ନୂଆଦିଲ୍ଲୀ: ପ୍ରଦୂଷଣରେ ପେଷି ହେଉଛି ସାରା ବିଶ୍ୱ। ଏଥିରୁ ସହଜରେ ମୁକୁଳିବା କଷ୍ଟକର। ପ୍ଲାଷ୍ଟିକ୍ ପ୍ରଦୂଷଣ ସହିତ ସଂଘର୍ଷ କରୁଥିବା ବିଶ୍ୱ ପାଇଁ ଏକ ନୂତନ ଆଶା ସୃଷ୍ଟି କରିଛନ୍ତି ଜାପାନର ବୈଜ୍ଞାନିକ। ରାଇକେନ୍ ସେଣ୍ଟର ଫର୍ ଏମର୍ଜେଣ୍ଟ ମ୍ୟାଟର୍ ସାଇନ୍ସ ଏବଂ ଟୋକିଓ ବିଶ୍ୱବିଦ୍ୟାଳୟର ଗବେଷକମାନେ ଏକ ନୂତନ ପ୍ରକାରର ପ୍ଲାଷ୍ଟିକ୍ ବିକଶିତ କରିଛନ୍ତି ଯାହା ମାତ୍ର କିଛି ଘଣ୍ଟା ମଧ୍ୟରେ ସମୁଦ୍ରର ଲୁଣି ପାଣିରେ ସମ୍ପୂର୍ଣ୍ଣ ଭାବରେ ଦ୍ରବୀଭୂତ ହୋଇଯିବ।
ଗବେଷକମାନେ କହିଛନ୍ତି ଯେ ଏହି ପ୍ଲାଷ୍ଟିକ୍ ପାରମ୍ପରିକ ବାୟୋଡିଗ୍ରେଡେବଲ୍ ପ୍ଲାଷ୍ଟିକ୍ ଅପେକ୍ଷା ବହୁତ ଶୀଘ୍ର ଭାଙ୍ଗିଯାଏ ଏବଂ କୌଣସି କ୍ଷତିକାରକ ଅବଶିଷ୍ଟାଂଶ ଛାଡି ନଥାଏ। ଟୋକିଓ ନିକଟବର୍ତ୍ତୀ ୱାକୋ ସହରର ଏକ ପ୍ରୟୋଗଶାଳାରେ ଏକ ପ୍ରଦର୍ଶନରେ ଏହାକୁ ଦେଖାଇଛନ୍ତି। ଏଥିରେ ଏକ ଛୋଟ ଖଣ୍ଡର ପ୍ଲାଷ୍ଟିକ ମାତ୍ର ଗୋଟିଏ ଘଣ୍ଟା ମଧ୍ୟରେ ସମୁଦ୍ର ପାଣିରେ ସମ୍ପୂର୍ଣ୍ଣ ଭାବରେ ଦ୍ରବୀଭୂତ ହୋଇଗଲା।
ତଥାପି, ବୈଜ୍ଞାନିକଙ୍କ ଏହି ସଫଳତା ସମ୍ପର୍କରେ ଏପର୍ଯ୍ୟନ୍ତ କୌଣସି ବାଣିଜ୍ୟିକ ଯୋଜନା ଘୋଷଣା କରାଯାଇ ନାହିଁ। କିନ୍ତୁ ପ୍ରୋଜେକ୍ଟ ମୁଖ୍ୟ ଡକ୍ଟର ଟାକୁଜୋ ଆଇଡା କହିଛନ୍ତି ଯେ ପ୍ୟାକେଜିଂ ଶିଳ୍ପ ସମେତ ଅନେକ କ୍ଷେତ୍ର ଏହି ପ୍ଲାଷ୍ଟିକ୍ ପ୍ରତି ଆଗ୍ରହ ଦେଖାଇଛନ୍ତି।
ନୂତନ ପ୍ଲାଷ୍ଟିକ୍ ପାରମ୍ପରିକ ପେଟ୍ରୋଲିୟମ୍-ଆଧାରିତ ପ୍ଲାଷ୍ଟିକ୍ ପରି ଦୃଢ଼। କିନ୍ତୁ ଏହାର ଏକ ବିଶେଷତ୍ୱ ହେଉଛି ଏହା ମାଇକ୍ରୋପ୍ଲାଷ୍ଟିକ୍ ସୃଷ୍ଟି ନକରି ଏହାର ମୌଳିକ ଉପାଦାନଗୁଡ଼ିକରେ ଭାଙ୍ଗିଯାଏ। ଏହି ପ୍ଲାଷ୍ଟିକ୍ ସ୍ଥଳଭାଗରେ ୨୦୦ ଘଣ୍ଟାରୁ ଅଧିକ ସମୟ ମଧ୍ୟରେ ନିଜେ ମିଳାଯାଇପାରେ। ଏହି ପ୍ଲାଷ୍ଟିକ୍ ବିଷାକ୍ତ ନୁହେଁ, ଜ୍ୱଳନଶୀଳ ନୁହେଁ କିମ୍ବା କାର୍ବନ ଡାଇଅକ୍ସାଇଡ୍ ନିର୍ଗତ କରେ ନାହିଁ। ଏହାକୁ ଦୈନନ୍ଦିନ ଜିନିଷରେ କିପରି ବ୍ୟବହାରଯୋଗ୍ୟ କରାଯାଇପାରିବ ସେ ବିଷୟରେ କାମ କରୁଛନ୍ତି ବୈଜ୍ଞାନିକମାନେ।
ସଂଯୁକ୍ତ ରାଷ୍ଟ୍ର ପରିବେଶ କାର୍ଯ୍ୟକ୍ରମ ଅନୁଯାୟୀ, ୨୦୪୦ ସୁଦ୍ଧା ପ୍ଲାଷ୍ଟିକ୍ ପ୍ରଦୂଷଣ ତିନିଗୁଣ ହୋଇପାରେ। ଯାହା ୨୩-୩୭ ମେଟ୍ରିକ୍ ଟନରୁ ଅଧିକ ହେବ ବୋଲି ଆକଳନ କରାଯାଇଛି। ଏପରି ପରିସ୍ଥିତିରେ ଏହି ଆବିଷ୍କାର ସାମୁଦ୍ରିକ ଜୀବନ ଏବଂ ପରିବେଶ ପାଇଁ ଆଶ୍ୱସ୍ତିର ଏକ ବଡ଼ ସଙ୍କେତ ହୋଇପାରେ।
