ଭୁବନେଶ୍ବର ୨୫।୭: ରାଜ୍ୟରେ ସମସ୍ତ ସରକାରୀ ଓ ଘରୋଇ ସ୍ୱାସ୍ଥ୍ୟାନୁଷ୍ଠାନରେ କାର୍ଯ୍ୟରତ ମହିଳାଙ୍କ ସୁରକ୍ଷା ପ୍ରତି ସର୍ବାଧିକ ଗୁରୁତ୍ୱ ଦିଆଯିବ । ସେମାନଙ୍କ ଯୌନ ନିର୍ଯାତନା ଅଭିଯୋଗକୁ ପ୍ରାଥମିକତା ଦିଆଯିବ । ସ୍ୱାସ୍ଥ୍ୟ ବିଭାଗ ଅଧୀନରେ ଥିବା ସମସ୍ତ ସ୍ୱାସ୍ଥ୍ୟାନୁଷ୍ଠାନରେ କାର୍ଯ୍ୟରତ ମହିଳାଙ୍କ ସୁରକ୍ଷା ନେଇ ‘ଯୌନ ନିର୍ଯାତନା ଇଣ୍ଟରନାଲ୍ କମିଟି’ ଗଠନ କରିବାକୁ କଡ଼ା ନିର୍ଦ୍ଦେଶ ଦେଇଛି ସ୍ୱାସ୍ଥ୍ୟ ବିଭାଗ । ଚଳିତ ମାସ ୩୦ ତାରିଖ ସୁଦ୍ଧା ଏହି କମିଟି ଗଠନ କରିବାକୁ କୁହାଯାଇଛି । ସ୍ୱାସ୍ଥ୍ୟ ବିଭାଗ ପ୍ରମୁଖ ଶାସନ ସଚିବ ଅଶ୍ୱଥୀ ଏସ୍ ଚିଠି ଲେଖି ଏନ୍ଏଚ୍ଏମ୍ ଓଡ଼ିଶା, ଓଏସ୍ଏମ୍ସିଏଲ୍ ଓ ସ୍ୱାସ୍ଥ୍ୟ ନିର୍ଦ୍ଦେଶାଳୟକୁ ଏହି ନିର୍ଦ୍ଦେଶ ଦେଇଛନ୍ତି । ଏହାଛଡ଼ା ଅତିରିକ୍ତ ସଚିବ ସୁମିତ୍ରା ସେନାପତି ମଧ୍ୟ ସମସ୍ତ ସରକାରୀ ଓ ଘରୋଇ ମେଡିକାଲ କଲେଜ, ନର୍ସିଂ କଲେଜ, ଫାର୍ମାସୀ କଲେଜ ଓ ଏଏନ୍ଏମ୍ ଟ୍ରେନିଂ ସେଣ୍ଟର କର୍ତ୍ତୃପକ୍ଷ, ସମସ୍ତ ସିଡିଏମ୍ଓ ଓ ପିଏଚ୍ଓଙ୍କୁ ମଧ୍ୟ ସୂଚନା ଦିଆଯାଇଛି । ମହିଳାଙ୍କ ସୁରକ୍ଷା ନେଇ ସୁନିଶ୍ଚିତ ପଦକ୍ଷେପ ନେବେ । ୩୦ ତାରିଖ ସୁଦ୍ଧା ରିପୋର୍ଟ ଦେବେ ।
ଅନୁଷ୍ଠାନରେ ଏହି କମିଟି ପୂର୍ବରୁ ରହିଥିଲେ ହେଁ ଏହାକୁ ଅଧିକ କ୍ରିୟାଶୀଳ କରିବାକୁ ସ୍ୱାସ୍ଥ୍ୟ ବିଭାଗ ଅଣ୍ଟା ଭିଡ଼ିଛି । କମିଟି ମହିଳାଙ୍କ ଅଭିଯୋଗକୁ ସମ୍ବେଦନଶୀଳ ଭାବେ ଗ୍ରହଣ କରିବ । କମିଟି ସଭ୍ୟଙ୍କ ଫୋନ୍ ନମ୍ବର ଓ ନାମ ଅନୁଷ୍ଠାନରେ ବୋର୍ଡରେ ଲେଖାଯିବ । ଏହାର ବିସ୍ତୁତ ସୂଚନା ଅନୁଷ୍ଠାନ ୱେବ୍ସାଇଟ୍ରେ ସ୍ଥାନୀତ ହେବ । ଅଭିଯୋଗକାରିଣୀ ୱେବ୍ସାଇଟ୍ରେ ମଧ୍ୟ ଅଭିଯୋଗ କରିପାରିବେ । ଅନୁଷ୍ଠାନରେ ନିଶ୍ଚିତ ‘ଅଭିଯୋଗ ବାକ୍ସ’ ରହିବ । କି ପ୍ରକାର ଆଚରଣ କଲେ ମହିଳାମାନେ ଯୌନ ଉତ୍ପୀଡ଼ନ ସମ୍ବନ୍ଧୀୟ ଅଭିଯୋଗ କରିପାରିବେ ତାହାକୁ ନେଇ ସ୍ୱାସ୍ଥ୍ୟ ବିଭାଗ ପକ୍ଷରୁ ତଥ୍ୟ ଦିଆଯାଇଛି । ଅଭିଯୋଗକାରୀଣିଙ୍କ ଅଭିଯୋଗକୁ ନିଶ୍ଚିତ ବିଚାର କରାଯିବ । ଅଭିଯୋଗ ପାଇବାର ଅତି ବେଶୀରେ ୯୦ ଦିନ ଭିତରେ ଅଭିଯୋଗ ସମ୍ବନ୍ଧୀୟ ଅନୁସନ୍ଧାନ କରାଯିବ । ଯଦି ସମ୍ପୃକ୍ତ ବ୍ୟକ୍ତି ଦୋଷୀ ତାହାଲେ ଶୃଙ୍ଖଳଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
You Can Read:
ମୟୁରଭଞ୍ଜ ଜିଲ୍ଲାରେ ସବୁ ସ୍କୁଲ ଛୁଟି ଘୋଷଣା : ବର୍ଷା ସ୍ଥିତିକୁ ଦୃଷ୍ଟିରେ ରଖି ନିଷ୍ପତ୍ତି
