ଫିଲିପାଇନ୍ସରେ ବାତ୍ୟା 'ଟିନୋ'ର ତାଣ୍ଡବ : ଭାଙ୍ଗିଲା ଘର ଓ କୋଠା, ୪୦ ମୃତ

ନୂଆଦିଲ୍ଲୀ, ୦୫ |୧୧  :  ଫିଲିପାଇନ୍ସରେ ଟାଇଫୁନ୍ କାଲମାଏଗୀ ବା ଟିନୋର ତାଣ୍ଡବ । ମଙ୍ଗଳବାର ଆସିଥିବା ଏହି ଭୀଷଣ ବାତ୍ୟା ଫିଲିପାଇନ୍ସକୁ ଛାରଖାର କରିଦେଇଛି । ଯେଉଁଥିରେ ପ୍ରାୟ ୪୦ ଜଣ ପ୍ରାଣ ହରାଇଛନ୍ତି । ଏନେଇ ସେଠାକାର ସରକାରୀ ଅଧିକାରୀ ପ୍ରକାଶ କରିଛନ୍ତି ।

ରିପୋର୍ଟ ଅନୁସାରେ, ଦେଶର ପୂର୍ବ ପ୍ରାନ୍ତରେ ଥିବା ଲେଟେ ଓ କେବୁରେ ବାତ୍ୟା ଲ୍ୟାଣ୍ଡଫଲ୍ କରିଥିଲା । ଏହି ଅଞ୍ଚଳରେ ଗତ ମାସରେ  ବଡ ଭୂମିକମ୍ପ ମଧ୍ୟ ହୋଇଥିଲା । ଗୋଟିଏ ବିପଦରୁ ଲୋକେ ସମ୍ପୂର୍ଣ୍ଣ  ଭାବେ ମୁକୁଳି ନଥିବା ବେଳେ କାଳ ସାଜିଥିଲା ବାତ୍ୟା ଟିନୋ ।

ପାଣିପାଗ ବିଭାଗର କହିବାନୁସାରେ, ଲ୍ୟାଣ୍ଡଫଳ ସମୟରେ ପବନର ବେଗ ଘଣ୍ଟା ପ୍ରତି ୧୪୦ କିଲୋମିଟରରୁ ଅଧିକ ରହିଥିଲା । ପରେ ଏହା ୧୯୫ କିଲୋମିଟରକୁ ବୃଦ୍ଧି ପାଇଥିଲା । ଯେଉଁଥିରେ ଘର ଭାଙ୍ଗିବା ସହ ଅନେକ ଲୋକ ବନ୍ୟାରେ ଭାସି ଯାଇଥିଲେ । ଏପରି ଭାବେ ୪୦ ଜଣ ପ୍ରାଣ ହରାଇଥିଲେ । ଏହାସହ ଉଦ୍ଧାର କାର୍ଯ୍ୟରେ ନିୟୋଜିତ ଥିବା ୬ ଜଣ ସୁରକ୍ଷାକର୍ମୀ ମଧ୍ୟ ପ୍ରାଣ ହରାଇଛନ୍ତି ।

ଫିଲିପାଇନ୍ସ ରେଡ୍ କ୍ରସ ସେକ୍ରେଟାରୀ କହିଛନ୍ତି ଯେ, ଅନେକ ବ୍ୟକ୍ତି ଘର ଭାଙ୍ଗିବା କାରଣରୁ ଫସି ରହିଥିଲେ । କିଛି ଲୋକଙ୍କୁ ବାତ୍ୟା ପୂର୍ବରୁ ସୁରକ୍ଷିତ ସ୍ଥାନକୁ ପଠାଯାଇଥିଲା  । ଯେଉଁମାନେ ଫସି ରହିଥିଲେ ସେମାନଙ୍କୁ ଉଦ୍ଧାର କରାଯାଇଛି । କେବଳ ଏତିକି ନୁହେଁ ବାତ୍ୟା ବେଳେ ଦେଶରେ ୧୬୦ଟି ବିମାନକୁ ବାତିଲ କରାଯାଇଥିଲା । ପାଣି ଭିତରେ ଥିବା ମତ୍ସ୍ୟଜୀବୀଙ୍କୁ ତୁରନ୍ତ କୂଳକୁ ଆସିବାକୁ ନିର୍ଦ୍ଦେଶ ଦିଆଯାଇଥିଲା ।

କେବଳ ଫିଲିପାଇନ୍ସ ନୁହେଁ ଭିଏତନାମରେ ମଧ୍ୟ ବାତ୍ୟା ସାମାନ୍ୟ ପ୍ରଭାବ ପକାଇଥିବା ସୂଚନା ମିଳିଛି । ହେଲେ କେତେ ପରିମାଣରେ କ୍ଷତିକ୍ଷତି ହୋଇଛି ତାହା ସରକାରଙ୍କ ପକ୍ଷରୁ ସ୍ପଷ୍ଟ କରାଯାଇ ନାହିଁ ।