ୍ଷ ମାନିଥିବା ବେଳେ ପରୀକ୍ଷା ବାତିଲ ହେବ କି ନାହିଁ ସେନେଇ କୌଣସି ସ୍ପଷ୍ଟ କରିନାହାନ୍ତି । ଏମିତିରେ ପରୀକ୍ଷାର୍ଥୀଙ୍କ ଭିତରେ ତେଜିଛି ଅସନ୍ତୋଷ । ଆଜି OPSC ଅଫିସ ଘେରାଉ କରିଥିଲେ ଅସନ୍ତୁଷ୍ଟ ପରୀକ୍ଷାର୍ଥୀ ।
ସେପଟେ ନିଯୁକ୍ତି ପରୀକ୍ଷାରେ ଏଭଳି ବିଭ୍ରାଟକୁ ନେଇ ତେଜିଛି ରାଜନୀତି । ବିଜେଡି କହିଛି, ବିଗତ ୬ମାସ ଭିତରେ ୧୨ଟି ବଡ଼ ପରୀକ୍ଷାରେ ସ୍କାମ୍ ହୋଇଛି । ପରୀକ୍ଷା ପରିଚାଳନାରେ ତ୍ରୁଟି ରହିଛି । OPSC ଏବଂ OSSC ପରୀକ୍ଷାରେ ତ୍ରୁଟି କେମିତି ହେଲା ସରକାର ତା’ର ଜବାବ୍ ରଖନ୍ତୁ ବୋଲି କହିଛନ୍ତି ବିଜେଡି ମୁଖପାତ୍ର ଲେନିନ୍ ମହାନ୍ତି । ସେହିଭଳି କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ କହିଛନ୍ତି ବାରମ୍ବାର ଏଭଳି ବିଭ୍ରାଟ ହେଉଛି । ଏଥିପାଇଁ ସରକାର ଦାୟୀ । ବିରୋଧୀଙ୍କୁ ଜବାବ୍ ଦେଇ ଉଚ୍ଚ ଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ କହିଛନ୍ତି ତଦନ୍ତ କରି ଦୋଷୀଙ୍କ ବିରୋଧରେ କାର୍ଯ୍ୟନୁଷ୍ଠାନ ନିଆଯିବ । ସରକାରଙ୍କ ଆଭିମୁଖ୍ୟ ସ୍ପଷ୍ଟ ଅଛି।
ପୂର୍ବ ସରକାର ସମୟରେ ହେଉଥିବା ପାତର ଅନ୍ତରରେ ସମ୍ପୂର୍ଣ୍ଣ ରୋକ୍ ଲାଗିଛି। ଏନେଇ ଗତ ବିଧାନସଭା ଅଧିବେଶନରେ ଆଇନ୍ ଅଣାଯାଇଛି। ଏହି ଆଇନ ଯେତେ ପରିମାଣରେ କାର୍ଯ୍ୟକାରୀ ହେବ ସେତେ ପରିମାଣରେ ଏହିଭଳି ବିଭ୍ରାଟ କମିବ । ପରୀକ୍ଷା ବିଭ୍ରାଟକୁ ନେଇ ପରୀକ୍ଷାର୍ଥୀଙ୍କ ଭିତରେ ଅସନ୍ତୋଷ ତେଜିବା ସହ ଏହାକୁ ନେଇ ରାଜନୀତି ବି ତେଜିଛି । ଏବେ ଅପେକ୍ଷା ସରକାରଙ୍କ ପଦକ୍ଷେପକୁ ।
