ଫେବୃଆରୀ ୧୦ରେ କୃଷିମନ୍ତ୍ରୀ ଓ ଯୋଗାଣ ମନ୍ତ୍ରୀଙ୍କ କୁଶପୁତ୍ତଳିକା ଦହନ ହେବ

ଭୁବନେଶ୍ଵର: ସାରା ରାଜ୍ୟରେ ମଣ୍ଡି ଅବବ୍ୟସ୍ଥା ବିରୋଧରେ କୃଷକମାନଙ୍କର କ୍ରୋଧ ଓ ଅସନ୍ତୋଷ ବଢ଼ି ବଢ଼ି ଚାଲିଛି । ସରକାର ସବୁବେଳେ ସମସ୍ୟା ପ୍ରଶମିତ ହେଲା ବୋଲି ମିଛ କହି ଚାଲିଛନ୍ତି । ଏବେ ବି କୃଷକ ରାସ୍ତା ଉପରେ ଧାନ ବସ୍ତା ରଖି ପ୍ରତିବାଦ କରୁଛି । ଆନ୍ଦୋଳନ ଥମିବାର ନା ଧରୁନି।ପ୍ରତିଦିନ ରାଜ୍ୟର ବିଭିନ୍ନ ସ୍ଥାନରେ ଦଳମତ ନିର୍ବିଶେଷରେ ଚାଷୀ ମେଳି ବାନ୍ଧୁଛନ୍ତି ଏବଂ ଧାନ କିଣାବିକାରେ ହେରଫେର ଓ କଟନୀ ଛଟଣୀ ବିରୋଧରେ ପ୍ରତିବାଦ କରୁଛନ୍ତି । କିଷାନ କଂଗ୍ରେସ ପ୍ରତିବାଦ ଓ ପ୍ରତିରୋଧ କରିଚାଲିଛି । ଏଭଳି ଯନ୍ତ୍ରଣାରୁ ମୁକ୍ତି ପାଇବା ପାଇଁ କିଷାନ କଂଗ୍ରେସ ଚାଷୀମାନଙ୍କୁ ଆସନ୍ତା ଦିନରେ ଐକ୍ୟବଧ ହୋଇ ସଂଗ୍ରାମ ପାଇଁ ରାସ୍ତାକୁ ଓହ୍ଲାଇବାକୁ ଆହ୍ୱାନ ଦେଇଛି ।

ବିଭିନ୍ନ ଜିଲ୍ଲା ଓ ବ୍ଲକ ମାନଙ୍କରେ ପ୍ରତିବାଦ ପଦଯାତ୍ରା ସହିତ ବିକ୍ଷୋଭ, ଘେରାଉ ଓ ଧାରଣାମାନ ସଂଗଠିତ କରି ଚାଲିଛି । କିନ୍ତୁ ବର୍ତ୍ତମାନ ପରିସ୍ଥିତି ଅସମ୍ଭାଳ ହୋଇଛି । ନିଆଁରେ ଘିଅ ଢ଼ାଳିବା ଭଳି ଉଭୟ କୃଷିମନ୍ତ୍ରୀ ଓ ଯୋଗାଣ ମନ୍ତ୍ରୀଙ୍କ ବିଭିନ୍ନ ଜାଗାରେ ବିଭିନ୍ନ ବିବୃତି ସମସ୍ୟାକୁ ଆହୁରି ତୀବ୍ର କରିଛି । ନୌଟଙ୍ଗୀ ଓ ଧାନକ୍ରୟର ସୀମା ନିର୍ଦ୍ଧାରଣ କୃଷକ ମୁଣ୍ଡରେ ବଜ୍ରାଘାତ କରିବା ଭଳି ହୋଇଛି । ତେଣୁ ଗତ ଫେବୃଆରୀ ୨ରେ ପ୍ରଦେଶ କିଷାନ କଂଗ୍ରେସର ଜିଲ୍ଲା ଅଧ୍ୟକ୍ଷମାନଙ୍କର ଏକ ବୈଠକ କଂଗ୍ରେସ ଭବନରେ ଅନୁଷ୍ଠିତ ହୋଇ ସାରା ରାଜ୍ୟର ଗାଁ, ପଞ୍ଚାୟତ, ବ୍ଲକ ଓ ଜିଲ୍ଲା ସଦର ମହକୁମାରେ ଚାଷୀମା ନଙ୍କୁ ମେଳି କରି ଆସନ୍ତା ଫେବୃଆରୀ ୧୦ ତାରିଖରେ କୃଷକ ବିରୋଧି କୃଷି ମନ୍ତ୍ରୀ ଏବଂ ଯୋଗାଣ ମନ୍ତ୍ରୀଙ୍କର କୃଷପୁତ୍ତଳିକା ଜାଳିବାର ନିଷ୍ପତ୍ତି ହୋଇଛି ।

ହଜାର ହଜାର କୃଷକଙ୍କୁ ଏକାଠି କରି ସଭା ଓ ଶୋଭାଯାତ୍ର ହୋଇ କୁଶପୁତ୍ତଳିକା ଦାହ କରାଯିବ । ଆଜିର ଏହି ସାମ୍ବାଦିକ ସମ୍ମିଳନୀରେ ରାଜ୍ୟ କିଷାନ କଂଗ୍ରେସର ବରିଷ୍ଠ ଉପସଭାପତି ଡ. କାର୍ତ୍ତିକ ବରାଳ, ଅରୁଣ ଜେନା, ନିମାଇଁ ରାଉତରାୟ ଉପସ୍ଥିତ ଥିଲେ ।