ନୂଆଦିଲ୍ଲୀ ୧୧.୦୪: କୋହଲିଙ୍କ କୀର୍ତ୍ତିମାନ । ରେକର୍ଡ ପରେ ରେକର୍ଡ କରୁଛନ୍ତି ରନ୍ ମେସିନ । ହଜାରେ ବାଉଣ୍ଡ୍ରି ମାରିବାରେ କିଙ୍କ କୋହଲି ହୋଇଛନ୍ତି ପ୍ରଥମ ପ୍ଲେୟର । ଆଇପିଏଲ୍ରେ ଦିଲ୍ଲୀ ବିପକ୍ଷରେ କରିଛନ୍ତି ଏହି ବିରଳ ରେକର୍ଡ ।   ବିଶ୍ବର ନମ୍ବର-୧ ବ୍ୟାଟର । ରନ୍ ମେସିନ୍ ବିରାଟ କୋହଲି । ଆଇପିଏଲ୍ ୨୦୨୫ରେ ରଚିଲେ କୀର୍ତ୍ତିମାନ । 

ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ଗୁରୁବାର ଖେଳିଥିଲେ କୋହଲି । ଆରସିବି ପାଇଁ ବ୍ୟାଟିଂ କରି ଖେଳିଥିଲେ ୨୨ ରନର ଇନିଂସ । ଏହି ସମୟରେ କୋହଲି ଦୁଇଟି ଛକା ଏବଂ ଗୋଟିଏ ଚୌକା ମାରିଥିଲେ । ଆଉ ଆଇପିଏଲରେ ୧୦୦୦ ବାଉଣ୍ଡାରୀ ଛୁଇଁଥିଲେ । ସେ ଏପରି କରିବାରେ ହୋଇଛନ୍ତି IPL ଇତିହାସର ପ୍ରଥମ ଖେଳାଳି।

ବିରାଟ କୋହଲି IPLରେ କେବଳ RCB ପାଇଁ ମ୍ୟାଚ୍ ଖେଳିଛନ୍ତି । ସେ ୨୦୦୮ ମସିହାରୁ ଆରସିବି ସହ ରହିଛନ୍ତି । କିଙ୍ଗ କୋହଲି ଖେଳିଛନ୍ତି ମୋଟ୍ ୨୪୮ଟି ମ୍ୟାଚ୍ । ଏହି ସମୟରେ ସେ ୭୨୧ଟି ଚୌକା ଏବଂ ୨୭୯ଟି ଛକା ମାରିଛନ୍ତି । ଏପରି ଭାବରେ ବିରାଟ ଏକ ହଜାର ବାଉଣ୍ଡାରୀ ପୂରଣ କରିଛନ୍ତି । ସେ ଏପରି କରିବାରେ ଇତିହାସର ପ୍ରଥମ ଖେଳାଳି । 

ଏହି ତାଲିକାରେ ଶିଖର ଧାୱନ ଦ୍ୱିତୀୟ ସ୍ଥାନରେ ଅଛନ୍ତି । ଧାୱନ ଆଇପିଏଲରେ ୯୨୦ଟି ଚୌକା ମାରିଛନ୍ତି । ତଥାପି ସର୍ବାଧିକ ଚୌକା ମାରିବା କ୍ଷେତ୍ରରେ ସେ ବିରାଟଙ୍କଠାରୁ ଆଗରେ ଅଛନ୍ତି।

ଆଇପିଏଲରେ ସର୍ବାଧିକ ବାଉଣ୍ଡାରୀ ମାରିଥିବା ଶ୍ରେଷ୍ଠ ପାଞ୍ଚ ଖେଳାଳିଙ୍କ ତାଲିକାରେ ତିନି ଜଣ ଭାରତୀୟ ଅଛନ୍ତି । କୋହଲି ଏବଂ ଧାୱନଙ୍କ ସହିତ ରୋହିତ ଶର୍ମା ମଧ୍ୟ ଏହି ତାଲିକାରେ ସାମିଲ ଅଛନ୍ତି । ରୋହିତ ଆଇପିଏଲରେ ୨୫୬ଟି ମ୍ୟାଚ୍ ଖେଳି ସାରିଛନ୍ତି । ସେ ୨୮୨ଟି ଛକା ଏବଂ ୬୦୩ଟି ଚୌକା ମାରିଛନ୍ତି । ରୋହିତ ମୋଟ ୮୮୫ଟି ବାଉଣ୍ଡାରୀ ମାରିଛନ୍ତି । ସେ ମୋଟ ତାଲିକାରେ ଚତୁର୍ଥ ସ୍ଥାନରେ ରହିଛନ୍ତି । ତେବେ ଡେଭିଡ୍ ୱାର୍ଣ୍ଣର ତୃତୀୟ ସ୍ଥାନରେ ଅଛନ୍ତି । ୱାର୍ଣ୍ଣର ୮୯୯ଟି ବାଉଣ୍ଡାରୀ ମାରିଛନ୍ତି । ତେବେ କ୍ରିସ୍ ଗେଲ୍ ଲିଷ୍ଟର ପଞ୍ଚମ ସ୍ଥାନରେ ରହିଛନ୍ତି । ଗେଲ୍ ୭୬୧ଟି ବାଉଣ୍ଡାରୀ ମାରିଛନ୍ତି।

IPLରେ ସର୍ବାଧିକ ରନ ସ୍କୋର କରିବା ତାଲିକାରେ କୋହଲି ଶୀର୍ଷରେ ରହିଛନ୍ତି । ସେ ଆଇପିଏଲରେ କରିଛନ୍ତି ୮୧୯୦ ରନ । ଏହି ସମୟ ମଧ୍ୟରେ ସେ ୮ଟି ଶତକ ଏବଂ ୫୭ଟି ଅର୍ଦ୍ଧଶତକ ହାସଲ କରିଛନ୍ତି। କୋହଲିଙ୍କ ସର୍ବୋତ୍ତମ ସ୍କୋର ରହିଛି ୧୧୩ ରନ୍ । ତେବେ ସର୍ବାଧିକ ରନ୍ ସ୍କୋର କରିବାରେ ଧାୱନ ରହିଛନ୍ତି ଦ୍ୱିତୀୟ ସ୍ଥାନରେ । ସେ ୬୭୬୯ ରନ୍ କରିଛନ୍ତି । ରୋହିତ ୬୬୬୬ ରନ ସହିତ ଲିଷ୍ଟର ତୃତୀୟ ସ୍ଥାନରେ ଅଛନ୍ତି ।