‘କ୍ୟାରିୟରର ଶେଷ ପର୍ଯ୍ୟାୟରେ ସିଦ୍ଦରମୈୟା’, କର୍ଣ୍ଣାଟକ ସିଏମଙ୍କ ପୁଅ ଦେଲେ ବଡ଼ ବୟାନ

ନୂଆଦିଲ୍ଲୀ: କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଦରମୈୟା ତାଙ୍କ ରାଜନୈତିକ ଭବିଷ୍ୟତକୁ ନେଇ ଲଗାତାର ଚର୍ଚ୍ଚାରେ ରହିଆସୁଛନ୍ତି । ବିଧାନସଭା ନିର୍ବାଚନରେ ​​ବିଜୟୀ ହେବା ପରେ, କର୍ଣ୍ଣାଟକରେ ମୁଖ୍ୟମନ୍ତ୍ରୀ ପଦ ପାଇଁ ସିଦ୍ଦରମୈୟା ଏବଂ ଡିକେ ଶିବକୁମାରଙ୍କ ମଧ୍ୟରେ ପ୍ରତିଯୋଗିତା ହୋଇଥିଲା ।  ଯଦିଓ ହାଇକମାଣ୍ଡଙ୍କ ଅନୁମତି ପରେ ସିଦ୍ଦରମୈୟାଙ୍କୁ ମୁଖ୍ୟମନ୍ତ୍ରୀ କରାଯାଇଥିଲା । କିନ୍ତୁ ୨୦୨୩ରେ ସରକାର ଗଠନ ହେବା ପରଠାରୁ ସିଦ୍ଦରମୈୟାଙ୍କୁ ମୁଖ୍ୟମନ୍ତ୍ରୀ ପଦରୁ ହଟିବା ଖବର ଅନେକ ସମୟରେ ପ୍ରକାଶ ପାଉଛି । 

ସିଦ୍ଦରମୈୟାଙ୍କ ମୁଖ୍ୟମନ୍ତ୍ରୀ ଭାବରେ କାର୍ଯ୍ୟକାଳ ପୂରଣ କରିବା ଉପରେ ଜାରି କଳ୍ପନାଜଳ୍ପନା ଭିତରେ ବୁଧବାର ତାଙ୍କ ପୁଅ ଏକ ବଡ଼ ବୟାନ ଦେଇଛନ୍ତି ।ସିଦ୍ଦରମୈୟାଙ୍କ ପୁଅ କହିଛନ୍ତି ଯେ ସେ (ସିଦ୍ଦରମୈୟା) ତାଙ୍କ ରାଜନୈତିକ କ୍ୟାରିୟରର ଶେଷ ପର୍ଯ୍ୟାୟରେ ଅଛନ୍ତି ଏବଂ କଂଗ୍ରେସର ନେତୃତ୍ୱ ନେବା ପାଇଁ କ୍ୟାବିନେଟ୍ ସହଯୋଗୀ ସତୀଶ ଜାରକିହୋଲିଙ୍କ ମାର୍ଗଦର୍ଶକ ହେବା ଉଚିତ ।

ସିଦ୍ଦରମୈୟାଙ୍କ ପୁଅ ୟଥୀନ୍ଦ୍ର କହିଛନ୍ତି ଯେ ମୁଖ୍ୟମନ୍ତ୍ରୀ ତାଙ୍କ କ୍ୟାରିୟରର ଶେଷ ପର୍ଯ୍ୟାୟରେ ଅଛନ୍ତି । ୭୭ ବର୍ଷୀୟ ସିଦ୍ଦରମୈୟା ଦ୍ୱିତୀୟ ଥର ପାଇଁ କର୍ଣ୍ଣାଟକର ମୁଖ୍ୟମନ୍ତ୍ରୀ ହୋଇଛନ୍ତି । ପୂର୍ବରୁ, ସେ ୨୦୧୩ରୁ ୨୦୧୮ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ଭାବରେ କାର୍ଯ୍ୟ କରିଥିଲେ । ତା'ପରେ, ବିଜେପି ରାଜ୍ୟରେ କ୍ଷମତାକୁ ଆସିଥିଲା । ତେବେ ୨୦୨୩ ବିଧାନସଭା ନିର୍ବାଚନରେ, କଂଗ୍ରେସ ପୁଣି ଥରେ କର୍ଣ୍ଣାଟକରେ କ୍ଷମତାକୁ ଫେରିଥିଲା । 

୨୦୨୩ କର୍ଣ୍ଣାଟକ ବିଧାନସଭା ନିର୍ବାଚନ ସମୟରେ ଡିକେ ଶିବକୁମାର ରାଜ୍ୟ କଂଗ୍ରେସ ସଭାପତି ଥିଲେ । ବିଜୟ ପାଇଁ ତାଙ୍କୁ ମ୍ୟାନ୍ ଅଫ୍ ଦି ମ୍ୟାଚ୍ କୁହାଯାଇଥିଲା । କିନ୍ତୁ, ସେ ମୁଖ୍ୟମନ୍ତ୍ରୀ ଦୌଡ଼ରେ ସିଦ୍ଦରମୈୟାଙ୍କଠାରୁ ପଛରେ ପଡ଼ିଯାଇଥିଲେ । ଡିକେ ଶିବକୁମାର ବର୍ତ୍ତମାନ କର୍ଣ୍ଣାଟକର ଉପମୁଖ୍ୟମନ୍ତ୍ରୀ ଅଛନ୍ତି । ବିଭିନ୍ନ ନେତାଙ୍କ ବୟାନ ବାରମ୍ବାର ଡିକେ ଶିବକୁମାରଙ୍କ ମୁଖ୍ୟମନ୍ତ୍ରୀ ହେବା ନେଇ ଆଲୋଚନାକୁ ଅଧିକ କରିଛି ।

ସେପଟେ କିନ୍ତୁ ସିଦ୍ଦରମୈୟା ଏପରି କଳ୍ପନାଜଳ୍ପନାକୁ ଲଗାତାର ଖଣ୍ଡନ କରିଆସୁଛନ୍ତି ।  କିଛି ଦିନ ପୂର୍ବେ କଂଗ୍ରେସ ସାଂସଦ ଏଲଆର୍ ଶିବରାମ ଗୌଡାଙ୍କ ଏକ ବୟାନ ଏପରି କଳ୍ପନାଜଳ୍ପନାକୁ ଆହୁରି ବଡ଼ କରିଥିଲା । ଏପରି କି ଜାରି ରହିଥିବା ଦ୍ୱନ୍ଦ୍ୱକୁ ଦୂର କରିବାକୁ ଦଳର ଶୀର୍ଷ ନେତାମାନଙ୍କୁ ଆହ୍ୱାନ କରିଥିଲେ । କଂଗ୍ରେସ ସାଂସଦ ଗୌଡା କହିଥିଲେ, "ଏଥିରେ କୌଣସି ସନ୍ଦେହ ନାହିଁ ଯେ ଶିବକୁମାର ଶେଷରେ ମୁଖ୍ୟମନ୍ତ୍ରୀ ହେବେ, କିନ୍ତୁ ଚୂଡ଼ାନ୍ତ ନିଷ୍ପତ୍ତି ହାଇକମାଣ୍ଡଙ୍କ ଉପରେ ନିର୍ଭର କରେ ।"