ନୂଆଦିଲ୍ଲୀ : ଚୀନରେ ଆୟୋଜିତ ହେଉଥିବା ଏସ୍ସିଓ ଶିଖର ସମ୍ମିଳନୀରେ ରୋବୋଟିକ୍ସର ମଧ୍ୟ ଜଲୱା ଦେଖିବାକୁ ମିଳିବ। ଏହି ସମୟରେ ଏକ ହ୍ୟୁମନୋଏଡ୍ ରୋବୋ ମିଡ଼ିଆ ଲୋକଙ୍କୁ ସହଯୋଗ କରିବା ପାଇଁ ଉପସ୍ଥିତ ରହିବ। ଚୀନର ତିୟାନଜିନ ସହରରେ ସାଂଘାଇ ସହଯୋଗ ସଙ୍ଗଠନ (ଏସସିଓ) ଶିଖର ସମ୍ମିଳନୀର ଆୟୋଜନ ହେଉଛି। ଏହି ସମ୍ମିଳନୀରେ ୨୦ରୁ ଅଧିକ ଦେଶର ରାଷ୍ଟ୍ରାଧ୍ୟକ୍ଷ ଉପସ୍ଥିତ ରହିବେ। ଏହି ସମ୍ମିଳନୀ ୩୧ ଅଗଷ୍ଟରୁ ୧ ସେପ୍ଟେମ୍ୱର ଯାଏ ଚାଲିବ।
ଚଳିତ ଥର ଏସସିଓ ଶିଖର ସମ୍ମିଳନୀରେ ଇନୋଭେସନ ଓ ଟେକ୍ନୋଲଜିର ସଙ୍ଗମ ମଧ୍ୟ ଦେଖିବାକୁ ମିଳିବ। ଏହି ସମୟରେ ଏକ ହ୍ୟୁମନୋଏଡ୍ ରୋବୋଟ, ଜିୟାଓ ହେ କୁ ଏଠାରେ ମୁତୟନ କରାଯାଇଛି। ଏହି ରୋବୋଟ ଭିନ୍ନ ଭିନ୍ନ ଭାଷା କହିବାରେ ସକ୍ଷମ। ଏହା ବିଭିନ୍ନ ଦେଶରୁ ଆସିଥିବା ସାମ୍ୱାଦିକଙ୍କ ସାହାଯ୍ୟ କରିବ। ଏଏନଆଇ ଏହି ରୋବୋଟ ସହ କଥାବାର୍ତ୍ତା ହୋଇଛି। ଏହି କଥାବାର୍ତ୍ତାରେ ସେ ନିଜର ପରିଚୟ ଦେଇ କହିଛି ଯେ, ସେ ଟେକ୍ନିକାଲ ଭାବେ ସଂପୂର୍ଣ୍ଣ ରୂପେ ଦକ୍ଷ। ତାକୁ ଏହି ଶିଖର ସମ୍ମିଳନୀ ପାଇଁ ହିଁ ଡିଜାଇନ କରାଯାଇଛି। ସେ ଭିନ୍ନ ଭିନ୍ନ ଭାଷାରେ ସହାୟତା ଦେବ। ଏହାସହ ରିୟଲ ଟାଇମ୍ରେ ସବୁ ସୂଚନା ଉପଲବ୍ଧ କରାଇବ।
ଜିୟାଓ ହେ କହିଛି ଯେ, ମୁଖ୍ୟ ବ୍ୟବସ୍ଥାଗୁଡ଼ିକରେ ବିଦେଶୀ ଓ ଘରୋଇ ମିଡ଼ିଆ ପାଇଁ ସ୍ଥାନ ନିର୍ଦ୍ଧାରିତ କରିବା ସାମିଲ ଅଛି। ଏହି ଆୟୋଜନରେ ତିୟାନଜିନ ୟାଙ୍ଗ୍ଲିୟୁକିଂ, ଉଡ୍ବ୍ଲକ୍ ପ୍ରିଣ୍ଟସ ଓ ପାରମ୍ପରକି ଶିଳ୍ପ କୌଶଳ ପ୍ରଦର୍ଶନ ଭଳି ସାଂସ୍କୃତିକ କାର୍ଯ୍ୟକଳାପ ପ୍ରଦର୍ଶିତ କରାଯିବ। ଉଲ୍ଲେଖନୀୟ ଯେ, ଏସସିଓ ଏକ ସ୍ଥାୟୀ ଆନ୍ତଃସରକାରୀ ଅନ୍ତର୍ଜାତୀୟ ସଙ୍ଗଠନ ,ଯାହାର ସ୍ଥାପନା ୨୦୦୧ରେ ୟୁରେସିଆଲ ଅଞ୍ଚଳରେ ଶାନ୍ତି , ସୁରକ୍ଷା ଓ ସ୍ଥିରତା ବଜାୟ ରଖିବା ପାଇଁ କରାଯାଇ ଥିଲା।
ଏସସିଓ ସମ୍ମିଳନୀକୁ ଏସସିଓ ଶିଖର ସମ୍ମିଳନୀ ମଧ୍ୟ କୁହାଯାଏ। ଏହି ସଙ୍ଗଠନର ସଦସ୍ୟ ଦେଶ ଗୁଡ଼ିକର ରାଷ୍ଟ୍ରାଧ୍ୟକ୍ଷ ଓ ସରକାରୀ ପ୍ରମୁଖଙ୍କ ବାର୍ଷିକ ବୈଠକ ହୋଇଥାଏ।ଏହି ସମ୍ମିଳନୀରେ ସଦସ୍ୟ ଦେଶ ମିଶି ମହତ୍ତ୍ୱପୂର୍ଣ୍ଣ ଭୂ-ରାଜନୈତିକ , ଆର୍ଥିକ ଓ ସୁରକ୍ଷା ମାମଲାରେ ଆଲୋଚନା କରନ୍ତି।
