ରୋମ ୨୯।୮: ଇଟାଲୀରେ ଏକ ପର୍ଣ୍ଣୋଗ୍ରାଫିକ ୱେବସାଇଟ୍ ଦେଶର ପ୍ରମୁଖ ମହିଳାଙ୍କ ଫଟୋକୁ ବିକୃତ କରି ପୋଷ୍ଟ କରିବା ପରେ ଦେଶରେ ଅସନ୍ତୋଷ ଦେଖା ଦେଇଛି। ଏଥିରେ ପ୍ରଧାନମନ୍ତ୍ରୀ ଜର୍ଜିୟା ମେଲୋନୀ ଓ ତାଙ୍କ ଭଉଣୀ ଏରିୟାନାଙ୍କୁ ମଧ୍ୟ ଟାର୍ଗେଟ କରାଯାଇଛି। ଏହି ସବୁ ଫଟୋକୁ ଅଶ୍ଳୀଳ ଓ ଲିଙ୍ଗଗତ ଭେଦଭାବ କ୍ୟାପସନ ସହିତ ପୋଷ୍ଟ କରାଯାଇଛି। ଆଶଙ୍କା କରାଯାଉଛି ଏହି ସବୁ ଫଟୋକୁ ପ୍ରାଇଭେଟ ସୋସିଆଲ ମିଡିଆ ସାଇଟ୍ ଅଥବା ସାର୍ବଜନିକ ସ୍ରୋତରୁ ଚୋରାଇ ଇଟାଲୀୟ ପ୍ଲାଟଫର୍ମ ‘ଫିକା’ରେ ପୋଷ୍ଟ କରାଯାଇଛି।
ଏହି ୱେବସାଇଟର ୭ ଲକ୍ଷରୁ ଅଧିକ ସବସ୍କ୍ରାଇବର ଅଛନ୍ତି। ଏହି ସବୁ ଫଟୋରେ ବିଭିନ୍ନ ରାଜନୈତିକ ଦଳର ମହିଳା ନେତ୍ରୀଙ୍କ ଫଟୋ ରହିଛି, ଯେଉଁଗୁଡିକୁ ସେମାନଙ୍କ ଟିଭି ଇଣ୍ଟରେଭ୍ୟୁ ଓ ଅବକାଶ ସମୟରେ ଉତ୍ତୋଳନ କରାଯାଇଥିଲା। ଏହି ସବୁ ଫଟଚିତ୍ରରେ ଶରୀରର ଅଙ୍ଗକୁ ଜୁମ କରି ଦେଖାଯାଇଛି। ଏହି ସବୁ ଫଟୋକୁ ୱେବସାଇଟର ଭିଆଇପି ସେକ୍ସନରେ ଦେଖା ଯାଇଛି। ଏହି ଘଟଣା ମେଟା ଦ୍ୱାରା ମିୟା ମୋଗଲୀ (ମାଇ ୱାଇଫ) ନାମକ ଏକ ଇଟାଲୀୟ ଫେସବୁକ୍ ଆକାଉଣ୍ଟକୁ ବନ୍ଦ କରାଯିବାର ଠିକେ ସପ୍ତାହକ ପରେ ସାମ୍ନାକୁ ଆସିଛି।
‘ଫିକା’ ଇଟାଲୀୟ ଭାଷାରେ ଏକ ଅପଶବ୍ଦ। ଏହି ୱେବସାଇଟ୍ ୨୦୦୫ ମସିହାରୁ ଆରମ୍ଭ ହୋଇଥିଲା। ଏଥିରୁ ଯାହା ଜଣା ପଡୁଛି ଏହା ଏପର୍ଯ୍ୟନ୍ତ ବିନା କୌଣସି ବାଧାରେ ଚଳି ଆସୁଛି। ପୋଲିସ ଏବେ ମାମଲାର ଯାଞ୍ଚ କରୁଛି। ଏହି ସାଇଟ୍ ରେ ଅନ୍ୟ ଯେଉଁ ହାଇପ୍ରୋଫାଇଲ ମହିଳାଙ୍କ ଫଟୋଚିତ୍ର ବ୍ୟବହୃତ ହୋଇଛି ସେଥିରେ ଇଟାଲୀୟ ଅଭିନେତ୍ରୀ ପାଓଲା କର୍ଟିଲେସୀ, ସି’ଏ ଏନକୋରା ଡୋମାନୀ(ଦେଆର୍ସ ଷ୍ଟିଲ ଟୁମରୋ) ଓ ଚିୟାରା ଫେରେଗ୍ନୀ ନାମକ ଜନୈକ ପ୍ରଭାଭଶାଳୀ ବ୍ୟକ୍ତି ମଧ୍ୟ ଅଛନ୍ତି।
ତେବେ ଭେଲେରିୟା କେମ୍ପେଗ୍ନା ଏହି ମାମଲାରେ ପ୍ରଥମ ଅଧିକାରୀକ ଅଭିଯୋଗ କରିଛନ୍ତି। ଏ ନେଇ ସେ ଏକ ଫେସବୁକ୍ ପୋଷ୍ଟ କରିଥିବା ବେଳେ ସେ ଉଲ୍ଲେଖ କରିଛନ୍ତି ଯେ ‘ଯେବେ ସେ ଜାଣିବାକୁ ପାଇଲେ ତାଙ୍କ ଫଟୋ ବିନା ସହମତିରେ ସାଇଟରେ ପ୍ରକାଶିତ କରାଯାଇଛି ସେ ଘୃଣା, କ୍ରୋଧ ଓ ନିରାଶାରେ ଅଛନ୍ତି। ଏଣୁ ଏଥି ପାଇଁ ସେ ଚୁପ୍ ବସିବେ ନାହିଁ।’ ସେ କହିଛନ୍ତି ଯେ ଏହା କେବଳ ମୋର ଏକାକୀ କାହାଣୀ ନୁହେଁ, ଏହା ଆମ ସମସ୍ତଙ୍କ ପାଇଁ। ଏହା ଆମର ସ୍ୱାଧୀନତା, ସମ୍ମାନ ଓ ବିନା ଭୟରେ ବଞ୍ଚିବା ଲାଗି ଆମ ଅଧିକାରକୁ ନେଇ।
