ଲକ୍ଷ୍ନୌ: ଏକନା ଷ୍ଟାଡିୟମରେ ପୁଣି ଥରେ ନିକୋଲାସ୍ ପୁରନଙ୍କ ପାଓ୍ବାର ଶୋ’ ଦେଖିବାକୁ ମିଳିଛି । ୩୪ ବଲ୍ରେ ୬୧ ରନ୍ର ଧୁଆଁଧାର ଇନିଂସ ଖେଳିଛନ୍ତି ସେ । ସେହିପରି ପାଓ୍ବାର-ପ୍ଲେରେ ଇଡେନ ମାର୍କରମ ନିଜର ପରାକ୍ରମ ଦେଖାଇଥିଲେ । ଫଳରେ ଲକ୍ଷ୍ନୌରେ ଚିତପଟାଙ୍ଗ ହୋଇଛି ଗୁଜରାଟ ଟାଇଟନ୍ସ । ଦଳ ୬ ଓ୍ବିକେଟରେ ପରାସ୍ତ ହୋଇଥିବା ବେଳେ ଏପଟେ ସୁପର ଜାଏଣ୍ଟସକୁ ଚତୁର୍ଥ ବିଜୟ ମିଳିଛି । ଇଡେନ ମାର୍କରମ ମ୍ୟାନ ଅଫ୍ ଦି ପ୍ଲେୟାର ହୋଇଛନ୍ତି ।
ଆଇପିଏଲ୍ ୨୦୨୫ ମହାସମରରେ ଆଜି ପ୍ରଥମ ମ୍ୟାଚ୍ ଲକ୍ଷ୍ନୌର ଶ୍ରୀ ଅଟଳ ବିହାରୀ ବାଜପେୟୀ ଏକାନା କ୍ରିକେଟ୍ ଷ୍ଟାଡିୟମରେ ହୋଇଛି । ଏଠାରେ ମୁହାଁମୁହିଁ ହୋଇଥିଲେ ଲକ୍ଷ୍ନୌ ସୁପରଜାଏଣ୍ଟସ୍ ଓ ଗୁଜରାଟ ଟାଇଟାନ୍ସ । ଏଲଏସଜି ଏହି ମ୍ୟାଚକୁ ୬ ୱିକେଟରେ ଜିତି ନେଇଛି । ନିକୋଲାସ ପୁରନ ଏବଂ ଇଡେନ ମାର୍କରାମ ଅର୍ଦ୍ଧଶତକୀୟ ଇନିଂସ ଖେଳି ଦଳକୁ ବିଜୟୀ କରାଇଛନ୍ତି । ମ୍ୟାଚ୍ ଶେଷ ଓଭର ପର୍ଯ୍ୟନ୍ତ ଚାଲିଥିଲେ ମଧ୍ୟ ତୃତୀୟ ବଲ୍ରେ ନିର୍ଣ୍ଣୟ ଆସିଥିଲା ।
ଏହି ମ୍ୟାଚ୍ରେ ଏଲଏସଜି ଅଧିନାୟକ ରିଷଭ ପନ୍ତ ଟସ୍ ଜିତି ବୋଲିଂ ନିଷ୍ପତ୍ତି ନେଇଥିଲେ । ଗୁଜରାଟ ଟାଇଟନ୍ସ ଆରମ୍ଭରୁ ଭଲ ପ୍ରଦର୍ଶନ କରିଥିଲା । ୧୦୦ ରନ୍ରେ କୌଣସି ଓ୍ବିକେଟ୍ ପଡ଼ିନଥିଲା । ଅଧିନାୟକ ଶୁଭମନ ଗିଲ୍ ଏବଂ ସାଇ ସୁଦର୍ଶନ ଅର୍ଦ୍ଧଶତକ ହାସଲ କରିଥିଲେ । ମାତ୍ର ମିଡିଲ୍ ଓଭରରେ ଓ୍ବିକେଟ୍ ପକାଇବାରେ ସଫଳ ହୋଇଥିଲା ଲକ୍ଷ୍ନୌ । ଫଳରେ ଜିଟି ୧୮୦ରନରେ ଅଟକି ଥିଲା । ୧୮୧ ରନ ବିଜୟ ଲକ୍ଷ୍ୟକୁ ପିଛା କରି ଲକ୍ଷ୍ନୌ ସୁପର ଜାଏଣ୍ଟସ ଅନ୍ତିମ ଓଭରରେ ୪ ଓ୍ବିକେଟ୍ ହରାଇ ମ୍ୟାଚକୁ ଜିତି ନେଇଛି । ଲକ୍ଷ୍ନୌ ଏହା ଚତୁର୍ଥ ବିଜୟ ହୋଇଥିବା ବେଳେ ଦଳ ତୃତୀୟ ସ୍ଥାନକୁ ଉନ୍ନୀତ ହୋଇଛି ।...
