ନୂଆଦିଲ୍ଲୀ ୨୮।୦୮: ସ୍ମାର୍ଟଫୋନ୍ ଏବେ ଜୀବନର ଅବିଚ୍ଛେଦ୍ୟ ଅଙ୍ଗ ସାଜିଛି । ଛୋଟଠାରୁ ବଡ ସମସ୍ତେ ସ୍ମାର୍ଟଫୋନ ମାୟାରେ ବାୟା । କିନ୍ତୁ ଏହାକୁ ବ୍ୟବହାର କରିବା ସମୟରେ ବିଶେଷ ସତର୍କତା ଅବଲମ୍ବନ କରାଯିବା ଉଚିତ । ନଚେତ୍ ଫୋନ ହୋଇପାରେ ବ୍ଲାଷ୍ଟ । ସାଧାରଣତଃ ମୋବାଇଲ୍ ଫୋନ୍ ବିସ୍ଫୋରଣ ପଛରେ ଅନେକ କାରଣ ଥାଇପାରେ । କିନ୍ତୁ ଅନେକ ସମୟରେ ମନକୁ ପ୍ରଶ୍ନ ଆସେ କି ଦୁଇଟି ଫୋନ୍ ଏକାଠି ରଖିଲେ ବିସ୍ଫୋରଣ ହୁଏ କି ? ଆସନ୍ତୁ ଜାଣିବା...
ସାଧାରଣ ପରିସ୍ଥିତିରେ ଦୁଇଟି ଫୋନ୍ ଏକାଠି ରଖିବା ବିପଦପୂର୍ଣ୍ଣ ନୁହେଁ । କିନ୍ତୁ କିଛି ସତର୍କତା ଅବଲମ୍ବନ କରିବା ଗୁରୁତ୍ୱପୂର୍ଣ୍ଣ। ଉଦାହରଣ ସ୍ୱରୂପ, ଯଦି ଦୁଇଟି ଫୋନ୍ ଚାର୍ଜିଂରେ ଅଛି ଏବଂ ଏକାଠି ରଖାଯାଇଛି, ତେବେ ଗରମ ବଢ଼ିବାର ସମ୍ଭାବନା ରହିପାରେ । ଚାର୍ଜିଂ ସମୟରେ ସ୍ମାର୍ଟଫୋନ୍ ପୂର୍ବରୁ ଗରମ ହୋଇଯାଇଥାଏ ଏବଂ ଯଦି ଦୁଇଟି ଫୋନ୍ ପରସ୍ପର ଉପରେ ରଖାଯାଏ, ତେବେ ଗରମ ବାହାରିବାର ସମସ୍ୟା ହୋଇପାରେ । ଏହା ଅତ୍ୟଧିକ ଗରମ ସମସ୍ୟା ସୃଷ୍ଟି କରିପାରେ ଏବଂ ଫୋନ୍ ବ୍ଲାଷ୍ଟ ହୋଇପାରେ ।
ଫୋନକୁ ତକିଆ ତଳେ କିମ୍ବା କମ୍ ବାୟୁ ପ୍ରବାହ ହେଉଥିବା ସ୍ଥାନରେ ରଖିବା ବିପଜ୍ଜନକ ହୋଇପାରେ। ତେବେ ଫୋନ ବ୍ଲାଷ୍ଟ ହେବାର କାରଣ ଫୋନ୍ କଭର ମଧ୍ୟ ହୋଇପାରେ । ଯଦି କଭର ମୋଟା କିମ୍ବା ସେଥିରେ ନୋଟ୍ସ କି କାର୍ଡ ଭଳି ଜିନିଷ ରଖାଯାଇଥାଏ, ତେବେ ଗରମ ବଢ଼ିପାରେ ଏବଂ ବ୍ଲାଷ୍ଟ ହୋଇପାରେ । ତେବେ ଦୁଇଟି ଫୋନ୍ ଏକାଠି ରଖିବା ଦ୍ୱାରା ବିସ୍ଫୋରଣ ହେବ ବୋଲି କହିବା ବୈଜ୍ଞାନିକ ଭାବରେ ଠିକ୍ ନୁହେଁ।
