ନୂଆଦିଲ୍ଲୀ ୧୪।୦୪ : ପଳାତକ ହୀରା ବ୍ୟବସାୟୀ ମେହୁଲ୍ ଚୋକ୍ସି ଗିରଫ । ପିଏନ୍ବି ଘୋଟାଲା ମାମଲାର ଅଭିଯୁକ୍ତ ମେହୁଲ ଚୋକସି ଗିରଫ ହୋଇଛି । ବେଲଜିୟମରୁ ମେହୁଲ ଚୋକସି ଗିରଫ ହୋଇଥିବା ସୂଚନା ମିଳିଛି । ପିଏନ୍ବି ଦୁର୍ନୀତି ମାମଲାରେ ଫେରାର ଥିଲେ ହୀରା ବ୍ୟବସାୟୀ ମେହୁଲ ଚୋକସି । ଭାରତ ସରକାରଙ୍କ ଅପିଲ ପରେ ବେଲଜିୟମରେ ଗିରଫ ହୋଇଛି ମେହୁଲ। ୧୩ ହଜାର କୋଟି ଟଙ୍କାର ଠକେଇ ଅଭିଯୋଗ ରହିଛି । ଖୁବଶୀଘ୍ର ମେହୁଲକୁ ଭାରତ ଆଣିବାକୁ ପ୍ରୟାସ କରାଯିବ ।
ମେହୁଲ ଚୋକସୀ ଗତ କିଛି ଦିନ ଧରି ଚିକିତ୍ସା ପାଇଁ ବେଲଜିୟମ୍ ଯାଇଥିବା ବେଳେ ପୋଲିସ ଗିରଫ କରିଛି । ଏବେ ସେ ବେଲଜିୟମ୍ ଜେଲରେ ଅଛି । ମେହୁଲ ଚୋକସୀ ଉପରେ ୧୩ ହଜାର ୮୫୦କୋଟି ଟଙ୍କା ଘୋଟାଲା ନେଇ ଅଭିଯୋଗ ରହିଛି । ଗତ ମାସରେ ହିଁ ଜଣା ପଡିଥିଲା ଯେ ମେହୁଲ ବେଲଜିୟମରେ ଅଛି । ମେହୁଲକୁ ବେଲଜିୟମ୍ ପୋଲିସ ଦୁଇଟି ମାମଲାରେ ଗିରଫ କରିଛି । ନିଜର ସ୍ବାସ୍ଥ୍ୟଗତ ସମସ୍ୟା ଦର୍ଶାଇ ତୁରନ୍ତ ଜାମିନ ପାଇବା ଲାଗି ଚେଷ୍ଟା କରିପାରେ । ୨୦୨୩ ନଭେମ୍ବର ୧୫ ତାରିଖରେ ମେହୁଲ ଚୋକସୀ ନିଜର ବେଲଜିୟମ୍ ପତ୍ନୀ ଜରିଆରେ ନାଗରିକତା କାର୍ଡ ହାସଲ କରିଥିଲା । ତେବେ ମେହୁଲ ଏନେଇ ଜାଲ୍ ଦସ୍ତାବେଜ୍ ଦେଇଥିବା ଅଭିଯୋଗ ରହିଛି । ବେଲଜିୟମ୍ ଆଗରୁ ମେହୁଲ ଏଣ୍ଟିଗୁଆର ନାଗରିକତା ଗ୍ରହଣ କରିଥିଲା ।
ସୂଚନାଯୋଗ୍ୟ ଯେ, ୨୦୧୮ରେ ମେହୁଲ ଚୋକସୀ ଏବଂ ତାର ଭଣଜା ନୀରବ ମୋଦି ଦେଶ ଛାଡି ପଳାଇଥିଲେ । ୨୦୧୮ରେ ଭାରତ ଛାଡିବା ଆଗରୁ ୨୦୧୭ରେ ସେ ଏଣ୍ଟିଗୁଆର ନାଗରିକତା ହାସଲ କରିଥିଲା । ସ୍ବାସ୍ଥ୍ୟଗତ କାରଣ ଦର୍ଶାଇ ସେ ଭାରତ ଆସି କୋର୍ଟରେ ହାଜିରା ଦେବାକୁ ମନା କରିଥିଲା । ଭାରତରେ ତାର ଅନେକ ସମ୍ପତ୍ତି ଜବତ କରାଯାଇଛି । ୨୦୨୧ରେ ମେହୁଲ ଚୋକସୀ ଏଣ୍ଟିଗୁଆର ପଡୋଶୀ ଦେଶ ଡୋମିନିକାରେ ଗିରଫ ହୋଇ ଜେଲ୍ ରେ ୫୧ ଦିନ ରହିଥିଲା । ତାର ପ୍ରତ୍ୟାର୍ପଣ ପାଇଁ ସିବିଆଇ ଟିମ୍ ଡୋମିନିକା ପହଞ୍ଚିଥିଲା । ବ୍ରିଟିଶ୍ କ୍ବିନ୍ ପ୍ରିଭି କାଉନସିଲ୍ ପାଖରୁ ତାକୁ ଆଶ୍ବସ୍ତି ମିଳିଯାଇଥିଲା । ତାକୁ ପୁଣି ଥରେ ଏଣ୍ଟିଗୁଆ ପଠାଇ ଦିଆଯାଇଥିଲା । ଏବେ ବେଲଜିୟମ୍ ରେ ଧରାପଡି ଜେଲ୍ ରେ ଥିବା ମେହୁଲ ଚୋକସୀକୁ ଭାରତ ଆଣିବା ଲାଗି ସିବିଆଇ ଏବଂ ଇଡି ଚେଷ୍ଟା କରିବ ।
