ଟି୨୦ ବିଶ୍ୱକପ୍ : ଦୁର୍ବଳ ନାମିବ୍ୟାକୁ ହରାଇବା ଲକ୍ଷ୍ୟରେ ସୂର୍ଯ୍ୟ ସେନା, ଅଭିଷେକ-ସିରାଜ ଆଉଟ୍

ମୁମ୍ବାଇ, ୧୧|୦୨: ଗୁରୁବାର ମୁହାଁମୁହିଁ ହେବେ ଭାରତ ଏବଂ ନାମିବ୍ୟା । ଟି୨୦ ବିଶ୍ୱକପର ଗୁରୁବାର ଭାରତ ନିଜର ଦ୍ୱିତୀୟ ମୁକାବିଲା ଖେଳିବ । ପ୍ରଥମ ମୁକାବିଲାରେ ଦଳ ଆମେରିକାକୁ ପରାସ୍ତ କରିଥିଲା । ଏବେ ନାମିବ୍ୟା ବିପକ୍ଷରେ ଦଳ ଆତ୍ମବିଶ୍ୱାସ ସହ ପଡିଆକୁ ଓହ୍ଲାଇବ ।

ମୁକାବିଲା ପୂର୍ବରୁ ଭାରତୀୟ ଦଳକୁ ବଡ ଝଟକା ଲାଗିଛି । ପେଟଜନିତ ସମସ୍ୟା ପାଇଁ ଅଭିଷେକ ଶର୍ମା ମୁକାବିଲା ଖେଳି ନପାରନ୍ତି । ତାଙ୍କ ଜାଗାରେ ସଞ୍ଜୁ ସାମସନଙ୍କୁ ସୁଯୋଗ ମିଳିପାରେ । ଅଭିଷେକଙ୍କୁ ସୋମବାର ହସ୍ପିଟାଲରେ ଭର୍ତ୍ତି କରାଯାଇଥିଲା । ଏବେ ସେ ଡିସଚାର୍ଜ ହୋଇଛନ୍ତି । ତଥାପି ସେ ମୁକାବିଲା ନଖେଳିବା ନେଇ ଅଧିକ ସମ୍ଭାବନା ରହିଛି ।

ଫେରିବେ ବୁମରା

ଆମେରିକା ବିପକ୍ଷ ପ୍ରଥମ ମୁକାବିଲାରେ ଦ୍ରୁତ ବୋଲର ଜସପ୍ରିତ ବୁମରାଙ୍କୁ ସୁଯୋଗ ମିଳିନଥିଲା । ଏବେ କିନ୍ତୁ ସେ ପୁରା ଫିଟ୍ ଅଛନ୍ତି । ମଙ୍ଗଳବାର ଏବଂ ବୁଧବାର ସେ ନେଟ୍ସ ପ୍ରାକ୍ଟିସ କରିଛନ୍ତି । ଘଣ୍ଟା ଘଣ୍ଟା ଧରି ସେ ବୋଲିଂ ଅଭ୍ୟାସ କରିଛନ୍ତି । ତେଣୁ ନାମିବ୍ୟା ବିପକ୍ଷରେ ସେ ଖେଳିବା ଏକପ୍ରକାର ନିଶ୍ଚିତ ।

ଯଦି ବୁମରା ମୁକାବିଲାରେ ସୁଯୋଗ ପାଆନ୍ତି ତେବେ ମହମ୍ମଦ ସିରାଜ୍ ବାଦ୍ ପଡିବେ । ବୁମରା ଖେଳିଲେ ଭାରତୀୟ ବୋଲିଂ ବିଭାଗ ଆହୁରି ଶକ୍ତିଶାଳୀ ହୋଇଯିବ । ମ୍ୟାଚ୍ ର ଶେଷ ଓଭରରେ ଜସପ୍ରିତଙ୍କ ବୋଲିଂ ବିପକ୍ଷ ବ୍ୟାଟରଙ୍କୁ ଖୁବ୍ ହଇରାଣ କରିଥାଏ ।

ପାକିସ୍ତାନ ବିପକ୍ଷ ମୁକାବିଲା ପୂର୍ବରୁ ପ୍ରାକ୍ଟିସ୍

ଆମେରିକା ବିପକ୍ଷ ମ୍ୟାଚ୍ ରେ ଅଧିନାୟକ ସୂର୍ଯ୍ୟ କୁମାର ଯାଦବଙ୍କ ବ୍ୟତୀତ ଅନ୍ୟ କୌଣସି ବ୍ୟାଟର ଭଲ ପ୍ରଦର୍ଶନ କରିପାରିନଥିଲେ । ଫେବ୍ରୁଆରୀ ୧୫ରେ ପାକିସ୍ତାନ ବିପକ୍ଷ ମ୍ୟାଚ୍ ପୂର୍ବରୁ ଗୁରୁବାର ଦଳକୁ ପ୍ରାକ୍ଟିସ୍ କରିବା ପାଇଁ ସୁଯୋଗ ମିଳିବ । ଏହାଦ୍ୱାରା ଦଳର ବ୍ୟାଟର ଫର୍ମକୁ ଫେରିବାକୁ ଚେଷ୍ଟା କରିବେ ।

ଖେଳିବେ ତିନି ଅଲରାଉଣ଼୍ଡର

ସୂର୍ଯ୍ୟ କୁମାର ଦଳରେ ସନ୍ତୁଳନ ରକ୍ଷା କରିବାକୁ ତିନି ଜଣ ଅଲରାଉଣ୍ଡରଙ୍କ ସହ ପଡିଆକୁ ଓହ୍ଲାଇପାରେ । ହାର୍ଦ୍ଦିକ ପାଣ୍ଡ୍ୟା, ଶିବମ ଦୁବେ ଏବଂ ଅକ୍ଷର ପଟେଲ ମ୍ୟାଚ୍ ରେ ଖେଳିବେ । ଫଳରେ ବ୍ୟାଟିଂ ଏବଂ ବୋଲିଂ ବିଭାଗ ମଜବୁତ ହେବ । ସେହିପରି ସ୍ପିନ୍ ବିଭାଗର ଦାୟିତ୍ୱ ବରୁଣ ଚକ୍ରବର୍ତ୍ତୀଙ୍କ ଉପରେ ରହିବ । ସେହିପରି ଦ୍ରୁତ ବୋଲିଂରେ ବୁମରାଙ୍କୁ ଅର୍ଶଦୀପ ସିଂ ସହାୟତା ଦେବେ ।